Read Kernewek Luk 20 Bible Online

Luk 20 - Kernewek bible

Luk 20

¹Hag y hwarva yn onan a'n dydhyow na pan esa ev ow tyski an bobel y'n tempel hag ow pregoth an nowodhow da, an bennoferysi ha'n skribys war-barth gans an henavogyon a dheuth yn-rag

²ha leverel dhodho, ‘Lavar dhyn, py awtorita dredho y hwredh an taklow ma, po piw a ros dhis an awtorita ma?’

³Ev a worthybis ha leverel dhedha, ‘My ynwedh a wovynn neppyth orthowgh; lavar dhymm,

⁴besydh Yowann, esa dhiworth nev po dhiworth tus?’

⁵I a resnas an eyl gans y gila, ow leverel, ‘Mar leveryn “A nev”, ev a lever, “Ytho prag na gryssowgh dhodho?”

⁶Mes mar leveryn “Dhiworth tus”, an bobel oll a wra agan labydha, rag i a syns Yowann dhe vos profoes.’

⁷Ytho i a worthybis, na wodhvons a-ble feu.

⁸Hag yn-medh Yesu dhedha, ‘Na byth moy ny lavarav dhywgh py awtorita dredho y hwrav an taklow ma.’

⁹Hag ev a dhallathas derivas an barabolenn ma dhe'n bobel: ‘Unn den a blansas gwinlann ha'y settya dhe diogyon, hag ena vyajya yn-kerdh, termyn hir.

¹⁰Hag yn seson an drevas, ev a dhannvonas kethwas dhe'n diogyon, rag may rollens dhodho neppyth a frut an winlann; mes an diogyon a'n kronkyas ha'y dhannvon yn-kerdh, gwag y dhiwla.

¹¹Ytho arta ev a dhannvonas kethwas arall, mes i a wrug y gronkya ev ynwedh, ha'y dhespitya, ha'y dhannvon dhe-ves heb travyth.

¹²Ena ev a dhannvonas arta, an tressa, mes ev ynwedh i a vrewis, ha'y dewlel yn-mes.

¹³Yn-medh arloedh an winlann, “Pandr'a wrav? My a dhannvon ow mab kerys, martesen i a wra vri anodho.”

¹⁴Mes an diogyon, pan y'n gwelsons, a omgusulya an eyl gans y gila, ow leverel, “Hemm yw an her. Gwren ni y ladha, may teffo an ertach dhyn ni.”

¹⁵Ytho i a'n tewlis yn-mes a'n winlann ha'y ladha. Pandra ytho a wra arloedh an winlann orta?

¹⁶Ev a dheu ha distrui an diogyon na, ha ri an winlann dhe erell.’ Pan glewsons hemma i a leveris, ‘Bynner re bo!’

¹⁷Mes ev a viras orta ha leverel, ‘Pandra ytho a styr an skryptor ma “An men hag a veu skonys gans an weythoryon, henn yw gwrys pennmen an korn”?

¹⁸Peub neb a goettho war an ven na a vydh terrys dhe demmyn, mes ev may koettho warnodho a vydh skwattys dhe dhoust.’

¹⁹Ha'n skribys ha'n bennoferysi a hwilas settya dalghenn ynno y'n eur na, mes own a's teva a'n bobel, rag i a wodhva ev dhe gewsel an barabolenn ma er aga fynn i.

²⁰Hag i a viras orto gluw, ha dannvon aspioryon neb a omwrug gwiryon, dh'y vagla yn y lavarow, rag ma'n daskorrons dhe awtorita ha galloes an governour.

²¹I a wovynnas orto ha leverel, ‘Mester, ni a woer ty dhe gewsel ha dhe dhyski yn ewn, ha ny wre'ta plegya dhe fas denvyth, marnas dyski fordh Duw yn lenduri.

²²Yw lafyl ni dhe ri trubyt dhe Sesar, po nag yw?’

²³Owth aswonn aga felder, yn-medh ev dhedha,[82]

²⁴‘Diskwedhewgh dhymm dinerenn,[83] piw a bew an imaj ha'n pennskrifa usi warnedhi?’ Yn-medhons i, ‘Sesar.’

²⁵Yn-medh ev dhedha, ‘Attelewgh ytho dhe Sesar an taklow usi dhe Sesar, ha dhe Dhuw an taklow usi dhe Dhuw.’

²⁶Ha ny yllons y vagla yn y lavarow a-rag an bobel; marth a's teva a'y worthyp, ha tewel a wrussons.

²⁷Ha re a'n Sadukeow a dheuth dhodho, neb a nagh bos dasserghyans, hag a wovynnas orto

²⁸ow leverel, ‘Mester, Moyses a skrifas ragon, “Mar merow broder neb den ha dhodho gwreg, mes ev anvap, y vroder a dal kemmeres an wreg ha maga askorr dh'y vroder.”

²⁹Yth esa ytho seyth broder, ha'n kynsa a gemmeras gwreg hag a verwis anvap.

³⁰Ha'n nessa[84]

³¹ha'n tressa a's kemmeras, hag yn kettella y ferwis an seyth heb gasa fleghes.

³²Yn tiwettha oll[85] an wreg ynwedh a verwis.

³³Ytho y'n dasserghyans, piw anedha y fydh hi y wreg dhodho, rag an seyth a's teva yn gwreg?’

³⁴Yn-medh Yesu dhedha, ‘Fleghes an oes ma a dhemmedh hag yw res yn demmedhyans;

³⁵mes an re yw akontys gwiw dhe dhrehedhes dhe'n oes na ha dhe'n dasserghyans dhiworth an re varow, ny dhemmedhons na nyns yns i res yn demmedhyans;

³⁶na hwath ny yllons merwel na fella, rag yth yns i avel eledh, hag yth yns i fleghes a Dhuw, rag i dhe vos fleghes a'n dasserghyans.

³⁷Moyses y honan a dhiskwedhas y'n derivas a-dro dhe'n bos an re varow dhe vos drehevys, pan gews ev a'n Arloedh avel Duw Abraham, ha Duw Ysak, ha Duw Yakob.

³⁸Ha nyns yw ev Duw a'n re varow mes a'n re vew, rag dhodho ev peub oll yw yn few.’

³⁹Re a'n skribys a worthybis, ‘Mester, ty re gewsis yn ta.’

⁴⁰Rag ny lavasens govynn travyth orto na fella.

⁴¹Hag yn-medh ev dhedha, ‘Fatell yllons leverel Krist dhe vos Mab Davydh?

⁴²Rag Davydh y honan a lever yn lyver an Salmow, “An Arloedh a leveris dhe'm Arloedh, ‘Ty esedh a'n barth dhyghow dhymm,

⁴³erna wrylliv dha eskerens dha skavell-droes.’ ”

⁴⁴Lemmyn mar kwra Davydh y elwel “Arloedh”, fatell yll ev bos y vab?’

⁴⁵Ena, hag oll an bobel ow koslowes, yn-medh ev dh'y dhyskyblon,

⁴⁶‘Bedhewgh war a'n skribys, neb a vynn kerdhes a-dro yn gwiskas hir, hag a gar salusyansow y'n marghasow, ha penn-esedhow y'n synagys ha penn-esedhow yn kevewiow,

⁴⁷neb a gollenk chiow an gwedhwesow, hag a wra pysadow hir yn fayntys; an re ma a's tevydh dhe voy dampnyans.’