Read Kernewek Luk 13 Bible Online

Luk 13 - Kernewek bible

Luk 13

¹Y'n prys na yth esa tus ena a dherivas dhodho a-dro dhe dus Galile may kemmyskas Pilat aga goes gans aga sakrifisow.

²Hag ev a worthybis ha leverel dhedha, ‘A dybowgh tus Galile na dhe vos gweth peghadoryon es oll tus Galile erell, drefenn i dhe wodhav an taklow na?

³Nyns ens i mann, yn-medhav dhywgh, mes mar ny goedhowgh yn edrek hwi oll a dhe goll y'n keth vaner.

⁴Po an etek den na may koedhas warnedha an tour yn Siloam ha'ga ladha — a dybowgh i dhe vos kablus dres oll an dus erell trigys yn Yerusalem?

⁵Nyns ens i mann, yn-medhav dhywgh, mes mar ny goedhowgh yn edrek hwi oll a dhe goll y'n keth vaner.’

⁶Hag ev a dherivas dhedha an barabolenn ma: ‘Yth esa dhe nebonan figbrenn plynsys yn y winlann, hag ev eth dhe hwilas frut warnodho mes ny gavas.

⁷Hag ev a leveris dhe'n lowarther, “Otta, nans yw teyr blydhen y tov ow hwilas frut war an figbrenn ma ha ny gavav. Ytho gwra y dreghi dhe'n dor; prag y hwra ev an dor dhe vos skwithys?”

⁸Mes ev a worthybis ha leverel dhodho, “Arloedh, gas e an vlydhen ma ynwedh, ha my a bal a-dro dhodho ha gorra teyl;

⁹ha mar tokko frut y'n termyn a dheu, da; mes mar ny dheg, tregh e dhe'n dor.” ’

¹⁰Yth esa ow tyski yn onan a'n synagys y'n sabot.

¹¹Hag awotta benyn neb a's tevia spyrys a wannegredh etek blydhen, ha plegys yn dew o hi, ha ny ylli kammenn sevel a'y sav.

¹²Ha Yesu pan y's gwelas a elwis ha leverel dhedhi, ‘Benyn, livrys os a'th wannegredh.’

¹³Hag ev a worras y dhiwleuv warnedhi; ha hware hi a sevis a'y sav ha gordhya Duw.

¹⁴Mes rewler an synaga, serrys rag Yesu dhe yaghhe yn dydh sabot, a worthybis, ha leverel dhe'n routh, ‘Yma hwegh dydh may tal oberi; dewgh ytho ynna ha bos yaghhes, a-der y'n sabot.’

¹⁵An Arloedh a worthybis dhodho ha leverel, ‘Falswesyon, a ny wra pubonan ahanowgh y'n sabot digelmi y ojyon po y asen a'n presep ha'y hembronk dhe-ves rag gul dhodho eva?

¹⁶A ny dalvia dhe'n venyn ma, myrgh dhe Abraham, kelmys gans Satnas nans yw etek blydhen, bos livrys dhiworth an kolm ma yn dydh sabot?’

¹⁷Hag ev ow leverel an taklow ma, oll y erbynnoryon a berthi meth, ha'n routh oll a lowenhi drefenn an oberow gloryus gwrys ganso.

¹⁸Ena yn-medh ev, ‘Haval dhe bana dra yw gwlaskor Duw, ha dhe bana dra y hwrav vy hy heveli?

¹⁹Haval yw dhe hasenn kedhow a wrug nebonan hy hemmeres ha'y hasa yn y lowarth, ha hi a devis, ha dos ha bos gwydhenn veur,[64] hag yth esa ydhyn an ayr trigys yn hy skorrennow.’

²⁰Hag arta y leveris, ‘Dhe bana dra y hwrav vy hevelebi gwlaskor Duw?

²¹Haval yw dhe woell a wrug benyn y gemmeres ha'y gemmyska yn tri musur[65] a vleus bys pan vo oll an toes sevys.’

²²Hag ev a dremena dre sitys ha trevow, ow tyski, hag ow lavurya troha Yerusalem.

²³Nebonan a leveris dhodho, ‘Arloedh, yw boghes an re selwys?’ Hag ev a worthybis dhedha,

²⁴‘Strivyewgh dhe vos a-bervedh der an porth kul, rag lies, yn-medhav dhywgh, a hwila mos a-ji ha ny yllons.

²⁵Wosa mester an chi dhe sevel hag alhwedha an daras, ena hwi a sev an tu a-ves ow knoukya war an daras ow leverel, “Arloedh, igor dhyn”, hag ev a worthyp dhywgh ow leverel, “Ny'gas aswonnav, a-ble owgh.”

²⁶Ena hwi a dhalleth leverel, “Ni a dhybris a-ragos hag eva, ha ty a dhyskas yn agan stretys.”

²⁷Hag ev a lever dhywgh, “Ny'gas aswonnav, a-ble owgh; diberthewgh dhiworthiv, hwi dhrogoberoryon oll!”

²⁸Hag ena y fydh oela ha skrinva dyns pan welowgh Abraham hag Ysak ha Yakob hag oll an brofoesi yn gwlaskor Duw, mes hwi tewlys yn-mes.

²⁹Hag i a dheu a'n howldrevel ha'n howlsedhes hag a'n kledh hag a'n dyghow hag esedha orth moes yn gwlaskor Duw.

³⁰Hag otta, yma re neb yw diwettha a vydh kynsa, hag yma re yw kynsa a vydh diwettha.’

³¹Y'n eur na, re a'n Fariseow a dheuth, ow leverel dhodho, ‘Ke dhe-ves, ha voyd alemma, rag Herod a vynn dha ladha.’

³²Hag ev a leveris dhedha, ‘Kewgh dhe leverel dhe'n lowarn na, “Otta, my a dewl dywolow mes ha yaghhe tus hedhyw hag a-vorow, hag y'n tressa dydh my a gowlwra ow ober.

³³Byttegyns res yw dhymm pesya y'n hyns hedhyw hag a-vorow ha'n jydh a siw; rag ny yll bos, profoes dhe verwel marnas yn Yerusalem.”

³⁴Yerusalem, Yerusalem, neb a ladh an brofoesi ha labydha an re yw dannvenys dhis, peskweyth y yeunis vy kuntell dha fleghes war-barth kepar dell guntell yar hy yerigow yn-dann hy eskelli, ha ny vynnsowgh!

³⁵Otta, agas chi yw gesys dhywgh, forsakys.[66] Ha my a lever dhywgh, ny'm gwelowgh vy bys pan leverowgh, Bennigys yw neb a dheu yn hanow an Arloedh.’