Read Kernewek Luk 22 Bible Online

Luk 22 - Kernewek bible

Luk 22

¹Lemmyn goel an bara heb goell, henwys pask, esa ow tos nes.

²Hag yth esa an bennoferysi ha'n skribys ow hwilas fatell allens y dhistrui, rag own a's tevo a'n bobel.

³Ena Satnas a entras yn Yudas, henwys Skaryoth, onan a niver an dewdhek;

⁴hag ev eth hag omgusulya gans an bennoferysi ha'n withysi fatell y'n daskorra dhedha.

⁵Ha lowen ens i, hag i a omgemmeras ri dhodho mona.

⁶Hag ev a assentyas, hag yth esa ow hwilas prys gwiw dh'y dhaskorr dhedha, heb bos routh ena.

⁷Ena y teuth dydh an bara heb goell, pan o res sakrifia an pask;

⁸hag ev a dhannvonas Peder ha Yowann yn-kerdh ow leverel, ‘Kewgh dhe bareusi dhyn an pask, rag ma'n dyppryn.’

⁹Yn-medhons dhodho, ‘Ple fynnydh ni dhe bareusi?’

¹⁰Yn-medh ev dhedha, ‘Otta, pan ewgh a-ji dhe'n sita, den a'gas dyerbynn ow toen pycher a dhowr; gwra y siwya bys y'n chi mayth ello,

¹¹ha leverewgh dhe vester an chi, “An Mester a lever dhywgh, ‘Ple'ma'n westva, le may typpriv an pask gans ow dyskyblon?’ ”

¹²Hag ev a dhiskwa dhywgh stevell veur y'n soler, taklys: pareusiwgh ena.’

¹³Hag i eth yn-kerdh ha kavoes pup-tra poran dell lavarsa dhedha, hag i a bareusis an pask.

¹⁴Ha pan dheuth an eur, ev a esedhas orth an voes, ha'y abesteli ganso.

¹⁵Hag ev a leveris dhedha, ‘My re yeunis yn feur dybri an pask ma genowgh, kyns my dhe wodhav;

¹⁶rag my a lever dhywgh, ny wrav y dhybri arta[88] erna vo kollenwys yn gwlaskor Duw.’

¹⁷Ena ev a gemmeras hanaf, hag a rassas, ha leverel, ‘Kemmerewgh hemma ha'y ranna yntredhowgh;

¹⁸rag yn-medhav dhywgh, ny evav alemma rag a frut an gwinbrenn erna dheffo gwlaskor Duw.’

¹⁹Ena ev a gemmeras bara, hag a rassas ha'y derri ha'y ri dhedha, ow leverel, ‘Hemm yw ow horf yw res a-barth dhywgh; gwrewgh hemma yn kovadh ahanav vy.’

²⁰Hag yn keth vaner an hanaf wosa i dhe dhybri, ow leverel, ‘An hanaf ma yw an kevambos nowydh y'm goes vy, yw skoellys a-barth dhywgh.

²¹Mes mirewgh, yma leuv an den a'm trayt genev orth an voes.

²²Rag devri Mab an den a yn-rag dell veu ordenys, mes go-ev an den na, dredho mayth yw traytys.’

²³Hag i a dhallathas dadhla an eyl gans y gila piw anedha a vynna gul hemma.

²⁴Dadhel ynwedh a sordyas yntredha, piw anedha a vedha moyha.

²⁵Yn-medh ev dhedha, ‘Y hwra Myghternedh an kenedhlow lordya warnedha; ha'n re a's teves awtorita warnedha yw henwys masoberoryon.

²⁶Hwi ny vydhowgh yndella; mes bedhes an brassa yntredhowgh kepar ha'n yowynka, ha'n gwalader kepar ha neb a serv.

²⁷Rag piw yw moyha, ev neb a esedh orth an voes po ev neb a serv? A nyns yw, ev neb a esedh orth an voes? Mes yth esov vy yn agas mysk kepar ha neb a serv.

²⁸‘Hwi yw neb a besyas bos genev y'm prevyansow;

²⁹ha my a apoynt dhywgh gwlaskor, kepar dell y's apoyntyas ow Thas dhymmo vy,

³⁰may typprowgh hag eva orth ow moes y'm gwlaskor, hag esedha war dronyow, ow breusi dewdhek loeth Ysrael.’

³¹Hag yn-medh an Arloedh, ‘Simon, Simon, otta Satnas re hwilas agas kroedra kepar hag ys,

³²mes my re bysis ma na fyllo dha fydh; ha wosa ty dhe dreylya arta, fasta jy dha vreder.’

³³Mes yn-medh ev dhodho, ‘Arloedh, parys ov dhe vos genes dhe brison hag ynwedh dhe'n mernans.’

³⁴Yn-medh ev, ‘My a lever dhis, Peder, ny wra an kulyek kana hedhyw, kyns ty dhe dhenagha teyrgweyth y'm aswonnydh.’

³⁵Hag ev a leveris dhedha, ‘Pan y'gas dannvenis heb pors na skryp nag eskisyow, a fyllis dhywgh travyth?’ Yn-medhons i, ‘Travyth.’

³⁶Yn-medh ev dhedha, ‘Mes lemmyn, neb a'n jeves pors, gwres y gemmeres, hag y'n keth vaner skryp, ha neb na'n jeves, gwerthes ev y vantell ha prena kledha.

³⁷Rag my a lever dhywgh, res yw an skryptor ma dhe vos kollenwys ynnov vy, “Ev a veu reknys yn mysk drogoberoryon”; hag yn hwir an pyth yw skrifys ahanav a dheu dhe geweras.’

³⁸Hag yn-medhons i, ‘Arloedh, awotta dew gledha omma.’ Mes yn-medh ev, ‘Lowr yw.’

³⁹Hag ow mos yn-mes, ev eth war-lergh y usadow dhe'n menydh Oliv, ha'y dhyskyblon ynwedh a'n holyas.

⁴⁰Ha pan dheuth dhe'n tyller yn-medh ev dhedha, ‘Pysiwgh ma na entrowgh yn temptyans.’

⁴¹Hag ev a omdennas dhiworta a-dro dhe hys towl-men, hag ow mos war benn-dewlin ev a bysi,

⁴²ow leverel, ‘A Das, mars yw dha volonjedh, dog an hanaf ma dhiworthiv; saw na vedhes gwrys ow bodh evy, mes dha vodh tejy.’

⁴³Hag el dhiworth nev a omdhiskwedhas dhodho, dh'y gonfortya.

⁴⁴Ha devedhys yn angoes ev a bysi moy ter; ha'y hwys a dheuth ha bos kepar ha bannaghow a woes ow troppya war an dor.[89]

⁴⁵Ha pan sevis dhiworth an pysadow, ev a dheuth dhe'n dhyskyblon ha'ga havoes ow koska drefenn galar,

⁴⁶hag yn-medh ev dhedha, ‘Prag y koskowgh? Sevewgh yn-bann ha pysiwgh, ma na entrowgh yn temptyans.’

⁴⁷Hag ev hwath ow kewsel, awotta routh, hag yth esa ow mos a-ragdha an den henwys Yudas, onan a'n dewdhek; hag ev a dheuth nes dhe Yesu dhe amma dhodho.

⁴⁸Hag yn-medh Yesu dhodho, ‘Yudas, yw gans amm y traytydh Mab an den?’

⁴⁹Pan welas an re a-dro dhodho an pyth esa ow hwarvos, yn-medhons, ‘Arloedh, a wren ni gweskel gans kledha?’

⁵⁰Hag onan anedha a weskis kethwas an arghoferyas ha treghi dhe-ves y skovarn dhyghow.

⁵¹Mes Yesu a worthybis, ‘Namoy a henna!’ hag ev a dochyas skovarn an gwas ha'y sawya.

⁵²Hag yn-medh Yesu dhe'n bennoferysi ha gwithysi an tempel ha'n henavogyon neb a dheuth dhodho, ‘A dheuthewgh yn-mes kepar dell ve erbynn lader, gans kledhedhyow ha fustow?

⁵³Pub dydh yth esen vy genowgh y'n tempel, ha ny settsowgh dalghenn ynnov; mes hemm yw agas eur, ha nerth an tewlder.’

⁵⁴Wosa dalghenna ynno i a'n hembronkas ha'y dhri yn chi an arghoferyas; hag yth esa Peder ow siwya a-bell.

⁵⁵I a enowis tan yn kres an klos hag esedha war-barth, ha Peder o esedhys yn aga mysk.

⁵⁶Mes unn vaghteth a'n gwelas esedhys y'n golow ha mires gluw orto ha leverel, ‘Yth esa hemma ynwedh ganso.’

⁵⁷Mes ev a'n denaghas ow leverel, ‘Benyn, ny wrav vy y aswonn.’

⁵⁸Ha nebes a-wosa, nebonan arall a'n gwelas ha leverel, ‘Ty ynwedh yw onan anedha.’ Yn-medh Peder, ‘Ty dhen, nyns ov vy.’

⁵⁹Hag a-dro dhe unn our a-wosa, nebonan arall a afydhyas ow leverel, ‘Dhe wir, hemma ynwedh esa ganso, rag yma ev a Alile maga ta.’

⁶⁰Mes yn-medh Peder, ‘Ty dhen, ny wonn pandr'a gewsydh.’ Ha hware, hag ev hwath ow kewsel, an kulyek a ganas.

⁶¹Ha'n Arloedh a dreylyas ha mires orth Peder, ha Peder a borthas kov a lavar an Arloedh, fatell leveris dhodho, ‘Kyns an kulyek dhe gana hedhyw, ty a'm denagh teyrgweyth.’

⁶²Hag ev eth[90] yn-mes hag oela yn tynn.

⁶³An wer esa orth y witha a'n skornya ha'y gronkya,

⁶⁴hag i a gudhas y dhewlagas ha govynn orto ow leverel, ‘Gwra profoesa! Piw yw neb a'th weskis?’

⁶⁵Hag i a'n despityas ow leverel lies tra arall er y bynn.

⁶⁶Pan dheuth an jydh, konsel henavogyon an bobel a omguntellas, pennoferysi ha skribys, hag i a'n dros a-rag aga honsel

⁶⁷ow leverel, ‘Mars osta an Krist, lavar dhyn.’ Mes yn-medh ev dhedha, ‘Mar lavarav dhywgh, ny wrewgh krysi;

⁶⁸ha mar kovynnav, ny wrewgh gorthybi.[91]

⁶⁹Mes alemma rag Mab an den a vydh esedhys a'n barth dhyghow dhe alloes Duw.’

⁷⁰Hag i oll a leveris, ‘Osta ytho Mab Duw?’ Yn-medh ev dhedha, ‘Hwi a lever, ow bos evy.’

⁷¹Yn-medhons i, ‘Pana edhomm eus dhyn a dhustuni? Ni re'n klewas a'y anow y honan.’