Read Kernewek Matthew 8 Bible Online

Matthew 8 - Kernewek bible

Matthew 8

¹Ha wosa ev dhe dhiyskynna a'n menydh, routhow bras a'n siwyas.

²Hag awotta den klavorek ow tos nes a blegyas dhe'n leur a-dheragdho ha leverel, ‘Arloedh, mar mynnydh, ty a yll ow glanhe.’

³Ha Yesu[23] owth ystynn i leuv a'n tochyas ha leverel, ‘Mynnav, bydh glan’; ha dihwans y lovryjyon a veu glanhes.

⁴Hag yn-medh Yesu dhodho, ‘Gorwith na leverri ger dhe dhenvyth, mes ke hag omdhiskwa dha honan dhe'n oferyas ha doro dha ro a ordenas Moyses, avel dustuni dhedha.’

⁵Ha pan eth ev a-bervedh yn Kapernaum, y teuth dhodho penn-kangour, orth y bysi,

⁶ha leverel, ‘Arloedh, yma ow gwas vy a'y wrowedh palsyes y'n chi, ow kodhevel yn tynn.’

⁷Hag yn-medh ev dhodho, ‘Yth av dh'y yaghhe.’

⁸Ha'n penn-kangour a worthybis ow leverel, ‘Arloedh, nyns ov vy gwiw ty dhe dhos yn-dann ow tho, lemmyn ty na wra saw unnsel leverel an ger ha'm gwas a vydh gwrys yagh.

⁹Rag my ynwedh yw den yn-dann awtorita, hag a'm beus soudoryon yn-dannov, ha my a lever dhe onan, “Ke”, ha mos a wra, ha dhe arall, “Deus”, ha dos a wra, ha dhe'm kethwas, “Gwra hemma”, hag ev a'n gwra.’

¹⁰Yesu pan glewas henna, marth a'n jeva, hag yn-medh ev dhe'n re a'n siwya, ‘Yn hwir y lavarav dhywgh, ny gevis vy kemmys fydh, na hwath yn Ysrael.

¹¹Ha my a lever y teu meur a dus dhiworth an howldrevel ha'n howlsedhes hag esedha orth moes gans Abraham hag Ysak ha Yakob yn gwlaskor nev,

¹²mes mebyon an wlaskor a vydh tewlys yn-mes dhe'n tewlder pella; ena y fydh oelva ha skrinva dyns.’

¹³Hag yn-medh Yesu dhe'n penn-kangour, ‘Ke; ha kepar dell gryssys bedhes gwrys dhis.’ Ha'y was a veu gwrys yagh y'n keth eur na.

¹⁴Ha Yesu ow tos dhe ji Peder, a welas y hweger ev a'y growedh grevys gans fevyr;

¹⁵hag ev a dochyas hy leuv, ha'n fevyr a's gasas; ena hi a sevis yn-bann ha'y servya ev.

¹⁶Pan o devedhys an gorthugher i a dhug dhodho lies sagh dyowl; hag ev a dewlis yn-mes an spyrysyon gans ger ha sawya oll an glevyon,

¹⁷may fe kollenwys an dra kewsys der Ysay an profoes ow leverel, ‘Ev y honan a gemmeras agan gwannegredh hag a borthas agan klevesow.’

¹⁸Ha pan welas Yesu routh[24] a-dro dhodho, ev a ros gorhemmynn dhe omdenna dhe'n lann arall.

¹⁹Hag unn skriba a dheuth ha leverel dhodho, ‘Mester, my a wra dha holya pyle pynag yth ylli.’

²⁰Hag yn-medh Yesu dhodho, ‘Dhe'n lewern yma tell, ha neythow dhe ydhyn an ayr, mes dhe Vab an den nyns eus le may hyll powes y benn ynno.’

²¹Onan arall a'y dhyskyblon a leveris dhodho, ‘Arloedh, gas vy kyns oll dhe vos dhe ynkleudhyas ow thas.’

²²Mes Yesu a leveris dhodho, ‘Ty gwra ow holya, ha gas dhe'n re varow ynkleudhyas aga thus varow aga honan.’

²³Ena ev a yskynnas yn gorhel ha'y dhyskyblon a'n siwyas.

²⁴Hag awotta, annawel veur a sevis, may feu kudhys an gorhel gans tonnow, mes yth esa ev ow koska.

²⁵Ha'y dhyskyblon[25] a dheuth, hag a wrug dhodho difuna, ow leverel, ‘Arloedh, salw ni, kellys on!’

²⁶Yn-medh ev dhedha, ‘Prag yth owgh hwi mar ownek, hwi a voghes fydh?’ Ena ev a sevis ha keredhi an gwynsow ha'n mor, hag y feu kalmynsi meur.

²⁷Marth a gemmeras an dus, hag yn-medhons, ‘Py par den yw hemma, mayth yw gostydh dhodho keffrys an mor ha'n gwynsow?’

²⁸Pan ova devedhys dhe'n lann arall, dhe Bow an Gadarenys,[26] y teuth er y bynn dew sagh dyowl, ow tos yn-mes a'n bedhow, gwyls dres eghenn, ma na ylli nebonan tremena war an fordh na.

²⁹Hag i a armas ow leverel, ‘Pandr'a vynnydh tejy genen ni, A Vab Duw? Osta devedhys omma rag agan tormentya kyns an termyn?’

³⁰Mes neb pellder dhiworta yth esa flokk veur a vogh ow peuri.

³¹Ha'n dhywolow a'n pysis ow leverel, ‘Mara kwredh agan tewlel yn-mes, dannvon ni a-bervedh yn flokk an mogh.’

³²Hag yn-medh ev dhedha, ‘Ewgh ytho.’ Hag ow tos yn-mes, yth ethons a-bervedh y'n mogh; hag oll an flokk a boenyas gwyls yn-nans dres an lann serth bys y'n mor, ha merwel y'n dowrow.

³³Ha'n vugeledh a fias dhe'n fo ha mos dhe'n sita ha derivas pup-tra, keffrys ha'n pyth o hwarvedhys dhe'n dus dalghennys gans dywolow.

³⁴Hag otta, oll an sita a dheuth yn-mes rag dyerbynna Yesu; ha pan y'n gwelsons, i a'n pysis a omdenna yn-mes a'ga oryon.