Read Kernewek Mark 4 Bible Online

Mark 4 - Kernewek bible

Mark 4

¹Hag ev a dhallathas dyski arta ryb an mor. Hag yth o kuntellys a-dro dhodho routh veur, ytho ev eth a-bervedh yn gorhel, hag esedha ynno war an mor: hag yth esa oll an routh war an tir ryb an mor.

²Hag yth esa ow tyski dhedha lies tra dre barabolennow, ha leverel dhedha yn y dhyskas,

³‘Goslowewgh! Yth eth yn-mes gonador rag gonis has.

⁴Ha pan esa ow konis, rann a'n has a goedhas ryb an fordh, ha'n ydhyn a dheuth ha'y devorya.

⁵Ha rann arall a goedhas war an veynek, ma nag esa meur a dhor, hag a-dhesempis hi a eginas, drefenn nag esa dhedhi downder dor;

⁶mes pan dhrehevis an howl, goleskys veu, ha drefenn nag esa dhedhi gwreydh, y feu desyghys.

⁷Ha rann arall a goedhas yn mysk spern, ha'n spern a devis ha'y thaga, ha ny dhug trevas.

⁸Ha rann arall a goedhas yn dor da, hag a dhug trevas esa ow tevi hag ow kressya, hag a dhug, rann deg warn ugens, rann tri-ugens, ha rann kansplek.’

⁹Hag yn-medh ev, ‘Neb a'n jeva diwskovarn rag klewes, ev klewes.’

¹⁰Ha pan esa y honan, an re esa a-dro dhodho gans an dewdhek a wovynnas orto a-dro dhe'n parabolennow.

¹¹Hag ev a leveris dhedha, ‘Dhywgh hwi yma grontys kevrin gwlaskor Duw, mes dhe'n re a-ves, pup-tra a dheu dre barabolennow,

¹²“rag may firons dhe wir, mes heb gweles, ha may klewons dhe wir, mes heb konvedhes, rag own i dhe dreylya, ha may fo gevys dhedha.” ’

¹³Hag yn-medh ev dhedha, ‘A ny gonvedhowgh hwi an barabolenn ma? Ytho fatell yllowgh konvedhes parabolennow vytholl?

¹⁴An gonador a has an ger.

¹⁵Ha'n re ma yw an re usi ryb an fordh, le mayth yw hesys an ger; ha wosa i dh'y glewes, Satnas a dheu desempis, ha kemmeres dhe-ves an ger a veu hesys ynna.[14]

¹⁶Ha'n re erell keffrys yw an re a veu hesys war an veynek, ha wosa i dhe glewes an ger, i a'n degemmer a-dhistowgh gans lowena;

¹⁷hag i ny's teves gwreydhenn ynna i aga honan, mes ny wrons pesya mes pols byghan; ena, pan dheffo trobel po helghyans rag an ger, i a drebuch desempis.

¹⁸Ha re erell yma, a veu hesys yn mysk spern; yth yns i an re a glew an ger,

¹⁹ha fienasow an bys ma, ha dynyans rychys, ha hwans a daklow erell ow tos a-ji, a dag an ger, ha ny dheg frut.

²⁰Ha'n re na yw an re a veu hesys yn tir da, neb a glew an ger hag a'n degemmer, hag a dheg frut, re deg warn ugens, re tri-ugens, ha re kansplek.’

²¹Hag ev a leveris dhedha, ‘Yw lugarn dres may haller y worra yn-dann vushel, po yn-dann weli? A nyns yw rag y settya war an kantolbrenn?

²²Rag nyns yw travyth kelys marnas rag may fo diskwedhys, na nyns yw travyth kudhys, marnas rag may teffo bys yn golow.

²³Den mara'n jeves diwskovarn rag klewes, ev klewes.’

²⁴Hag yn-medh ev dhedha, ‘Bedhewgh war a'n pyth a glewowgh. Gans an musur a vusurowgh, y fydh musurys dhywgh hwi: ha dhywgh hwi neb a woslow,[15] moy a vydh res.

²⁵Rag neb a bewvo, dhodho ev y fydh res; ha neb na bewvo, y fydh kemmerys a-dhiworto ynwedh an pyth a bew.’

²⁶Hag ev a leveris, ‘Yndella yth yw gwlaskor Duw: kepar ha pan ve den ow tewlel has y'n dor,

²⁷ha koska, ha sevel nos ha dydh, ha'n has a wra egina ha tevi, ny woer ev fatell y'n gwra.

²⁸Rag an dor a dheg trevas anodho y honan, kynsa an welsenn, ena an penn-ys, wosa henna an ys leun y'n penn.

²⁹Mes pan vo parys an drevas, desempis ev a worr an gromman ynni, rag bos devedhys an ysasver.’

³⁰Hag ev a leveris ‘Dhe bana dra a wren ni hevelebi gwlaskor Duw, po py barabolenn dredhi y hyllyn hy deskrifa?

³¹Yth yw kepar ha hasenn kedhow, ha hi pan vo hesys yn dor, byghanna yw ages oll an hasennow usi y'n dor;

³²ha wosa hy bos hesys, hi a dyv yn-bann, hag a dheu ha bos brassa ages oll an losow, hag a dheg skorrennow meur, may hallo ydhyn an nevow triga yn-dann an goskes anedhi.’

³³Dre lies parabolenn a'n par na yth esa ow terivas an ger dhedha, kepar dell esa dhedha galloes a'y glewes;

³⁴heb parabolenn ny gewsi orta, mes yn priva ev a styrya pup-tra dh'y dhyskyblon.

³⁵An keth jydh na, ha'n gorthugher devedhys, ev a leveris dhedha, ‘Gwren ni tremena dhe'n tu arall.’

³⁶Ytho i a asas an routh, ha'y' gemmeres ev, kepar dell esa, y'n gorhel. Hag yth esa skathow erell ganso.

³⁷Hag annawel veur a wyns a sevis, ha'n tonnow a weskis y'n gorhel may feu an gorhel lemmyn ow pos lenwys.

³⁸Hag yth esa ev yn delergh an gorhel, ow koska war bluvek. Hag i a wrug dhodho difuna, ha leverel dhodho, ‘Mester, a ny'th teur mann, ha ni ow mos dhe goll?’

³⁹Hag ev a sevis, ha keredhi an gwyns, hag a leveris dhe'n mor ‘Taw, spavennha!’ Ha'n gwyns a hedhis, hag yth esa kalmynsi meur.

⁴⁰Hag ev a leveris dhedha, ‘Prag yth owgh hwi mar ownek? Fatell yw nag eus dhywgh fydh?’[16]

⁴¹Mes own bras a's teva, hag yn-medhons an eyl dh'y gila, ‘Py par den yw hemma, mayth yw gostydh dhodho keffrys an gwyns ha'n mor?’