Read Kernewek Dewteronomi 16 Bible Online

Dewteronomi 16 - Kernewek bible

Dewteronomi 16

¹Gwith mis Abib, ha gwra pask dhe'n ARLOEDH dha Dhuw, rag yn mis Abib an ARLOEDH dha Dhuw a'th tros mes a bow Ejyp d'wor' an nos.

²Sakrifi pask dhe'n ARLOEDH dha Dhuw dhiworth an deves po an chatel y'n tyller a wra an ARLOEDH y dhewis dhe wul dh'y hanow triga ena.

³Na dheber ganso travyth gans goell ynno. Seyth dydh ty a dheber bara heb goell, bara galar, rag ty a dheuth yn-mes a bow Ejyp yn unn fyski, rag may perthi kov a'n jydh may teuthys yn-mes a bow Ejyp, oll dydhyow dha vewnans.

⁴Na vedhes gwelys genes goell vytholl yn oll dha oryon seyth dydh. Na vedhes gesys dres nos travyth a'n kig a sakrifiydh orth gorthugher an kynsa dydh, bys y'n myttin.

⁵Ny yllydh sakrifia an pask a-berth yn onan a'th yetys a wra an ARLOEDH dha Dhuw aga ri dhis,

⁶marnas an tyller a wra an ARLOEDH dha Dhuw y dhewis dhe wul dh'y hanow triga ynno. Ena ty a sakrifi an pask gorthugherweyth, pan sedh an howl, y'n termyn may teuthys yn-mes a Ejyp.

⁷Ty a wra y gegina ha'y dhybri y'n tyller a wra an ARLOEDH dha Dhuw y dhewis; ha ternos vyttin ty a dhehwel dhe'th tyldow.

⁸Hwegh dydh y tybrydh bara heb goell; hag y'n seythves dydh y fydh kuntelles solem dhe'n ARLOEDH dha Dhuw. Na wra ober vyth ynno.

⁹Seyth seythun y niverydh dhis; dalleth nivera seyth seythun dhiworth dalleth termyn gorra an gromman war an ys.

¹⁰Ena ty a wra dy'goel an seythunyow dhe'n ARLOEDH dha Dhuw der offrynn bolonjedhek a'th leuv, kepar dell wrug an ARLOEDH dha Dhuw dha venniga.

¹¹Ty a lowenha a-rag an ARLOEDH dha Dhuw, ty, ha'th vab, ha'th vyrgh, ha'th was, ha'th vaghteth, ha'n Levyas usi y'th yetys, ha'n alyon, ha'n omdhivas, ha'n wedhwes usi yntredhowgh y'n tyller a wra an ARLOEDH dha Dhuw y dhewis, dhe wul dh'y hanow triga ena.

¹²Porth kov y feus keth yn Ejyp, ha gwayt gul an ordenansow ma.

¹³Ty a wra goel an skovvaow seyth dydh wosa kuntell dhiworth dha leur-drushya ha'th winwask.

¹⁴Lowenha y'th ty'goel, ty ha'th vab, ha'th vyrgh, ha'th was, ha'th vaghteth, ha'n Levyas, ha'n alyon, ha'n omdhivas, ha'n wedhwes usi y'th yetys.

¹⁵Seyth dydh y solempnydh goel dhe'n ARLOEDH dha Dhuw y'n tyller a wra an ARLOEDH y dhewis; rag an ARLOEDH dha Dhuw a wra dha venniga yn oll dha askorr hag yn pub ober a'th leuv, ytho ty a lowenha devri.

¹⁶Teyrgweyth y'n vlydhen pub gorreydh ahanowgh a vydh gwelys a-rag an ARLOEDH dha Dhuw y'n tyller a wra y dhewis: yn goel an bara heb goell, yn dy'goel an seythunyow, hag yn goel an skovvaow; ha ny vydh gwelys a-rag an ARLOEDH gwag y leuv.

¹⁷Pub gour a dhre ro kepar dell yll, war-lergh bennath an ARLOEDH dha Dhuw a ros dhis.

¹⁸Ty a re breusysi ha soedhogyon yn oll dha yetys a wra an ARLOEDH dha Dhuw aga ri dhis, dre dha loethow; hag i a vreus an bobel gans gwirvreus.

¹⁹Na gammdreyl breus, na bleg dhe fas neb den, na gemmer falswober, rag falswober a dhall dewlagas an re fur ha treylya geryow an re wiryon.

²⁰Ewnder — siw ewnder, rag may fewi, hag erita an tir a wra an ARLOEDH dha Dhuw y ri dhis.

²¹Na blans ragos gwydhenn vyth avel Ashera ryb alter an ARLOEDH dha Dhuw a wredh ragos.

²²Na dhrehav ragos peulven — neppyth a wra an ARLOEDH dha Dhuw y hasa.