Read Kernewek Mark 6 Bible Online

Mark 6 - Kernewek bible

Mark 6

¹Hag ev eth yn-mes alena, ha dos yn y vro y honan; ha'y dhyskyblon a'n siwyas.

²Ha pan o devedhys an sabot, ev a dhallathas dyski y'n synaga, ha lies, orth y glewes, a's teva marth, hag yn-medhons, ‘A-ble teuth dhodho an taklow ma? Ha pyth yw an furneth re beu res dhodho, ha'n oberow galloesek ma gwrys gans y dhiwla?

³A nyns yw hemma an ser prenn, mab Maria, broder Jamys ha Yoses ha Yudas ha Simon? hag a nyns usi y hwerydh omma genen?’ Ha sklandrys ens i anodho.

⁴Hag yn-medh Yesu dhedha, ‘Nyns yw profoes heb enor, saw yn y vro y honan, hag yn mysk y gerens y honan, hag yn y ji y honan.’

⁵Ha ny ylli gul ena ober galloesek vytholl, marnas ev a worras y dhiwla war nebes klevyon ha'ga sawya.

⁶Ha marth o ganso drefenn aga diskryjyans. Hag yth esa ow mos a-dro y'n trevow, ow tyski.

⁷Hag ev a elwis dhodho an dewdhek, hag a dhallathas aga dannvon yn-mes, dew ha dew; hag ev a ros dhedha galloes war spyrysyon avlan,

⁸ha gorhemmynna dhedha, ma na gemmerrens travyth war an hyns, saw unnsel lorgh; na bara, na skryp, na mona yn aga grogys,

⁹mes bos arghenys gans sandalyow; na gwiska diw bows.

¹⁰Hag yn-medh ev dhedha, ‘Pyle pynag yth yllowgh a-bervedh yn unn chi, ena trigewgh bys pan omdennowgh a'n tyller na.

¹¹Ha py tyller pynag na vynno agas degemmeres, na'gas klewes, pan yllowgh alena, shakyewgh dhe-ves an doust a-dhann agas treys yn dustuni er aga fynn.’[20]

¹²Ytho yth ethons yn-kerdh ha pregoth, may koettha tus yn edrek.

¹³Hag i a dewlis yn-mes lies dyowl, hag untya gans olew lies o klav, ha'ga sawya.

¹⁴Ha myghtern Herod a glewas anodho, rag y hanow o aswonnys a-les, hag i a leveri,[21] ‘Yowann Besydhyer yw drehevys a'n re varow, ha dre henna yma an oberow galloesek owth oberi ynno ev.’

¹⁵Re erell a leveri, ‘Ev yw Elias’; mes re erell a leveri, ‘Profoes yw, avel onan a'n brofoesi.’

¹⁶Mes Herod pan glewas a leveris, ‘Yowann yw, neb a wrugavy y dhibenna; dasserghys yw a'n re varow.’[22]

¹⁷Rag Herod y honan a dhannvonsa dhe dhalghenna yn Yowann ha'y gelmi yn prison a-barth Herodias, gwreg y vroder Felip, rag ev a's demmedhsa;

¹⁸rag yth esa Yowann ow leverel dhe Herod, ‘Nyns yw lafyl ty dhe gemmeres gwreg dha vroder.’

¹⁹Rakhenna Herodias a borthas avi er y bynn, hag a vynna y ladha, mes ny ylli;

²⁰rag Herod a'n jeva own a Yowann, ow kodhvos y vos gour ewn ha sans, hag ev a'n gwitha saw; ha pan y'n klewas yth o ankombrys bras,[23] mes ev a'n goslowi yn lowen.

²¹Ha pan o devedhys dydh gwiw, Herod a wrug koen yn y benn-bloedh dh'y dus vras, dh'y benn-gaptenyon ha dhe welhevin Galile;

²²ha pan dheuth a-ji myrgh an Herodias na[24] ha donsya, hi a blesyas Herod ha'n re esedhys ganso. Yn-medh an myghtern dhe'n voren, ‘Govynn orthiv pypynag a vynni ha my a'n gront dhis.’

²³Hag ev a'n tos dhedhi, ‘Pypynag oll a wovynni orthiv my a'n gront dhis, bys yn hanter ow gwlaskor.’

²⁴Ha hi eth yn-mes ha leverel dh'y mamm, ‘Pandr'a wrav orto govynn?’ Ha hi a leveris, ‘Penn Yowann Besydhyer.’

²⁵Ha desempis hi a dheuth a-bervedh toeth da dhe'n myghtern ha govynn, ow leverel, ‘My a vynn ty dhe ri dhymm dison war dallyour penn Yowann Besydhyer.’

²⁶Ha grevys fest o an myghtern; byttegyns drefenn y li, ha rag an re o esedhys ganso, ny vynna hy skonya.

²⁷Ha desempis an myghtern a dhannvonas dibenner, hag a worhemmynnis may fe dres y benn: ha henna eth ha'y dhibenna y'n prison,

²⁸hag a dhros y benn war dallyour, ha'y ri dhe'n voren ha'n voren a'n ros dh'y mamm.

²⁹Ha'y dhyskyblon, pan glewsons henna, a dheuth ha kemmeres y gorf, ha'y worra yn bedh.

³⁰Ha'n abesteli a omguntellas a-dro dhe Yesu hag a dherivas dhodho pup-tra a wrussens gul ha dyski.

³¹Hag yn-medh ev dhedha, ‘Dewgh hwi agas honan yn priva bys yn tyller difeyth ha powes pols.’ Rag yth esa lies ow tos hag ow mos, hag i ny's tevo spas rag dybri.

³²Hag i a omdennas y'n gorhel bys yn tyller difeyth, yn priva.

³³Ha lies a's gwelas owth omdenna, ha'ga aswonn, ha poenya ena a-droes a bub sita, ha drehedhes an tyller a-ragdha.

³⁴Ha pan dheuth yn-mes, ev a welas routh veur, ha truedh a'n jeva anedha, rag yth ens avel deves heb bugel; hag ev a dhallathas dyski dhedha lies tra.

³⁵Ha lemmyn pan o an eur seulabrys diwedhes, y dhyskyblon a dheuth dhodho ha leverel, ‘Hemm yw tyller difeyth, ha lemmyn diwedhes yw an eur;

³⁶gwra aga gasa dhe vos, mayth ellons y'n pow hag y'n trevow a-dro, ha prena dhedha aga honan neppyth dhe dhybri.’

³⁷Mes ev a worthybis ha leverel dhedha, ‘Rewgh hwi dhedha may tepprons.’ Hag yn-medhons dhodho, ‘A wren ni mos dhe brena bara a dhew kans diner, ha ri dhedha dhe dhybri?’

³⁸Mes yn-medh ev dhedha, ‘Py lies torth eus genowgh? Ewgh dhe weles.’ Ha pan wodhvons, i a leveris ‘Pymp, ha dew bysk.’

³⁹Hag ev a worhemmynnis may hwrellens gul dhedha esedha oll yn bagasow war an gwyrwels.

⁴⁰Hag i a esedhas yn renkow, yn kansow hag yn hanter-kansow.

⁴¹Ha wosa ev dhe gemmeres an pymp torth ha'n dhew bysk, ev a viras yn-bann dhe nev, ha benniga, ha terri an torthow, ha'ga ri dh'y dhyskyblon dhe worra a-ragdha, ha'n dhew bysk ev a's rannas yntredha oll.

⁴²Hag i a dhybris yn kettep penn, ha lenwys vons.

⁴³Hag i a gemmeras yn-bann dewdhek kanstellas leun a'n brewyon hag a'n puskes.

⁴⁴Hag yth o an re a dhybris an torthow pymp mil wour.

⁴⁵Hag ena ev a wrug dh'y dhyskyblon mos a-bervedh y'n gorhel ha mos dhe'n tu arall bys yn Bethsaida, hag ev ow tannvon an routh dhe-ves.

⁴⁶Ha wosa ev dhe asa farwell dhedha, ev a omdennas dhe'n menydh rag pysi.

⁴⁷Ha devedhys an gorthugher, yth esa an gorhel yn kres an mor, hag ev y honan war an tir.

⁴⁸Hag ev a's gwelas tewlys a-dro hag i ow roevya, rag bos an gwyns er aga fynn; hag a-dro dhe beswora goel an nos ev a dheuth dhedha ow kerdhes war an mor, hag a vynnsa tremena dresta.

⁴⁹Mes pan y'n gwelsons ow kerdhes war an mor, i a dybis y vos tarosvann, hag i a armas;

⁵⁰rag i a'n gwelas yn kettep onan hag euth esa dhedha. Mes hware ev a gewsis gansa ha leverel dhedha, ‘Gwellhewgh agas cher, my yw; na berthewgh own.’

⁵¹Hag ev eth bys dhedha a-bervedh y'n gorhel; ha'n gwyns a hedhis. Ha marth bras a's teva yntredha aga honan dres musur, ha sowdhenys ens i;[25]

⁵²rag ny wrussons konvedhes a-dro dhe'n torthow, mes[26] aga holonn o kaleshes.

⁵³Ha wosa tremena dhe'n tu arall, i a dheuth dhe'n tir yn Gennesaret, hag ankorya.

⁵⁴Ha pan esens ow tos yn-mes a'n gorhel, desempis an dus a'n aswonnis.

⁵⁵I a boenyas a-derdro yn oll an pow na, ha dalleth doen an glevyon a-dro yn gweliow pyle pynag y klewsons y vos ev.

⁵⁶Ha plepynag yth entra ev, yn trevow, po yn sitys, po yn gwelyow, i a worras an glevyon y'n marghasow, ha'y bysi may tocchyens kyn fe ma's pilenn y vantell; ha kekemmys a's tochyas a veu sawys.