Read Kernewek Mark 13 Bible Online

Mark 13 - Kernewek bible

Mark 13

¹Hag ev ow mos yn-mes a'n tempel, onan a'y dhyskyblon a leveris dhodho, ‘Mir, A Vester, pana veyn ha pana dhrehevyansow!’

²Ha Yesu a leveris dhodho, ‘A wel'ta jy an drehevyansow meur ma? Ny vydh gesys omma men war ven na vydh terrys dhe'n dor.’

³Ha pan ova esedhys war an menydh Oliv a-dal an tempel, Peder ha Jamys ha Yowann hag Androw a wovynnas orto yn priva,

⁴‘Lavar dhyn, p'eur fydh an taklow ma? ha pandr'a vydh an tokyn pan vo oll an taklow ma parys dhe vos kowlwrys?’

⁵Ha Yesu a dhallathas leverel dhedha, ‘Gwaytyewgh na'gas toello denvyth.

⁶Lies a wra dos yn ow hanow, ow leverel, “My yw ev”, hag a wra toella lies.

⁷Mes pan glewowgh a vreselyow ha son a vreselyow, na gemmerewgh own; henna a res, mes an diwedh ny vydh hwath.

⁸Rag kenedhel a sev erbynn kenedhel ha gwlaskor erbynn gwlaskor; y fydh dorgrysyow yn lower le, y fydh divoetter;[75] dalleth gloesow yw an re ma.

⁹‘Mes bedhewgh war ragowgh agas honan; rag i a wra agas daskorr dhe gonselyow, hag y'n synagys hwi a vydh kronkys, ha hwi a vydh settys a-rag governours ha myghternedh a-barth dhymmo vy, yn dustuni er aga fynn.

¹⁰Ha kyns oll, res yw an aweyl dhe vos pregewthys dhe oll an kenedhlow.

¹¹Mes pan wrellons agas hembronk ha'gas daskorr, na brederewgh kyns a bandr'a gewsiwgh, mes pypynag a vo res dhywgh y'n eur na, henna leverewgh; rag nyns yw hwi a gews, mes an Spyrys Sans.

¹²Ha broder a dhaskorr y vroder dhe'n mernans ha tas y flogh, ha fleghes a sev erbynn kerens, ha gul dhedha bos ledhys;

¹³hag y fydhowgh kesys gans pub den oll a-barth ow hanow vy. Mes neb a dhur bys y'n diwedh, ev a vydh selwys.

¹⁴‘Mes pan welowgh pyth kasadow an difeythter ow sevel le na dhegoedh dhodho (gwres an redyer konvedhes), ena fies dhe'n menydhyow an re usi yn Yudi;

¹⁵ha neb a vo war do an chi, na dhiyskynnes, nag entra rag kyrghes neppyth yn-mes a'y ji;

¹⁶ha neb a vo y'n gwel, na dhehweles arta rag kyrghes y vantell.

¹⁷Go-i an re gans flogh y'n dorr, ha neb a re an vronn y'n dydhyow na!

¹⁸Ha pysiwgh na hwarvo y'n gwav;

¹⁹rag y'n dydhyow na y fydh anken dell na veu a dhalleth an kreashyon a wrug Duw y wruthyl, bys lemmyn, na nevra ny vydh.

²⁰Ha'n Arloedh mar ny wrella kott an dydhyow, ny via sawys kig vyth; mes a-barth an re dhewisys, neb a dhewisas ev, ev a wrug kott an dydhyow.

²¹Hag ena mar lever dhywgh den vydh, “Ottomma an Krist” po “Mir, ottava!”, na wrewgh krysi.

²²Rag fals Kristow ha fals profoesi a sev, hag a dhiskwa toknys hag anethow, rag toella, mara kyllir, an re dhewisys.

²³Mes bedhewgh war; my re dharganas dhywgh pup-tra.

²⁴‘Mes y'n dydhyow na, wosa an galar na, an howl a vydh tewlhes, ha'n loer ny re hy golow,

²⁵ha'n ster a vydh ow koedha a'n nevow, ha'n nerthow usi y'n nevow a vydh kryghyllys.

²⁶Hag ena i a wel Mab an den ow tos y'n kommol gans meur alloes ha golewder.

²⁷Hag ena ev a dhannvon an eledh ha kuntell war-barth y re dhewisys dhiworth an peswar gwyns, dhiworth penn pella an norvys bys yn penn pella an nevow.

²⁸‘Dyskewgh an barabolenn dhiworth an figbrenn; y skorrenn kettell vo medhel ha gorra del yn-mes, hwi a woer bos yn ogas an hav.

²⁹Yndella hwi ynwedh, pan welowgh an taklow ma ow hwarvos, hwi a woer ev dhe vos ogas, orth an darasow.

³⁰Yn hwir y lavarav dhywgh, an henedh ma ny wra tremena erna vo oll an taklow ma gwrys.

³¹Nev ha nor a dremen dhe-ves, mes ow geryow vy, ny dremenons dhe-ves.

³²‘Mes a-dro dhe'n jydh na ha'n eur, ny woer denvyth, naneyl an eledh yn nev, na'n Mab, marnas an Tas.

³³Bedhewgh war, goelyewgh ha pysiwgh;[76] rag ny wodhowgh p'eur fydh an termyn.

³⁴Yth yw kepar ha den ow mos yn hyns, neb a asas y ji, hag a ros awtorita dh'y gethwesyon, dhe bubonan y hwel, hag a erghis dhe'n porther a woelyas.

³⁵Goelyewgh ytho; rag ny wodhowgh p'eur teu mester an chi, po y'n gorthugher, po hanter-nos, po kulyek-kenys, po myttin,

³⁶rag own ev dhe dhos yn tromm ha'gas kavoes hwi ow koska.

³⁷Ha'n pyth a lavarav dhy'hwi, my a'n lever dhe bub den oll: goelyewgh.’