Read Kernewek Luk 1 Bible Online

Luk 1 - Kernewek bible

Luk 1

¹Lies huni re omgemmeras araya derivadow yn kempenn a-dro dhe'n taklow kowlwrys yn agan mysk,

²kepar dell vons delivrys dhyn ni gans an re o testow ha menystrys a'n ger a'n dalleth;

³ytho, yth hevelis dhymmo vy ynwedh bos 'vas skrifa dhis yn kempenn, A Theofilus gorwiw, wosa hwithra pup-tra yn kompes a'n dalleth,

⁴mayth aswonni surneth an dyskas a veu res dhis.

⁵Yth esa yn dydhyow Herod myghtern Yudi, oferyas, Zakaria y hanow, a asrann Abia, hag y feu dhodho gwreg, onan a vyrghes Aron, ha'y hanow Elisabeth.

⁶Gwiryon ens i aga dew a-wel dhe Dhuw, ow kerdhes divlam yn oll gorhemmynnow hag ordenansow an Arloedh.

⁷Nyns esa dhedha flogh, rag bos Elisabeth anvap, ha'n dhew anedha o gyllys pell yn aga dydhyow.

⁸Y hwarva, pan esa ow menystra avel oferyas yn torn y asrann a-dherag Duw,

⁹war-lergh us an oferyaseth, ev dhe vos dewisys dre dewlel prenn dhe leski ynkys, ow mos yn sentri an Arloedh,

¹⁰hag yth esa oll routh an bobel ow pysi a-ves yn offrynn ynkys.

¹¹El an Arloedh a omdhiskwedhas dhodho, ow sevel a'n barth dhyghow dhe alter an ynkys.

¹²Ha troblys veu Zakaria orth y weles, hag own a goedhas warnodho.

¹³An el a leveris dhodho, ‘Na borth own, Zakaria, rag klewys re beu dha bysadow, ha'th wreg Elisabeth a dhineyth mab dhis, ha ty a'n henow Yowann;

¹⁴ha lowena ha heudhder a vydh dhis, ha lies huni a lowenha yn y enesigeth.

¹⁵Rag ev a vydh meur a-dherag an Arloedh, ha gwin ha diwes ny wra ev dhe eva mann, ha lenwys vydh ev a'n Spyrys Sans, ha henna dhiworth brys y vamm,

¹⁶hag ev a dreyl lies huni a vebyon Ysrael dhe'n Arloedh aga Duw.

¹⁷Ha mos a wra ev a-dheragdho y'n spyrys ha'n nerth a Elias dhe dreylya kolonnow tasow dhe fleghes, ha tus dhiwostydh dhe furneth tus ewnhynsek, dhe dharbari dhe'n Arloedh pobel bareusys.’

¹⁸Ha Zakaria a leveris dhe'n el, ‘Fatell wonn vy hemma? rag gour koth ov vy, ha'm gwreg gyllys pell yn hy dydhyow.’

¹⁹Ha'n el a worthybis dhodho, ‘Gabriel ov vy, neb a sev a-rag Duw, ha dannvenys veuv dhe gewsel orthis, ha dhe dhri dhis an nowodhow da a hemma.

²⁰Hag otta, avlavar vydhydh, heb galloes kewsel bys y'n jydh may hwrer an taklow ma, drefenn na gryssys dhe'm geryow, a vydh kowlwrys yn aga thermyn.’

²¹Hag yth esa an dus ow kortos Zakaria, ha marth a's tevo, ev dhe dhelatya mar bell y'n tempel.

²²Ha pan dheuth yn-mes, ny ylli kewsel orta, hag i a wodhva ev dhe weles gwelesigeth y'n tempel; hag ev a wrug sinys orta, ha pesya avlavar.

²³Ena pan veu dydhyow y wonis dhe benn, ev a omdennas dh'y ji.

²⁴Wosa an dydhyow na, y wreg Elisabeth a gonsevyas, ha hi a omgudha pymp mis, ow leverel,

²⁵‘Yndella re'm dyghtyas an Arloedh y'n dydhyow may hwrug vri ahanav, dhe gemmeres dhe-ves ow mewl yn mysk tus.’

²⁶Hag y'n hweghves mis an el Gabriel a veu dannvenys gans Duw dhe sita yn Galile henwys Nazareth,

²⁷dhe wyrghes ambosys dhe wour henwys Yosep, a ji Davydh; ha Maria o hanow an wyrghes.

²⁸Ha'n el a dheuth a-bervedh dhedhi ha leverel, ‘Hayl, leun a ras, an Arloedh genes. Bennigys os yn mysk benynes.’[1]

²⁹Mes troblys yn feur veu hi gans y lavar, ha hi a ombrederi py par salusyans a vedha hemma.

³⁰Ha'n el a leveris dhedhi, ‘Na borth own, Maria, rag ty re gavas gras gans Duw.

³¹Hag otta, ty a gonsev y'th vrys ha dineythi mab, ha ty a'n henow Yesu.

³²Meur vydh ev, hag ev a vydh gelwys Mab an Ughella; ha'n Arloedh Duw a re dhodho tron y das Davydh,

³³ha reynya a wra war ji Yakob bynitha; ha dh'y vyghternses ny vydh diwedh.’

³⁴Ha Maria a leveris dhe'n el, ‘Fatell vydh hemma, a-ban na aswonnav gour?’

³⁵Ha'n el a worthybis dhedhi, ‘An Spyrys Sans a dheu warnas, ha nerth an Ughella a'th worskeus; rakhenna an flogh a vydh genys[2] a vydh gelwys Mab Duw.

³⁶Hag otta, Elisabeth dha geniterow, hi ynwedh, re gonsevyas mab yn hy hothni, ha hemm yw an hweghves mis gensi, neb a veu gelwys anvap;

³⁷rag gans Duw ny vydh travyth dres y alloes.’

³⁸Ha Maria a leveris, ‘Awotta maghteth an Arloedh; re bo dhymm war-lergh dha er.’ Ha'n el a omdennas dhiworti.

³⁹Y'n dydhyow na Maria a sevis ha mos yn unn fyski dhe'n vro venydhyek, dhe sita a Yuda,

⁴⁰ha hi eth yn chi Zakaria ha salusi Elisabeth.

⁴¹Ha pan glewas Elisabeth salusyans Maria, an flogh a lammas yn hy brys; hag Elisabeth a veu lenwys a'n Spyrys Sans,

⁴²ha hi a grias gans kri ughel, ‘Bennigys osta yn mysk benynes, ha bennigys yw frut dha vrys.

⁴³Ha prag yth yw hemma grontys dhymm, mamm ow Arloedh dhe dhos dhymmo vy?

⁴⁴Rag otta, pan dheuth lev dha salusyans dhe'm diwskovarn, an flogh a lammas y'm brys.

⁴⁵Ha gwynn hy bys neb a grysis y fedha kollenwys an taklow a veu leverys dhedhi dhiworth an Arloedh.’

⁴⁶Ha Maria a leveris, ‘Ow enev a veurha an Arloedh,

⁴⁷ha'm spyrys re lowenhas yn Duw ow Selwyas,

⁴⁸rag ev re viras war uvelder[3] y vaghteth. Rag otta, alemma rag oll an henedhow a'm gelow bennigys;[4]

⁴⁹rag ev neb yw galloesek re wrug oberow meur ragov, ha sans yw y hanow ev,

⁵⁰hag yma y dregeredh a unn henedh dhe'n nessa dhe'n re a berth own anodho.

⁵¹Ev re dhiskwedhas nerth der y vregh, ev re skattras an re woethus yn preder aga holonn.

⁵²Ev re worras tus alloesek[5] dhe'n leur dhiworth aga seow, ha re dhrehevis an re uvel.

⁵³Ev re lenwis an re nownek a bythow da, ha'n dus rych ev re dhannvonas dhe-ves gwag.

⁵⁴Ev re weresas Ysrael y was, ow perthi kov a'y dregeredh,

⁵⁵par dell ambosas dh'agan tasow, Abraham ha'y has bys vykken.’

⁵⁶Ha Maria a wortas gensi a-dro dhe dri mis, ha hi a dhehwelis dh'y chi hy honan.

⁵⁷Ha'n termyn a veu kowlwrys rag Elisabeth dhe dhineythi, ha hi a dhineythis mab.

⁵⁸Ha'y hentrevogyon ha'y neskerens a glewas an Arloedh dhe dhiskwedhes tregeredh veur dhedhi, hag i a lowenhi gensi.

⁵⁹Hag y'n ethves dydh i a dheuth dhe drodreghi an flogh hag i a'n henwis Zakaria war-lergh hanow y das.

⁶⁰Mes y vamm a worthybis, ‘Na wrewgh, mes henwys vydh ev Yowann.’

⁶¹Hag i a leveris dhedhi, ‘Nyns eus denvyth a'th neskerens henwys gans an hanow ma.’

⁶²Hag i a wre sinys dh'y das, pandr'a vynna y vos henwys.

⁶³Hag ev a wovynnas legh-skrifa, ha skrifa, ‘Yowann yw y hanow ev.’ Hag i oll a's teva marth.

⁶⁴Desempis igerys veu y anow, ha'y daves, hag ev a gewsi, ow kormel Duw.

⁶⁵Own a dheuth war oll aga hentrevogyon; hag yth esa oll an taklow ma derivys a-les yn oll an vro venydhyek a Yudi,

⁶⁶ha seul a's klewas a's gorras yn aga holonn, ow leverel, ‘Ytho, pandr'a vydh an flogh ma?’ Hag yth esa leuv an Arloedh ganso.

⁶⁷Ena y das Zakaria a veu lenwys a'n Spyrys Sans, hag ev a brofoesas, ow leverel,

⁶⁸‘Bennigys re bo an Arloedh, Duw Ysrael; rag ev re dheuth dhe weles y bobel ha'ga dasprena,

⁶⁹ha drehevel korn a selwyans ragon yn chi Davydh y was;

⁷⁰kepar dell gewsis seuladhydh dre anow y brofoesi sans,

⁷¹selwyans dhiworth agan eskerens, ha dhiworth dorn oll an re a'gan kas;

⁷²dhe wul tregeredh dh'agan tasow, ha dhe berthi kov a'y gevambos sans,

⁷³an ti a dos orth Abraham agan tas: ev dhe wrontya dhyn ni

⁷⁴ma'n serfyn ev heb own, livrys mes a dhorn agan eskerens[6]

⁷⁵yn sansoleth hag ewnder a-dheragdho oll dydhyow agan bewnans.

⁷⁶Ha ty, flogh, a vydh gelwys profoes an Ughella, rag ty a gerdh a-rag fas an Arloedh, dhe bareusi y fordhow,

⁷⁷dhe ri skians a selwyans dh'y bobel yn dehwelyans aga feghosow,

⁷⁸dre druedh medhel agan Duw, may teu dh'agan vysytya an jydh-tardh a'n ughelder,

⁷⁹dhe ri golow dhe'n re esedhys yn tewlder hag yn skeus ankow, ha dhe hembronk agan treys yn fordhow kres.’

⁸⁰Ha'n flogh a devi, hag omgrevhe yn spyrys; hag yth esa y'n difeythtiryow bys yn dydh y omdhiskwedhyans dhe Ysrael.