Read Kernewek Dewteronomi 15 Bible Online

Dewteronomi 15 - Kernewek bible

Dewteronomi 15

¹Dhe benn seyth blydhen y hwredh gevyans a gendon.

²Hemm yw gis an gevyans: pub kresysor a reless an kendon a ros dh'y gentrevek; ny arwask y gentrevek, y vroder, drefenn gevyans an ARLOEDH re beu gelwys.

³Ty a yll govynn talas dhiworth an estren, mes an pyth yw dhis gans dha vroder ty a wra y relessya.

⁴Mes ny vydh yntredhowgh boghosek, rag an ARLOEDH a'th vennik yn sur y'n tir a wra an ARLOEDH dha Dhuw y ri dhis avel eretons dh'y bewa,

⁵unnweyth mar koslowi gans rach orth lev an ARLOEDH dha Dhuw, ow kwitha hag ow kul oll an gorhemmynn ma esov ow korhemmynna dhis hedhyw.

⁶Rag an ARLOEDH dha Dhuw a'th vennik kepar dell gewsis dhis, ha ty a re war woestel dhe lies kenedhel ha ny jevisydh jy; ty a rewl lies kenedhel, mes ny wrons dha rewlya jy.

⁷Mars eus yntredhowgh boghosek a onan a'th vreder yn onan a'th yetys y'th tir a wra an ARLOEDH dha Dhuw y ri dhis, na galesha dha golonn ha na dhege dha leuv dhiworth dha vroder boghosek,

⁸mes igor dha leuv a-les dhodho ha ro prestenn hel dhodho lowr rag y edhomm, pynag a vo.

⁹Kemmer with na vo drokpreder y'th kolonn, ow leverel, ‘An seythves blydhen re dheuth nes, blydhen an gevyans’, ha rakhenna dha lagas a vydh drog erbynn dha vroder boghosek, ha ny redh dhodho; hag ev a elow er dha bynn war an ARLOEDH, hag y fydh peghes ynnos.

¹⁰Ty a re dhodho yn surredi, ha na vedhes dha golonn drok-pes pan redh dhodho; ena rag an dra ma, an ARLOEDH dha Dhuw a'th vennik yn oll dha ober hag yn pup-tra may hworrydh dha leuv warnodho.

¹¹Rag an boghosek ny hedh yn-mes a'n tir. Rakhenna my a worhemmynn dhis, ‘Igor dha leuv a-les dhe'th vroder, dhe'th edhommek ha dhe'th voghosek y'th tir.’

¹²Mars yw dha vroder Ebrow po benyn Ebrow gwerthys dhis, hag a'th serv hwegh blydhen, ena y'n seythves blydhen ty a'n dannvon dhiworthis rydh.

¹³Ha pan y'n dannvenydh dhiworthis rydh, ny'n dannvenydh dhe-ves gwag y dhiwla.

¹⁴Ty a brovi yn hel dhodho[9] dhiworth dha flokk, ha dhiworth dha leur-drushya, ha dhiworth dha winwask; dell wrug an ARLOEDH dha Dhuw dha venniga, yndella ty a re dhodho.

¹⁵Kovha y feus keth yn pow Ejyp, ha'n ARLOEDH dha Dhuw a'th tasprenas. Rakhenna yth esov ow korhemmynna dhis an dra ma hedhyw.

¹⁶Mes mar lever dhis, ‘Nyns av dhiworthis’, rag ev a'th kar, ty ha'th chi, drefenn bos yn ta dhodho genes,

¹⁷ena ty a gemmer mynowes ha'y worra der y skovarn bys y'n daras, hag ev a vydh keth dhis bys vykken. Ha rag dha vaghteth ynwedh ty a wra yndella.

¹⁸Ny vydh kales y'th wel pan y'n dannvenydh dhiworthis rydh, rag ev a'th servyas hwegh blydhen, ha dhodho dewblek an dalvosogeth a arvethesik. Ena an ARLOEDH dha Dhuw a'th vennik yn pup-tra a wredh.

¹⁹Pub kynsa-genys gorow a vo genys y'th gre hag y'th flokk ty a saker dhe'n ARLOEDH dha Dhuw. Ny wonedhydh gans kynsa-genys dha oghen, na knyvyas kynsa-genys dha flokk.

²⁰Ty a'n deber a-rag an ARLOEDH dha Dhuw blydhen wosa blydhen y'n tyller a wra an ARLOEDH y dhewis, ty ha'th teylu.

²¹Mars eus ynno namm, mars yw evredhek po dall, po neb drog namm arall, ny wredh y sakrifia dhe'n ARLOEDH dha Dhuw.

²²Ty a'n deber a-berth y'th yetys. An den avlan ha'n den glan keffrys a yll y dhybri, kepar ha pan ve ewik po karow.

²³Saw y woes ny dhybrydh; ty a'n dinwa war an gweres avel dowr.