Read Kernewek Luk 18 Bible Online

Luk 18 - Kernewek bible

Luk 18

¹Ev a dherivas parabolenn dhedha, bos res dhedha pysi pup-prys, heb bos digolonnek,

²ow leverel, ‘Yth esa justis yn unn sita neb na'n jeva naneyl own a Dhuw, na revrons orth denvyth.

³Yth esa gwedhwes y'n sita na neb a wre dos dhodho ha leverel, “Ro dhymm gwirvreus erbynn ow erbynner.”

⁴Ev a skonyas pol'ta, mes wortiwedh yn-medh ev ynno y honan, “Hwath kyn na'm beus own a Dhuw na revrons orth denvyth,

⁵rag bos an wedhwes ma orth ow ankombra, my a re dhedhi gwirvreus, ma na dheffo hi wortiwedh ha'm arvedh.” ’[76]

⁶Yn-medh an Arloedh, ‘Goslowewgh dhe'n pyth a lever an justis kammhynsek.

⁷A ny wra Duw gwirvreus rag y dus dhewisys a gri warnodho dydh ha nos; a vydh ev lent ow kweres dhedha?

⁸Lavarav dhywgh, ev dhe wul gwirvreus ragdha hware. Mes pan dheu Mab an den, a gyv ev fydh war an nor?’

⁹Hag ev a gewsis an barabolenn ma dhe dus neb a drestya ynna i aga honan, i dhe vos gwiryon, ha dispresya tus erell:

¹⁰‘Dew dhen a yskynnas dhe'n tempel rag pysi, an eyl Farise ha'y gila toller.

¹¹An Farise a sevis ha pysi yndella orto y honan: “Duw, my a woer gras dhis nag ov vy avel tus erell, ladron, tus gammhynsek, avoutroryon, nag ynwedh avel an toller ma.

¹²My a wra penys heb dybri diwweyth y'n seythun, my a re dega a bup-tra a dhendilav.”

¹³Mes an toller a sevis a-bell ha ny vynni na hwath drehevel y dhewlagas dhe nev, mes ev a weskis y vronn ha leverel, “Duw, kemmer truedh ahanav, peghador.”

¹⁴My a lever dhywgh, an den ma a dhehwelis tre justifiys, a-der an den arall; rag peub a omughelha a vydh dres isel, mes neb a omiselha a vydh ughelhes.’

¹⁵Hag i a dhri dhodho ynwedh fleghesigow may hwrella aga thochya; mes pan welas an dhyskyblon henna i a geredhis an dus.

¹⁶Mes Yesu a elwis an fleghesigow dhodho ha leverel, ‘Gesiwgh an fleghesigow dhe dhos dhymm ha na wrewgh aga lettya, rag dhe re a'n par ma yw gwlaskor Duw.

¹⁷Yn hwir y lavarav dhywgh, piwpynag na dhegemmerro gwlaskor Duw avel fleghik, ev ny enter dhedhi mann.’

¹⁸Unn rewler a wovynnas orto, ‘Mester mas, pandr'a wrav rag erita bewnans heb diwedh?’

¹⁹Yesu a worthybis dhodho, ‘Prag y'm gelwydh mas? Nyns eus nagonan mas saw unnsel Duw.

²⁰Ty a woer an gorhemmynnow: “Na wra avoutri, Na ladh, Na lader, Na dhog kamm dustuni, Enor dha das ha'th vamm.” ’

²¹Yn-medh ev, ‘My re withas oll an re ma a-dhia'm yowynkneth.’

²²Pan glewas Yesu henna, yn-medh ev dhodho, ‘Hwath unn dra a fyll dhis: gwerth pup-tra eus dhis ha'y ranna dhe'n voghosogyon, ha ty a' fydh tresor y'n nevow, ha deus, hol vy.’

²³Mes pan glewas hemma ev a dheuth ha bos pur drist, rag fest rych o ev.

²⁴Yesu a viras orth an den neb o devedhys ha bos trist, ha leverel, ‘Ass yw kales dhe neb a's teves rychys entra dhe wlaskor Duw!

²⁵Rag esya yw kowrvargh dhe dremena dre graw naswydh es dell yw dhe dhen rych entra dhe wlaskor Duw.’

²⁶Yn-medh an re a'n glewas, ‘Piw ytho a yll bos selwys?’

²⁷Yn-medh ev, ‘Taklow na yll tus aga gul, Duw a yll aga gul.’

²⁸Yn-medh Peder, ‘Otta, ni re asas pup-tra ha'th holya.’

²⁹Yn-medh ev dhedha, ‘Yn hwir y lavarav dhywgh, nyns eus denvyth neb re asas chi po gwreg po breder po kerens po fleghes a-barth gwlaskor Duw

³⁰neb na dhegemmer arta lieskweyth moy y'n termyn ma ha bewnans heb diwedh y'n oes a dheu.’

³¹Ena ev a gemmeras an dewdhek a'n eyl tu ha leverel dhedha, ‘Otta, ni a yn-bann dhe Yerusalem, ha pup-tra skrifys gans an brofoesi a-dro dhe Vab an den a vydh kowlwrys.

³²Rag ev a vydh daskorrys dhe'n Jentilys, hag a vydh skornys ha despitys ha trewa a wrons warnodho;

³³ha wosa y skorjya i a'n ladh; ha'n tressa dydh ev a dhassergh.’

³⁴Mes ny gonvedhsons travyth a hemma, ha'n lavar ma a veu kudhys ragdha, ha ny wodhyens styr an pyth a leveris.

³⁵Hag y hwarva, pan esa ow tos nes dhe Yeriko, yth esa unn den dall esedhys ryb an fordh ow peggya;

³⁶ev a glewas routh ow tremena hag a wovynni pandr'a ve hemma.

³⁷I a leveris dhodho, ‘Yma Yesu a Nazareth ow tremena dreson.’

³⁸Hag ev a armas, ‘Yesu, Mab Davydh, kemmer truedh ahanav!’

³⁹An dus neb a gerdhi a-rag a'n koskas may tawa, mes ev a armas dhe voy, ‘Mab Davydh, kemmer truedh ahanav!’

⁴⁰Ena Yesu a sevis hag erghi may fe dres dhodho; ha pan nesas, ev a wovynnas orto,

⁴¹‘Pandr'a vynnydh orthiv dhe wul?’ Ev a leveris, ‘Arloedh, may hwelliv arta.’

⁴²Ha Yesu a leveris dhodho, ‘Gwel ty arta: dha fydh re'th sawyas.’

⁴³Ha dison ev a allas gweles, hag a'n holyas, ow ri glori dhe Dhuw. Ha pan welsons hemma, an bobel oll a wormolas Duw.