Read Kernewek Luk 24 Bible Online

Luk 24 - Kernewek bible

Luk 24

¹Yn kynsa dydh an seythun, pan dardhas an bora, i a dheuth dhe'n bedh, ow toen an spisys a bareussens.

²Hag i a gavas an men rolys dhe-ves dhiworth an bedh;

³mes pan ethons ynno ny gavsons korf an Arloedh Yesu.

⁴Hag i hwath sowdhenys a-dro dhe henna, otta, dew wour a sevis rybdha yn dillas dewynnek.

⁵Own a's teva, hag i a blegyas aga fasow dhe'n dor. Hag i a leveris dhedha, ‘Prag y hwilowgh den bew yn mysk an re varow?

⁶Nyns usi ev omma, mes ev re beu drehevys. Perthewgh kov fatell gewsis dhywgh hag ev hwath yn Galile,

⁷ow leverel, bos res Mab an den dhe vos delivrys yn diwleuv peghadoryon ha dhe vos krowsys, ha dasserghi y'n tressa dydh.’

⁸Hag i a borthas kov a'y eryow.

⁹Hag i a dhehwelis dhiworth an bedh hag a dherivas oll an taklow ma dhe'n unnek ha dhe oll an re erell.

¹⁰Yth ens i Maria Magdalena, ha Yoanna, ha Maria mamm Jamys, ha'n benynes erell gansa. I a dherivas hemma dhe'n abesteli,

¹¹ha'ga geryow a heveli dhedha bos flows, ha ny gryssons dhedha.

¹²Mes Peder a sevis yn-bann ha poenya dhe'n bedh, hag ev a ynklinyas ha gweles an lystennow ow krowedha[97] a'ga honan; ena ev a dhehwelis tre, ha dhodho marth a'n pyth a hwarvia.

¹³Hag otta, yth esa dew anedha ow mos y'n keth jydh na dhe dre tri-ugens erowhys dhiworth Yerusalem, Emmaus y hanow,

¹⁴hag yth esens ow kewsel an eyl gans y gila a-dro dhe bup-tra a hwarvia.

¹⁵Hag y hwarva, pan esens ow keskewsel hag ow tadhla, Yesu y honan a dheuth nes ha kerdhes gansa,

¹⁶mes aga dewlagas o lettys, ma na allens y aswonn.

¹⁷Hag yn-medh ev dhedha, ‘Pandra yw an keskowsow ma usi genowgh an eyl gans y gila, ha hwi ow kerdhes, trist agas semlans?’[98]

¹⁸Hag onan anedha, henwys Kleopas, a worthybis ow leverel dhodho, ‘Osta jy an unn godriger yn Yerusalem neb na woer pandr'a hwarva ynni y'n dydhyow ma?’

¹⁹Hag yn-medh ev dhedha, ‘Pandra?’ Yn-medhons dhodho, ‘A-dro dhe Yesu a Nazareth, neb o profoes galloesek yn gweythres hag yn ger a-rag Duw hag oll an bobel,

²⁰ha fatell wrug agan pennoferysi ha'gan rewloryon y dhelivra dhe vos dampnys dhe'n mernans, hag i a'n krowssons.

²¹Mes ni a'gan bo govenek ev dhe vos neb a vedha ow tasprena Ysrael. Byttegyns gans henna oll, an tressa dydh yw lemmyn a-ban hwarva hemma.

²²Mes ynwedh neb benynes a'gan bagas a wrug dhyn kemmeres marth, neb a veu orth an bedh myttin a-varr,

²³ha pan na allsons kavoes y gorf, i a dheuth ha derivas i dhe weles gwelesigeth a eledh, neb a leveris ev dhe vos bew.

²⁴Ha re a'gan kowetha eth dhe'n bedh ha'y gavoes poran dell lavarsa an benynes, mes ev y honan ny welsons.’

²⁵Hag yn-medh ev dhedha, ‘A hwi dalsogh ha lent an golonn dhe grysi yn pup-tra a gewsis an brofoesi!

²⁶A nyns o res an Krist dhe wodhav an taklow ma hag entra yn y wolewder?’

²⁷Hag ow talleth gans Moyses hag oll an brofoesi ev a styryas dhedha pup-tra esa a-dro dhodho y honan yn oll an skryptors.

²⁸Pan dheuthons nes dhe'n dre mayth esens ow mos, ev a wrug kepar dell ve ow mos pella.

²⁹Mes i a ynnias warnodho ow leverel, ‘Trig genen, rag nammnag yw gorthugher, hag yma'n jydh lemmyn ow sedhi.’ Ytho ev eth a-ji dhe driga gansa.

³⁰Hag y hwarva, pan o ev esedhys gansa orth an voes, y kemmeras bara, ha benniga, ha terri, ha ri dhedha.

³¹Ha'ga dewlagas a veu igerys, hag i a'n aswonnis; hag ev eth yn-mes a'ga gwel.

³²Ena yn-medhons an eyl dh'y gila, ‘A nyns esa agan kolonn ow leski ynnon hag ev ow kewsel genen y'n fordh hag owth igeri an skryptors dhyn?’

³³Ytho i a sevis y'n keth eur na ha dehweles dhe Yerusalem, ha kavoes an unnek ha'n re esa gansa omguntellys war-barth,

³⁴ow leverel, ‘Yn hwir, an Arloedh yw drehevys hag ev re omdhiskwedhas dhe Simon!’

³⁵Hag i aga honan a dherivas pandr'a hwarva war an fordh, ha fatell veu ev aswonnys dhedha yn terri an bara.

³⁶Hag i hwath ow terivas hemma, ev a sevis yn aga mysk ha leverel dhedha, ‘Kres dhywgh hwi.’

³⁷Mes amovys ens ha dyegrys, hag i a dybi i dhe weles spyrys.

³⁸Hag yn-medh ev dhedha, ‘Prag yth owgh hwi troblys, ha prag y sev prederow yn agas kolonn?

³⁹Mirewgh orth ow diwleuv ha'm treys, my yw, ow honan. Gwrewgh ow thochya ha gweles, rag spyrys ny'n jeves kig hag eskern, dell welowgh bos dhymmo vy.’

⁴⁰Hag ow leverel hemma ev a dhiskwedhas dhedha y dhiwleuv ha'y dreys.

⁴¹Hag i hwath diskryjyk dre lowena ha marth, yn-medh ev dhedha, ‘Eus genowgh omma neppyth dhe dhybri?’

⁴²Hag i a ros dhodho tamm a bysk broylys;[99]

⁴³hag orth y gemmeres ev a'n dybris a-ragdha.

⁴⁴Hag yn-medh ev dhedha, ‘An re ma yw ow geryow a gewsis orthowgh ha my hwath genowgh, bos res pup-tra skrifys a-dro dhymm yn lagha Moyses hag y'n brofoesi hag y'n salmow dhe vos kollenwys.’

⁴⁵Ena ev a igeris aga brys dhe gonvedhes an skryptors.

⁴⁶Hag yn-medh ev dhedha, ‘Yndella yw skrifys, Krist dhe wodhav, ha dhe sevel dhiworth an re varow y'n tressa dydh;

⁴⁷hag edrega, ha dehwelyans peghosow,[100] dhe vos pregewthys yn y hanow ev dhe oll an kenedhlow, ow talleth dhiworth Yerusalem.

⁴⁸Hwi yw dustunioryon a'n taklow ma.

⁴⁹Hag otta, my a dhannvon dedhewadyow ow Thas warnowgh; mes hwi, gortewgh y'n sita bys pan vowgh gwiskys gans galloes dhiworth an ughelder.’

⁵⁰Ena ev a's hembronkas mes bys yn Bethani, hag ow trehevel y dhiwleuv ev a's bennigas.

⁵¹Ha pan esa orth aga benniga, ev a dhibarthas dhiworta hag y feu degys yn-bann dhe'n nev.

⁵²Hag i a'n wordhyas, hag ena dehweles dhe Yerusalem gans lowena veur;

⁵³hag yth ethons prest y'n tempel ow kordhya hag[101] ow penniga Duw.[102]