Read Kernewek Luk 12 Bible Online

Luk 12 - Kernewek bible

Luk 12

¹Y'n keth termyn, pan veu lies mil a'n routh kuntellys war-barth, may stankyens an eyl y gila, ev a dhallathas leverel dh'y dhyskyblon yn kynsa, ‘Omwithewgh a woell an Fariseow, yw falsuri.

²Rag nyns eus travyth kudhys na vydh diskudhys, po kel na vydh aswonnys.

³Rakhenna, pypynag a leversowgh y'n tewlder a vydh klewys y'n golow, ha pypynag a hwystersowgh y'n chambouryow a vydh pregewthys war an tohow.

⁴‘My a lever dhywgh, ow howetha, na berthewgh own a'n re a ladh an korf ha wosa henna ny yllons gul travyth moy.

⁵My a'n diskwa dhywgh, piw a berthowgh own anodho: perthewgh own a neb a yll, wosa ladha, tewlel yn ifarn.[58] Ya, yn-medhav dhywgh, perthewgh own anodho ev.

⁶A ny werthir pymp golvan a dhew ferdhynn?[59] Ha nyns yw nagonan anedha ankevys a-rag Duw.

⁷Mes ynwedh blewennow agas penn yw oll niverys. Na berthewgh own; hwi a dal moy ages lies golvan.

⁸‘Ha my a lever dhywgh, piwpynag a wrello ow aswonn a-rag tus, Mab an den ynwedh a wra y aswonn a-rag eledh Duw.

⁹Mes neb a'm denagh a-rag tus a vydh deneghys a-rag eledh Duw.

¹⁰Seul a lavarro ger erbynn Mab an den, y fydh gevys dhodho; mes neb a gabel erbynn an Spyrys Sans, ny vydh gevys dhodho.

¹¹Ha pan y'gas drons a-rag synagys ha rewloryon ha tus awtorita, na vedhewgh prederus fatell bledyowgh agas ken, na pandr'a leverowgh;

¹²rag an Spyrys Sans a dhysk dhywgh y'n eur na pandr'a goedh dhywgh y leverel.’

¹³Nebonan y'n routh a leverys dhodho, ‘A Vester, lavar dhe'm broder may ranno genev vy an kemmynnro.’

¹⁴Hag ev a worthybis dhodho, ‘A dhen, piw a'm settyas avel breusydh po mayner warnowgh?’

¹⁵Hag yn-medh ev dhedha, ‘Bedhewgh war, hag omwithewgh a bithneth oll, rag kyn fo palster dhe dhen, ny dheu y vewnans a'y bythow.’

¹⁶Hag ev a gewsis parabolenn dhedha, ow leverel, ‘An tir dhe unn den rych a dhug trevas dha.

¹⁷Hag ev a omwovynni, “Pandr'a wrav, rag ny'm beus le rag kuntell ow threvas war-barth?”

¹⁸Hag yn-medh ev, “Hemma a wrav; my a denn dhe'n dor ow skiberyow ha drehevel brassa, ha kuntell ena oll an greun ha'm pythow,

¹⁹ha my a lever dhe'm enev, Ty enev, yma dhis pythow lower gorrys yn gwith rag lies blydhen; gwra powes, dybri, eva, ha bos lowen.”

²⁰Mes Duw a leveris dhodho, “Ty foll, haneth y'n nos dha enev a vydh rekwirys dhiworthis; ha'n pythow a bareusys, piw dhodho y fydhons?”

²¹Yndella y fydh dhe neb a guntell tresor dhodho y honan, mes nyns yw rych a-rag Duw.’

²²Hag ev a leveris dh'y dhyskyblon, ‘Rakhenna yn-medhav dhywgh, na wrewgh mos yn prederow a-dro dh'agas bewnans pandr'a dhebrowgh, na byth moy, a-dro dh'agas korf pandr'a wiskowgh.

²³Rag bewnans yw moy ages boes, ha'n korf yw moy ages dillas.

²⁴Mirewgh orth an brini bras: rag ny wonedhons has na ny vysons; nyns eus dhedha na gwithva na skiber, mes Duw a's mag. Pygemmys moy a bris owgh hwi ages an ydhyn!

²⁵Ha piw ahanowgh, hag ev ow prederi, a yll keworra pols vyth dhe dhydhyow y vewnans?[60]

²⁶Ytho mar ny yllowgh gul an taklow byghanna, prag y prederowgh a-dro dhe'n re erell?

²⁷Mirewgh orth an lili, fatell devons; ny wrons lavurya na ny nedhons. Mes my a lever dhywgh, nag o Solomon yn oll y splannder gwiskys kepar hag onan a'n re ma.

²⁸Ytho Duw, mar kweth yndella an gwels y'n gwel, yw bew hedhyw ha tewlys y'n forn a-vorow, pygemmys moy y hwra ev agas kwetha hwi, A hwi a voghes fydh?

²⁹Ha hwi, na hwilewgh pandr'a dhebrowgh na pandr'a evowgh, ha na vedhewgh gyllys yn prederow.

³⁰Rag oll kenedhlow an bys a hwila an taklow ma, ha'gas Tas a woer bos edhomm dhywgh anedha.

³¹Mes hwilewgh gwlaskor Duw, hag y fydh res dhywgh oll an taklow ma.

³²‘Na berthewgh own, A flokk byghan, rag bodh agas Tas yw, ev dhe ri dhywgh an wlaskor.

³³Gwerthewgh agas pythow ha rewgh alusen. Gwrewgh porsys dhywgh agas honan na vydhons koth, tresor y'n nevow na fyll nevra, le na dheu lader dhodho na ny wra goedhan y dhistrui.

³⁴Rag le may ma agas tresor, ena ynwedh y fydh agas kolonn.

³⁵‘Bedhes agas diwglun grogysys, ha'gas lugern gans golow;

³⁶ha hwi agas honan kepar ha tus ow kortos aga mester pan dhehwel dhiworth demmedhyans, mayth igorrons dhodho dison kettell dheffo ha knoukya.

³⁷Gwynn aga bys an gethwesyon na, neb a wra an mester aga havoes difun pan dheu; yn hwir y lavarav dhywgh, ev a omwrogys, ha'ga desedha orth an voes, ha mos yn-rag dh'aga servya.

³⁸Ha mar teffa y'n nessa po y'n tressa goel ha'ga havoes yndella, gwynn aga bys an gethwesyon na.

³⁹‘Ha godhvydhewgh hemma, mar kodhve mester an chi py eur y teffa an lader, ny wrussa gasa[61] y ji dhe vos terrys.

⁴⁰Ha hwi, bedhewgh parys, rag Mab an den a dheu yn eur ma na'n gwaytyowgh.’

⁴¹Peder a leveris, ‘Arloedh, a gewsydh an barabolenn ma ragon ni po rag pub den oll?’

⁴²Ha'n Arloedh a worthybis, ‘Piw ytho yw an rennyas lel ha doeth neb a re an mester dhodho charj a'y servysi dhe ri dhedha aga ewnrannow y'n seson ewn?

⁴³Gwynnvys an kethwas na, neb a wra y vester y gavoes ow kul yndella pan dheu.

⁴⁴Dhe wir y lavarav dhywgh, ev a re dhodho charj war oll y bythow.

⁴⁵Mes mar lever an kethwas na yn y golonn, “Delatya a wra ow mester y dhevedhyans”, ha dalleth gweskel an wesyon ha'n maghtethyon, ow tybri hag eva hag omvedhwi,

⁴⁶ena mester an kethwas na a dheu yn dydh ma na wayt hag yn eur ma na woer, ha'y gessydhya yn tynn,[62] hag ordena dhodho le gans an dus dhislen.

⁴⁷Ha'n kethwas na neb a wodhva bodh y vester mes ny ombareusis ha ny wrug herwydh y vodh a vydh gweskys gans strokosow pals.

⁴⁸Mes ev neb na wodhva y vodh mes gul taklow ow tendil strokosow, a vydh boghes gweskys. Dhe neb may feu res meur, dhiworto y fydh hwilys meur, ha dhe neb may feu kemmynnys meur, hwath moy a vydh govynnys anodho.

⁴⁹‘My re dheuth dhe worra tan y'n bys, hag ass ov vy hwansek may fe seulabrys gans tan!

⁵⁰Yma besydh dhymm dhe vos besydhys ganso, hag ass ov vy stroethys bys pan vo kowlwrys!

⁵¹A dybowgh y hwrugavy dos rag ri kres y'n bys? Na wrug, yn-medhav dhywgh, mes rag rannans.

⁵²Alemma rag y fydh pymp omrynnys yn unn chi, tri erbynn dew ha dew erbynn tri;

⁵³tas a vydh rynnys erbynn mab ha mab erbynn tas, mamm erbynn myrgh ha myrgh erbynn mamm, hweger erbynn hy gohydh ha gohydh erbynn hweger.’

⁵⁴Hag ev a leveris ynwedh dhe'n routhow, ‘Pan welowgh kommolenn ow sevel y'n howlsedhes, hwi a lever dison kowas dhe dhegynsiwa, hag yndella y fydh;

⁵⁵ha pan welowgh gwyns an dyghow dhe hwytha, hwi a lever y fydh toemmder, ha henna a hwer.

⁵⁶Hwi falswesyon, hwi a woer dissernya enep an nor ha'n nev, ytho fatell na wodhowgh dissernya an termyn ma?

⁵⁷‘Prag na vreusowgh ragowgh hwi agas honan an pyth yw ewn?

⁵⁸Pan edh a-rag an justis gans dha erbynner, striv bos akordys ganso war an fordh, poken ev a'th tre a-rag an breusydh, ha'n breusydh a wra dha dhelivra dhe'n gwithyas, ha'n gwithyas a wra dha dewlel yn prison.

⁵⁹Yn-medhav dhywgh, ny wredh mos alena erna vo attylys an diwettha mita.’[63]