Read Kernewek Luk 21 Bible Online

Luk 21 - Kernewek bible

Luk 21

¹Ow mires yn-bann ev a welas an dus rych esa ow tewlel aga rohow y'n arghow.

²Hag ev a welas unn wedhwes voghosek ow tewlel dew vita[86] ynni.

³Yn-medh ev, ‘Yn hwir y lavarav dhywgh, an wedhwes voghosek ma a dewlis y'n argh moy agessa i oll;

⁴rag oll an re ma a dewlis yn offrynnow Duw[87] dhiworth aga lanwes, mes hi dhiworth hy edhomm a dewlis oll an pygans a's tevo.’

⁵Pan esa tus ow kewsel a-dro dhe'n tempel, fatell veu afinys gans meyn drudh ha rohow sakrys, yn-medh ev,

⁶‘An taklow a welowgh — dydhyow a dheu pan na vydh gesys men war ven, na vydh tewlys dhe'n dor.’

⁷I a wovynnas orto, ‘Mester, p'eur fydh hemma ytho, ha pandr'a vydh an tokyn pan vydh an taklow ma ow tegynsiwa?’

⁸Yn-medh ev, ‘Gwaytyewgh ma na vowgh toellys; rag lies a dheu y'm hanow vy ow leverel, “My yw”, hag “An termyn re nesas.” Na holyewgh war aga lergh.

⁹Pan glewowgh a vreselyow ha deray, na gemmerewgh own; rag res yw an taklow ma dhe hwarvos kyns oll. Mes ny vydh an diwedh a-dhesempis.’

¹⁰Ena yn-medh ev dhedha, ‘Kenedhel a sev erbynn kenedhel ha gwlaskor erbynn gwlaskor,

¹¹y fydh dorgrysyow meur, ha divoetter ha plagys yn lies le, hag y fydh gwelyow euthyk ha toknys meur dhiworth nev.

¹²‘Mes kyns hemma oll dhe hwarvos, i a dewl aga diwla warnowgh ha'gas helghya; i a'gas daskorr dhe'n synagys ha dhe brisonyow, hembrenkys dhe-ves a-rag myghternedh ha governours a-barth ow hanow vy.

¹³Hemma a vydh chons dhywgh rag doen dustuni.

¹⁴Settyewgh ytho yn agas kolonn, na bareusowgh agas klem yn kynsa,

¹⁵rag my a re dhywgh ganow ha furneth ma na yll oll agas erbynnoryon sevel er agas pynn na'gas kontradia.

¹⁶Hwi a vydh traytys ynwedh gans kerens, ha breder, ha neskerens, ha kowetha, ha rann ahanowgh i a worr dhe'n mernans.

¹⁷Ha hwi a vydh kesys gans pub den oll rag ow hanow vy.

¹⁸Mes ny vydh blewenn a'gas penn distruys.

¹⁹Der agas perthyans hwi a wayn agas enev.

²⁰‘Mes pan welowgh Yerusalem settys a-dro gans luyow, ena hwi a woer hi dhe vos difeythys yn skon.

²¹Ena fies dhe'n menydhyow myns a vo yn Yudi; ha dienkes myns a vo ynni, ha na entres ynni myns a vo y'n pow,

²²rag hemm yw dydhyow a gessydhyans, pan vydh kowlwrys pup-tra a veu skrifys.

²³Go-i an re yw gans flogh y'n dorr, ha neb a re an vronn y'n dydhyow na! Rag anken meur a dheu war an nor, ha sorr war an bobel ma;

²⁴i a goedh dre vin an kledha hag a vydh kemmerys yn keth dhe oll an kenedhlow, ha Yerusalem a vydh trettys yn-dann dreys an Jentilys, bys pan vo termynyow an Jentilys kowlwrys.

²⁵‘Hag y fydh toknys y'n howl ha'n loer ha'n ster, ha war an nor angoes dhe'n kenedhlow, fienasow drefenn tarenna an mor ha'n tonnow.

²⁶Tus a glamder rag own, ha gwaytyans a'n taklow a hwyrvydh war an nor; rag nerthow an nevow a vydh kryghyllys.

²⁷Hag ena i a wel Mab an den ow tos yn kommolenn gans nerth ha golewder meur.

²⁸Mes pan dhalleth an taklow ma, sevewgh yn-bann ha drehevewgh agas penn, rag agas daspren yw ogas.’

²⁹Hag ev a dherivas parabolenn dhedha: ‘Mirewgh orth an figbrenn, ha'n gwydh oll;

³⁰kettell dhelyons, hwi agas honan a wel hag a woer hav dhe vos ogas lemmyn.

³¹Yndella hwi ynwedh; pan welowgh an taklow ma gwrys, hwi a woer gwlaskor Duw dhe vos ogas.

³²Yn hwir y lavarav dhywgh, ny dremen an henedh ma dhe-ves, erna vo oll an taklow ma gwrys.

³³Nev ha nor a dremen dhe-ves, mes ow geryow vy, ny dremenons dhe-ves.

³⁴‘Bedhewgh war, ma na vo agas kolonn nevra beghys gans diwessa, na medhwynsi na fienasow bewnans, ha na wrello an jydh dos warnowgh yn tromm

³⁵avel maglenn; rag ev a dheu war bubonan eus trigys war enep oll an nor.

³⁶Bedhewgh hewoel pup-prys, ow pysi may fo dhywgh nerth dhe fia dhiworth pup-tra eus ow tegynsiwa, ha dhe sevel a-rag Mab an den.’

³⁷Dydhweyth yth esa ev y'n tempel ow tyski, hag yn nos ev a wre mos yn-mes ha godriga y'n vre henwys an menydh Oliv.

³⁸Hag oll an bobel a dho dhodho y'n tempel myttin a-varr, dhe woslowes orto.