Read Kernewek Mark 2 Bible Online

Mark 2 - Kernewek bible

Mark 2

¹Hag arta ev a entras dhe Kapernaum wosa nebes dydhyow; ha klewys veu, ev dhe vos y'n chi.

²Ha hware[4] lies a omguntellas war-barth, ma nag esa na fella le ragdha, na hwath a-dro dhe'n daras; hag yth esa ow pregoth dhedha an ger.

³Hag y teuthons ow tri dhodho unn palsi, degys gans peswar den.

⁴Ha pan na yllens dos nes dhodho drefenn an routh, i a dhistias an to mayth esa; ha wosa i dhe derri dredho, i a dhellos dhe'n leur an gravath may hwrowedhi an palsi.

⁵Ha Yesu pan welas aga fydh, a leveris dhe'n palsi, ‘Mab, gevys yw dha beghosow.’

⁶Mes yth esa re a'n skribys esedhys ena, hag ow resna yn aga holonn,

⁷‘Prag y kews an den ma yndella? Blasfemi a wra; piw a yll gava peghosow saw unnsel Duw?’

⁸Ha desempis Yesu pan aswonnis yn y spyrys aga bos ow resna yndella yntredha aga honan, a leveris dhedha, ‘Prag y resnowgh hwi an taklow ma yn agas kolonn?

⁹Pyneyl yw esya, leverel dhe'n palsi “Gevys yw dha beghosow”, po leverel, “Sav, ha kemmer dha weli yn-bann ha kerdh”?

¹⁰Mes may hyllowgh godhvos bos dhe Vab an den galloes dhe ava peghosow war an bys’ (ev a lever dhe'n palsi)

¹¹‘my a lever dhis, sav, ha kemmer dha weli yn-bann, ha ke dhe'th chi.’

¹²Hag ev a sevis, hag ow kemmeres an gweli yn-bann a-dhesempis, ev eth yn-mes dherag a-wel anedha i oll, mayth esa marth dhedha i oll, ow kordhya Duw, ha leverel, ‘Bythkweth ny welsyn travyth a'n par ma.’

¹³Hag ev eth yn-mes arta ryb an mor; hag oll an routh a dheuth dhodho, hag ev a's dyskas.

¹⁴Hag ow tremena, ev a welas Levi mab Alfeus esedhys orth an dollva, hag yn-medh ev dhodho, ‘Hol vy.’ Hag ev a sevis yn-bann ha'y holya.

¹⁵Ha pan o esedhys orth an voes yn y ji, lies toller ha peghador ynwedh o esedhys war-barth gans Yesu ha'y dhyskyblon; rag yth esa kals anedha, hag i a'n holya.[5]

¹⁶Ha pan y'n gwelsons ow tybri gans peghadoryon ha tolloryon, yn-medh an skribys ha'n Fariseow[6] dh'y dhyskyblon, ‘Prag ymava ow tybri hag eva gans tolloryon ha peghadoryon?’

¹⁷Ha Yesu, pan glewas henna, a leveris dhedha, ‘Dhe'n re yw yagh nyns eus edhomm a vedhek, mes dhe'n re yw klav; nyns o'ma devedhys rag gelwel an re wiryon, mes peghadoryon.’

¹⁸Hag yth esa dyskyblon Yowann ha'n Fariseow ow kul penys owth hepkorr dybri; hag y teuthons ha leverel dhodho, ‘Prag y hwra dyskyblon Yowann ha dyskyblon an Fariseow penys, ha'th dyskyblon jy ny wrons penys?’

¹⁹Ha Yesu a leveris dhedha, ‘A yll kowetha an gour pries gul penys, hedre vo an gour pries gansa? Hedre vo an gour pries gansa, ny yllons gul penys.

²⁰Mes an dydhyow a dheu may fydh an gour pries kemmerys a-dhiworta, hag ena i a wra penys y'n jydh na.

²¹‘Ny wra denvyth gwrias darn a bann nowydh[7] war wisk koth; poken an darn a denn a-dhiworto, an nowydh a-dhiworth an koth, ha'n skward a vydh gweth.

²²Ha ny wra denvyth gorra gwin nowydh yn gwingreghyn koth; poken an gwin nowydh a derr an kreghyn, ha'n gwin ha'n kreghyn a vydh diswrys; mes gwin nowydh a dal bos gorrys yn kreghyn nowydh.’

²³Hag y hwarva, y tremenas ev der an ysegi y'n sabot; ha'y dhyskyblon a dhallathas gul troe'lergh,[8] ow terri an pennow-ys.

²⁴Ha'n Fariseow a leveris dhodho, ‘Mir, prag y hwrons i an pyth nag yw lafyl y'n sabot?’

²⁵Hag ev a leveris dhedha, ‘A ny wrussowgh redya bythkweth pandr'a wrug Davydh, pan esa dhodho edhomm, hag yth esa nown dhodho ev ha dhe'n re esa ganso,

²⁶fatell eth yn chi Duw yn dydhyow Abiathar an arghoferyas ha dybri torthow an ragworrans nag yw lafyl aga dybri saw gans an oferysi, hag a wrug aga ri ynwedh dhe'n dus esa ganso?’

²⁷Hag ev a leveris dhedha, ‘An sabot a veu gwrys rag mab-den, a-der mab-den rag an sabot;

²⁸ytho Mab an den yw Arloedh ynwedh a'n sabot.’