Read Kernewek Luk 14 Bible Online

Luk 14 - Kernewek bible

Luk 14

¹Ena ev eth yn chi onan a'n benn-fariseow y'n sabot rag dybri bara, hag yth esons orth y aspia gluw.

²Hag otta, a-ragdho yth esa den grevys gans kleves dowr.

³Ha Yesu, ow korthybi, a gewsis dhe'n laghysi ha dhe'n Fariseow, ow leverel, ‘Yw lafyl yaghhe y'n sabot, po a nyns yw?’

⁴Mes i a dewis. Ytho ev a'n kemmeras, ha'y yaghhe, ha'y dhannvon dhe-ves.

⁵Hag ev a leveris dhedha, ‘Py den eus ahanowgh, mar koedh mab[67] po ojyon yn puth, na wra y denna yn-mes hware yn dydh sabot?’

⁶Ha ny wodhvons gorthybi erbynn henna.

⁷Hag ev a gewsis parabolenn dhe'n westoryon re bia gelwys, pan verkyas fatell dhewisens an kynsa tylleryow, ha leverel dhedha,

⁸‘Pan vi gelwys gans nebonan dhe dhemmedhyans, na esedh y'n kynsa tyller, rag own den moy enorys agesos dhe vos gelwys ganso,

⁹ha neb a'gas gelwis agas dew a lever dhis, “Doro an tyller dhe'n den ma”, hag ena ty a gans ankombrynsi dhe gemmeres an tyller isella.

¹⁰Mes pan vi gelwys, ke dhe esedha y'n tyller isella, rag may lavarro dhis neb a'th elwis, “Koweth, gwra mos yn-bann dhe dyller ughella”; ena y fydh dhis bri a-rag oll an dus yw esedhys genes.

¹¹Rag peub neb a omughelha a vydh dres isel, ha neb a omiselha a vydh ughelhes.’

¹²Ena yn-medh ev dhe'n den a wrussa y elwel, ‘Pan rylli li po koen, na wra gelwel dha gowetha na'th vreder na'th neskerens na'th kentrevogyon rych, rag own i dhe'th elwel arta, hag y fydh dhis attal.

¹³Mes pan wredh kevewi, galw an voghosogyon, an evredhyon, an gloppogyon, an dhellyon;

¹⁴ha gwynnvys ty a vydh, rag ny yllons ri attal dhis; rag attal a vydh res dhis yn dasserghyans an re wiryon.’

¹⁵Onan a'n dus esedhys ganso, pan glewas henna, a leveris dhodho, ‘Gwynnvys neb a dheppro bara yn gwlaskor Duw.’

¹⁶Hag ev a leveris dhodho, ‘Unn den a wrug kevewi bras, hag ev a elwis lies dhodho.

¹⁷Ha dhe eur an kevewi, ev a dhannvonas y gethwas dhe leverel dhe'n re a via gelwys, “Dewgh, rag pup-tra yw parys.”

¹⁸Mes i oll a dhallathas omaskusya, onan hag onan. Yn-medh an kynsa dhodho, “My re brenas bargen-tir ha res yw my dhe vos dhe-ves dh'y weles; my a'th pys, gwra ow synsi askusys.”

¹⁹Hag yn-medh den arall, “My re brenas pymp yew oghen hag yth av dh'aga frevi; my a'th pys, gwra ow synsi askusys.”

²⁰Hag yn-medh den arall, “My re dhemmedhis benyn, ha rakhenna ny allav dos.”

²¹Ha'n kethwas a dheuth dhe dherivas henna orth y vester. Ena mester an chi a sorras, hag yn-medh ev dh'y was, “Ke dhe-ves skon dhe'n plenys ha dhe'n stretys y'n sita ha doro omma an voghosogyon, ha'n evredhyon, ha'n dhellyon ha'n gloppogyon.”

²²Ha'n gwas a leveris, “Mester, re beu gwrys dell erghsys, hag yma hwath spas.”

²³Ena yn-medh an mester dhe'n kethwas, “Ke dhe-ves bys y'n fordhow ha'n keow ha'ga honstryna dhe dhos a-ji, rag may fo ow chi lenwys.

²⁴Rag my a lever dhywgh, ny wra nagonan a'n wer na a veu gelwys tastya a'm kevewi.” ’

²⁵Mes yth esa routhow bras ow mos ganso, hag ev a dreylyas ha leverel dhedha,

²⁶‘Mar teu nebonan dhymm heb kasa y das ha'y vamm ha'y fleghes ha'y vreder ha'y hwerydh, hag ynwedh y vewnans y honan, ny yll bos ow dyskybel.

²⁷Ha denvyth neb na dhokko y grows y honan ha dos war ow lergh, ny yll bos ow dyskybel.

²⁸Rag piw ahanowgh, ow mynnes drehevel tour, ny wra esedha kyns oll ha rekna an kost, rag gweles mars eus ganso lowr dh'y gowlwul?

²⁹Ken, wosa ev dhe worra an sel ha bos heb an galloes dhe worfenna, peub a'n gwel a dhalleth y skornya,

³⁰ow leverel, “An den ma a dhallathas drehevel, mes ny allas gorfenna.”

³¹Po py myghtern, ow mos dhe omladh yn kas erbynn myghtern arall, ny wra esedha kyns oll hag omgusulya mar kyll ev gans deg mil mos erbynn neb a dheu er y bynn gans ugens mil?

³²Poken, hag ev hwath pell, ev a dhannvon kannasedh ow hwilas ambosow kres.

³³Yndella ytho, peub ahanowgh neb na hepkorro oll y bythow ny yll bos ow dyskybel.

³⁴‘Hoelan yw da; mes mar kollas an hoelan y vlas, gans pandra y fydh ev sawrys?

³⁵Nyns yw 'vas naneyl dhe'n dor na dhe'n deylek; i a'n tewl dhe-ves. Neb a'n jevo diwskovarn dhe glewes, ev klewes.’