Read Kernewek Luk 17 Bible Online

Luk 17 - Kernewek bible

Luk 17

¹Ev a leveris dh'y dhyskyblon, ‘Ny yll bos na dheffo sklanderyow, mes go-ev an den may tons dredho.

²Gwell via ragdho men-melin dhe vos gorrys a-dro dh'y gonna hag ev dhe vos tewlys y'n mor, kyns ev dhe wul onan a'n re vyghan ma dhe drebuchya.

³Bedhewgh war! Mar pegh dha vroder, gwra y geredhi; ha mar koedh yn edrek, gav dhodho.

⁴Ha mar pegh ev seythgweyth yn unn jydh er dha bynn ha treylya dhis seythgweyth ow leverel “Edrek a'm beus”, res yw ty dhe ava dhodho.’

⁵Ha'n abesteli a leveris dhe'n Arloedh, ‘Gwra kressya agan fydh.’

⁶An Arloedh a leveris, ‘Mara'gas be fydh avel has kedhow, hwi a lavarsiwgh dhe'n sykaminwydhenn ma, “Bydh ty diwreydhys ha plynsys y'n mor”, ha gostydh dhis y fia.

⁷‘Piw ahanowgh, ha dhodho kethwas owth aras po ow pugelya, pan dheu ev a-ji dhiworth an gwel a lever dhodho, “Deus omma hware, hag esedh orth an voes”?

⁸A ny lever dhodho, “Pareus neppyth dhymm rag koen, omwisk, ha'm serv erna worfenniv dybri hag eva; ha wosa henna gwra ty dybri hag eva”?

⁹A wra ev grassa dhe'n kethwas na a wul an pyth a veu erghys dhodho?[73]

¹⁰Yndella hwi ynwedh, pan wrussowgh pup-tra a veu erghys dhywgh, leverewgh, “Kethwesyon anwiw on ni, ny wrussyn namoy es agan dever.” ’

¹¹Hag ev ow mos troha Yerusalem, ev a dremenas der an pow yntra Samaria ha Galile.

¹²Ha pan entras yn unn dre, deg gour klavorek a dheuth er y bynn, ow sevel a-bell,

¹³hag i a dhrehevis aga lev ow leverel, ‘Yesu, Mester, kemmer truedh ahanan!’

¹⁴Ha pan y's gwelas ev a leveris dhedha, ‘Kewgh, omdhiskwedhewgh agas honan dhe'n oferysi.’ Hag i ow mos yn-kerdh, glanhes vons.

¹⁵Mes onan anedha, ow kweles ev dhe vos sawys, a dhehwelis, ow ri glori dhe Dhuw, ughel y lev;

¹⁶hag ev a goedhas war y fas orth treys Yesu ha grassa dhodho. Samaritan o ev.

¹⁷Ha Yesu a worthybis ow leverel, ‘A ny veu deg glanhes? Ple'ma'n naw arall?

¹⁸A ny veu kevys marnas an alyon ma ow tehweles dhe ri glori dhe Dhuw?’

¹⁹Hag yn-medh ev dhodho, ‘Sav yn-bann, ha ke; dha fydh re'th sawyas.’

²⁰Pan veu govynnys orto gans an Fariseow p'eur y teffa gwlaskor Duw, ev a worthybis dhedha ow leverel, ‘Ny dheu gwlaskor Duw yn fordh a yllir y hwithra;

²¹ha ny leverons, “Ottomma hi”, po “Ottena hi.” Rag otta, yma gwlaskor Duw yn agas mysk[74].’

²²Ena yn-medh ev dh'y dhyskyblon, ‘An dydhyow a dheu pan yeunowgh gweles onan a dhydhyow Mab an den, mes ny'n gwelowgh.

²³Hag i a lever dhywgh, “Ottena ev”, po “Ottomma ev”; na gewgh yn-kerdh, na poenya war aga lergh.

²⁴Rag kepar dell wra an lughesenn lughesi, ow kolowi a'n eyl tu yn-dann nev bys dh'y gila, yn kettella y fydh Mab an den yn y jydh ev.

²⁵Mes kyns oll res yw ev dhe wodhav lies tra ha bos neghys gans an henedh ma.

²⁶Ha kepar dell veu yn dydhyow Noy, yn kettella y fydh ynwedh yn dydhyow Mab an den;

²⁷yth esens ow tybri hag eva, demmedhi ha ri yn demmedhyans, bys y'n jydh mayth eth Noy a-bervedh y'n gorhel, ha'n liv a dheuth ha'ga distrui yn kettep penn.

²⁸Y'n keth vaner, kepar dell veu yn dydhyow Lot, yth esens ow tybri, eva, prena, gwertha, plansa, drehevel;

²⁹y'n jydh mayth eth Lot yn-mes a Sodom, tan ha loskven a goedhas dhiworth nev ha'ga distrui yn kettep penn.

³⁰Yn kettella y fydh y'n jydh may fydh diskudhys Mab an den.

³¹Y'n jydh na, neb eus war an to ha'y bythow y'n chi, na wres ev mos yn-nans rag aga hemmeres; ha neb eus y'n gwel keffrys, na dreylyes war-dhelergh.

³²Perthewgh kov a wreg Lot.

³³Piwpynag a hwillo gwitha y vewnans a'n kyll, mes piwpynag a'n kollo a wra y witha.

³⁴My a lever dhywgh, an nos na y fydh dewdhen yn unn gweli: an eyl a vydh kemmerys, y gila a vydh gesys.

³⁵Y fydh diw venyn ow melyas bleus war-barth: an eyl a vydh kemmerys, hy ben a vydh gesys.

³⁶Dew dhen a vydh y'n gwel: an eyl a vydh kemmerys, y gila a vydh gesys.’[75]

³⁷Hag i a worthybis dhodho ow leverel, ‘Ple, Arloedh?’ Ev a leveris dhedha, ‘Le may fo an korf, ena ynwedh yth omguntell an eryon.’