Read Kernewek Mark 14 Bible Online

Mark 14 - Kernewek bible

Mark 14

¹Wosa dew dhydh yth esa an pask ha goel an bara heb goell. Ha'n bennoferysi ha'n skribys a hwila fatell allsens y gemmeres dre doell ha'y ladha;

²rag yth esens ow leverel, ‘A-der y'n dy'goel, ma na vo freudh yn mysk an bobel.’

³Ha pan esa yn Bethani yn chi Simon an klavorek, hag ev esedhys dhe dhybri, y teuth benyn a's teva lester alabaster a eli nard pur, meur y bris; ha hi a dorras an lester ha'y dhinewi war y benn.

⁴Hag yth esa re o drok-pes, neb a leveris an eyl dh'y gila, ‘Prag y feu gwrys a'n eli an koll ma?

⁵Rag an eli ma a allsa bos gwerthys a drihans diner[77] ha moy ha bos res dhe'n voghosogyon.’ Hag i a's koskas yn asper.

⁶Mes Yesu a leveris ‘Gesiwgh dhedhi kres; prag y's troblowgh hi? Hi re wrug warnav ober da.

⁷Rag hwi a gyv an voghosogyon pub eur genowgh ha pan vynnowgh, hwi a yll gul da dhedha, mes ny'm kevowgh vy pup-prys.

⁸Hi re wrug kemmys a ylli; hi re dheuth kyns an termyn rag untya ow horf rag ynkleudhyans.

⁹Hag yn hwir y lavarav dhywgh, pyle pynag may fo pregewthys an aweyl yn oll an bys, an pyth re wrug hi a vydh derivys yn kovadh anedhi.’

¹⁰Ha Yudas Skaryoth, onan a'n dewdhek, eth dhe'n bennoferysi, rag y drayta dhedha.

¹¹I pan glewsons, lowen ens i hag i a ambosas ri mona dhodho. Hag yth esa ow hwilas fordh dh'y drayta, yn prys gwiw.

¹²Hag y'n kynsa dydh a vara heb goell, pan sakrifiens an pask, yn-medh y dhyskyblon dhodho, ‘Ple fynnydh ni dhe vos dhe bareusi may typpri an pask?’

¹³Hag ev a dhannvonas dew a'y dhyskyblon, ha leverel dhedha, ‘Ewgh a-ji dhe'n sita hag ena den a'gas dyerbynn, ow toen pycher dowr; holyewgh ev,

¹⁴hag y'n le mayth ello, leverewgh dhe vester an chi, “An Mester a wovynn, Ple'ma ow gwestva le may hallav dybri an pask gans ow dyskyblon?”

¹⁵Hag ev a dhiskwa dhywgh stevell veur y'n soler, taklys ha parys; hag ena darbarewgh dhyn.’

¹⁶Ha'n dhyskyblon eth yn-kerdh ha dos a-ji dhe'n sita ha kavoes pup-tra kepar dell lavarsa dhedha, hag i a bareusis an pask.

¹⁷Ha gorthugher devedhys, ev a dheuth gans an dewdhek.

¹⁸Ha pan ens esedhys hag ow tybri, yn-medh Yesu, ‘Yn hwir y lavarav dhywgh, onan ahanowgh a wra ow thrayta, neb yw genev ow tybri.’

¹⁹Hag i a dhallathas bos trist ha leverel dhodho onan hag onan, ‘Ywa my?’[78]

²⁰Mes yn-medh ev dhedha, ‘Onan a'n dewdhek, usi ow troghya y leuv y'n keth tallyour genev.

²¹Rag Mab an den a dremen, anodho dell yw skrifys, mes go-ev an den na ganso may ma Mab an den traytys; da via dhodho, byth na ve genys an den na.’

²²Ha pan esens ow tybri, ev a gemmeras bara, ha wosa benniga, ev a dorras ha ri dhedha ha leverel, ‘Kemmerewgh, hemm yw ow horf vy.’

²³Hag ev a gemmeras an hanaf, ha wosa ri grasow, ev a ros dhedha, hag i oll a evas anodho.

²⁴Hag ev a leveris dhedha, ‘Hemm yw ow goes a'n kevambos nowydh[79] yw skoellys rag lies.

²⁵Yn hwir y lavarav dhywgh, ny wrav vy eva namoy a frut an gwinbrenn bys y'n jydh na ma'n evav nowydh yn gwlaskor Duw.’

²⁶Ha wosa i dhe gana hymna, yth ethons dhe'n menydh Oliv.

²⁷Ha Yesu a leveris dhedha, ‘Hwi oll a vydh sklandrys ahanav[80] y'n nos ma,[81] rag yma skrifys “My a wra gweskel an bugel ha'n deves a vydh skattrys.”

²⁸Mes wosa my dhe vos drehevys, yth av a-ragowgh dhe Galile.’

²⁹Mes Peder a leveris dhodho, ‘Kyn fons i oll sklandrys, hwath my ny vydhav.’

³⁰Ha Yesu a leveris dhodho, ‘Yn hwir y lavarav dhis, hedhyw, y'n nos haneth, kyns es kulyek dhe gana diwweyth, ty a'm nagh teyrgweyth.’

³¹Mes ev a leveris dhe greffa, ‘Kyn fe res my dhe verwel genes, ny wrav vy dha dhenagha.’ Hag yndella ynwedh y kewsons i oll.

³²Hag i a dheuth bys yn tyller henwys Gethsemane, hag ev a leveris dh'y dhyskyblon ‘Esedhewgh omma, hedre vi'ma ow pysi.’

³³Hag ev a gemmeras ganso Peder ha Jamys ha Yowann hag a dhallathas bos pur amovys ha troblys,

³⁴hag yn-medh ev dhedha, ‘Yma ow enev grevys fest bys yn ankow; gortewgh omma ha goelyewgh.’

³⁵Hag ev eth nebes war-rag hag a goedhas war an dor ha pysi, mar kalla bos yndella may tremenna an eur a-dhiworto;

³⁶hag ev a leveris, ‘Abba, Tas, possybyl yth yw dhis pup-tra; kemmer dhe-ves an hanaf ma dhiworthiv; mes na vo gwrys ow bodh evy, saw dha vodh tejy.’

³⁷Hag ev a dheuth hag a's kavas ow koska hag yn-medh ev dhe Peder, ‘Simon, koska a wredh? A ny yllsysta goelyas unn our?

³⁸Goelyewgh ha pysiwgh, ma na entrowgh yn temptyans; parys fest yw an spyrys, mes an kig yw gwann.’

³⁹Hag arta ev eth war-rag ha pysi, ow leverel an keth lavarow.

⁴⁰Ha pan dhehwelis, ev a's kavas arta ow koska, rag poes fest o aga dewlagas, ha ny wodhyens pandra dhe worthybi dhodho.

⁴¹Hag ev a dheuth an tressa gweyth hag yn-medh ev dhedha, ‘Koskewgh lemmyn ha powesiwgh; lowr yw, devedhys yw an eur: otta, yma Mab an den daskorrys yntra diwla peghadoryon.

⁴²Sevewgh yn-bann, deun ahanan; otta, a-ogas yma neb a'm trayt.’

⁴³Hag a-dhesempis, hag ev hwath ow kewsel, y teuth Yudas, onan a'n dewdhek, ha ganso routh gans kledhedhyow ha fustow, a-dhiworth an bennoferysi ha'n skribys ha'n henavogyon.

⁴⁴Ha neb a'n traytas re rossa dhedha tokyn, ow leverel, ‘Piwpynag a wrylliv amma dhodho, henn yw ev; synsiwgh ev fast, ha degewgh ev dhe-ves gans rach.’

⁴⁵Ha pan o devedhys, ev eth bys dhodho a-dhesempis ha leverel, ‘Mester!’[82] hag a ammas dhodho.

⁴⁶Hag i a worras aga diwla warnodho, ha'y synsi.

⁴⁷Mes onan a'n dus a sevi ena a dennas y gledha hag a weskis kethwas an arghoferyas hag a droghas a-dhiworto y skovarn.

⁴⁸Ha Yesu a worthybis ha leverel dhedha, ‘A dheuthewgh hwi yn-mes kepar dell ve erbynn lader, gans kledhedhyow ha fustow rag ow dalghenna?

⁴⁹Pub dydh yth esen genowgh y'n tempel ow tyski, ha ny wrussowgh ow synsi; mes res yw dhe'n skryptors bos kollenwys.’

⁵⁰Hag i a'n gasas kettep onan, hag a fias dhe'n fo.

⁵¹Hag yth esa unn den yowynk orth y siwya, ow kwiska kweth lien maylys a-dro dh'y gorf noeth; hag i[83] a'n dalghennas;

⁵²mes ev a asas an gweth lien, hag a fias noeth dhiworta.

⁵³Hag i a hembronkas Yesu dhe-ves bys y'n arghoferyas; hag oll an bennoferysi ha'n henavogyon ha'n skribys a omguntellas.[84]

⁵⁴Ha Peder a'n siwyas a-bell bys yn klos an arghoferyas, hag yth o esedhys gans an withysi, hag owth omdoemma orth an tan.

⁵⁵Ha'n bennoferysi hag oll an Sanhedrin a hwilas dustuni erbynn Yesu rag y ladha, ha ny'n kavsons.

⁵⁶Rag lies a dhug fals dhustuni er y bynn, mes nyns o aga dustuni unnver.

⁵⁷Ha re a sevis yn-bann, ha doen fals dhustuni er y bynn, ow leverel,

⁵⁸‘Ni a'n klewas ow leverel, “My a wra diswul an tempel ma re beu gwrys gans diwla ha kyns penn trydydh my a dhrehav onan arall, gwrys heb diwla.” ’

⁵⁹Mes yndella na hwath nyns o unnver aga dustuni.

⁶⁰Ha'n arghoferyas a sevis yn-bann yn aga mysk, hag a wovynnas orth Yesu ow leverel, ‘A ny worthybydh travyth? Pandra yw an dustuni a dheg an re ma er dha bynn?’

⁶¹Mes ev a dewis, ha ny worthybis travyth. Arta an arghoferyas a wovynnas orto ha leverel dhodho, ‘Osta jy an Krist, Mab an Bennigys?’

⁶²Ha Yesu a leveris, ‘My ywa, “ha hwi a wel Mab an den esedhys a'n barth dhyghow dhe'n galloes, hag ow tos gans kommol an nev.” ’

⁶³Ena an Arghoferyas a skwardyas y dhillas hag a leveris, ‘Pyth yw an edhomm dhyn a voy a dhustunioryon?

⁶⁴Hwi re glewas an blasfemi. Pandra brederowgh hwi?’ Ha peub oll a'n dampnyas, bos ow tervynn an mernans.

⁶⁵Ha re a dhallathas trewa warnodho; ha kudha y fas i a wrug, ha'y gronkya, ha leverel dhodho, ‘Gwra profoesa’, ha'n withysi a'n kemmeras, gans hwattys.

⁶⁶Ha pan esa Peder a-woeles y'n klos, onan a vaghtethyon an arghoferyas a dheuth,

⁶⁷ha pan welas hi Peder owth omdoemma, hi a viras orto ha leverel, ‘Ha ty ynwedh, yth esesta gans an den a Nazareth, Yesu.’

⁶⁸Mes ev a dhenaghas, ow leverel, ‘Ny wonn na ny gonvedhav pandr'a leverydh.’ Hag ev eth yn-mes dhe'n porth,[85] ha'n kulyek a ganas.[86]

⁶⁹Ha'n vaghteth, orth y weles, a dhallathas leverel arta dhe'n re esa ow sevel ena, ‘Hemm yw onan anedha.’

⁷⁰Mes ev a dhenaghas arta. Ha nebes wosa henna an re esa ow sevel ena a leveris arta dhe Peder, ‘Dhe wir, ty yw onan anedha, rag ty yw den a Alile.’

⁷¹Mes ev a dhallathas milliga ha ti, ‘Ny aswonnav an den ma a gewsowgh anodho.’

⁷²Hag a-dhesempis an kulyek a ganas an nessa gweyth. Ha Peder a borthas kov a'n ger a leveris Yesu dhodho, ‘Kyns es an kulyek dhe gana diwweyth, ty a'm denagh teyrgweyth.’ Hag ev a dhallathas oela.