Read Kernewek Luk 19 Bible Online

Luk 19 - Kernewek bible

Luk 19

¹Hag ev a entras dhe Yeriko, ow tremena dredhi.

²Hag awotta gour, Zakkeus y hanow, neb o penn-toller, ha den rych;

³yth esa ow hwilas gweles piw o Yesu, mes ny ylli drefenn an routh, rag den byghan o ev.

⁴Ytho ev a boenyas yn-rag hag yskynna yn sykomorwydhenn rag y weles, rag ev dhe dremena an fordh na kyns nep-pell.

⁵Pan dheuth dhe'n tyller, Yesu a viras war-vann ha leverel dhodho, ‘Zakkeus, deus yn-nans uskis, rag hedhyw y tal dhymm godriga y'th chi.’

⁶Ev a fistenas ha dos yn-nans, ha'y wolkomma gans lowena.

⁷An dus oll, pan welsons hemma, a grodhvola ow leverel, ‘Ev res eth dhe godriga gans gour yw peghador.’

⁸Mes Zakkeus a sevis ha leverel dhe'n Arloedh, ‘Otta, hanter ow fythow, Arloedh, my a re dhe'n voghosogyon, ha mar kwrugavy kemmeres neppyth a nebonan dre frows, my a'n daskorr pedergweyth.’

⁹Hag yn-medh Yesu dhodho, ‘Hedhyw selwyans re dheuva dhe'n chi ma, rag an den ma ynwedh yw mab dhe Abraham.

¹⁰Rag Mab an den a dheuth dhe hwilas ha dhe selwel an dra yw kellys.’

¹¹Hag i ow koslowes hemma, ev a dherivas parabolenn moy, rag ev dhe vos ogas dhe Yerusalem hag i a dybi gwlaskor Duw dhe omdhiskwedhes ena a-dhistowgh.

¹²Ytho yn-medh ev, ‘Unn ughelor eth dhe wlas bell, rag may tegemmerro an myghternses dhodho y honan, hag ena dehweles.

¹³Ev a elwis deg a'y gethwesyon ha ri dhedha deg peuns[77] ha leverel dhedha, “Kenwerthewgh gansa bys pan dhov.”

¹⁴Mes y sojets a wre y gasa hag i a dhannvonas kannasow war y lergh ow leverel, “Ny vynnyn an den ma dhe vos myghtern warnan.”

¹⁵Mes pan dhehwelis wosa degemmeres an myghternses ev a erghis an gethwesyon na may rosa ev an mona dhedha, dhe vos gelwys dhodho, dhe dhyski pandr'a veu prow aga henwerth.[78]

¹⁶An kynsa a dheuth yn-rag ha leverel, “Arloedh, dha beuns re wrug prow a dheg peuns.”

¹⁷Yn-medh ev dhodho, “Yn ta re wruss'ta, ow hethwas da! Rag ty dhe vos lel y'n mater pur vyghan ma, kemmer awtorita a-ugh deg trev.”

¹⁸Ena an nessa a dheuth ha leverel, “Dha beuns, Arloedh, re wrug pymp peuns.”

¹⁹Yn-medh ev dhodho ynwedh, “Ha ty, bydh a-ugh pymp trev.”

²⁰Ena an arall a dheuth ha leverel, “Arloedh, otta dha beuns; my a'n gwitha saw maylys yn lien,

²¹rag own a'm bo ahanas, ty dhe vos den kales, ow kemmeres yn-bann an pyth na wrussys y worra yn-nans, hag ow mysi an pyth na wrussys y hasa.”

²²Yn-medh ev dhodho, “Dhiworth dha anow dha honan my a'th vreus, ty gethwas drog! Ty a wodhves ow bos den kales, ow kemmeres yn-bann an pyth na wrugavy y worra yn-nans, hag ow mysi an pyth na wrugavy y hasa.

²³Prag na worrsys ow mona y'n arghantti? Ena, ha my devedhys, my a'n kavsa gans prow.”

²⁴Ha dhe'n dus ow sevel ena yn-medh ev, “Kemmer dhiworto an peuns ha'y ri dhe neb a'n jeves deg.”

²⁵Mes yn-medhons dhodho, “Arloedh, yma dhodho deg peuns seulabrys!”

²⁶“My a lever dhywgh, dhe beub a bewvo, y fydh res, mes dhiworto ev neb na bewvo mann y fydh kemmerys ynwedh an pyth a bew.

²⁷Mes ow eskerens na, neb na vynnsons my dhe vos myghtern warnedha: gwrewgh aga dri omma ha'ga ladha a-dheragov.” ’

²⁸Wosa leverel hemma, ev eth yn-rag, ow mos yn-bann dhe Yerusalem.

²⁹Ha pan dheuth nes dhe Bethfage ha Bethani, dhe'n vre henwys an menydh Oliv, ev a dhannvonas dew a'y dhyskyblon

³⁰ow leverel, ‘Kewgh dhe'n dre a-dal dhywgh, hag ow mos ynni hwi a gyv ebel asen stegys, ma na wrug denvyth bythkweth esedha warnodho. Gwrewgh y dhigelmi ha'y dhri omma.

³¹Ha mar kovynn nebonan orthowgh “Prag y'n digelmowgh?” gorthybewgh yndella, “Yma dhe'n Arloedh edhomm anodho.” ’

³²An re a veu dannvenys eth yn-kerdh, ha'y havoes poran dell lavarsa dhedha.

³³Hag i ow tigelmi an ebel, y berghennogyon a leveris dhedha, ‘Prag y tigelmowgh an ebel?’

³⁴I a worthybis, ‘Yma dhe'n Arloedh edhomm anodho.’

³⁵Ytho i a'n dros dhe Yesu, ow tewlel aga mantelli war an ebel, ha gorra Yesu warnodho.

³⁶Hag ev ow mos yn-rag, yth esens ow lesa aga mantelli war an fordh;

³⁷ha pan dheuth nes dhe'n fordh war-nans a'n menydh Oliv, oll routh y dhyskyblon a dhallathas gormel Duw yn lowen gans lev ughel, rag oll an oberow galloesek a welsens,

³⁸ow leverel, ‘Bennigys yw an Myghtern a dheu yn hanow an Arloedh. Kres yn nev ha gordhyans y'n ughelder.’

³⁹Ha re a'n Fariseow y'n routh a leveris dhodho, ‘Mester, keredh dha dhyskyblon.’

⁴⁰Ev a worthybis, ow leverel, ‘My a lever dhywgh, mar tewons an re ma, an veyn a wra leva!’

⁴¹Ha pan nesas, ow kweles an sita, ev a oelas warnedhi,

⁴²ow leverel, ‘Mar kodhves, ty ynwedh, y'n jydh ma[79] an taklow a led dhe gres![80] — mes lemmyn kudhys yns a'th tewlagas.

⁴³Rag an dydhyow a dheu warnas, pan dhrehav dha eskerens tommenn er dha bynn hag i a omsett a-dro dhis ha'th stroetha a bub tu;

⁴⁴i a'th terr dhe'n dor, ha'th fleghes ynnos, ha ny asons men war ven ynnos, rag ny aswonnsys termyn dha vysytashyon.’

⁴⁵Hag ow mos y'n tempel, ev a dhallathas tewlel yn-mes an re esa ow kwertha;[81]

⁴⁶ow leverel dhedha, ‘Skrifys yw, “Ow chi a vydh chi a bysadow”, mes hwi re'n gwrug fow a ladron.’

⁴⁷Ha pub dydh yth esa ow tyski y'n tempel. Mes an bennoferysi ha'n skribys ha pennow an bobel a hwila y dhistrui,

⁴⁸mes ny gavsons fordh dhe wul travyth, rag pub den oll a gregi war y eryow, ow koslowes.