Read Kernewek Dewteronomi 19 Bible Online

Dewteronomi 19 - Kernewek bible

Dewteronomi 19

¹Pan wra an ARLOEDH dha Dhuw treghi dhe-ves an kenedhlow may hwra an ARLOEDH dha Dhuw ri dhis aga thiredh, ha ty a gemmer aga eretons, ha triga yn aga threvow ha'ga chiow,

²ty a dhiberth ragos teyr thre yn mysk dha diredh, a wra an ARLOEDH dha Dhuw y ri dhis dh'y erita.

³Ty a bareus an fordh dhedha ragos, ha ranna yn teyr rann dha diredh a wra an ARLOEDH dha Dhuw y ri dhis dhe erita, rag may fio di pub ladher.

⁴Hemm yw an rewl rag an ladher neb a fi bys di rag may fewo, neb a weskis y gentrevek dre wall ha neb na'n kasas kyns:

⁵an den neb a ello gans y gentrevek y'n goeswik dhe dreghi prenn, hag ev a worr y leuv war an voel dhe dreghi an prenn ha'n penn hernyek a dheu ha bos distag dhiworth an dornla prennek ha kavoes y gentrevek hag ev a verow ev a fi dhe onan a'n trevow ma, ha bewa;

⁶ma na helghyo or an goes war-lergh an ladher yn gwres y sorr, ha dos bys dhodho wortiwedh, drefenn hirder an fordh, ha'y ladha kyn na dhervynnas an mernans, rag na'n kasas kyns.

⁷Rakhenna my a worhemmynn dhis, ow leverel: Teyr thre a dhiberthowgh ragos.

⁸Mar moghha an ARLOEDH dha Dhuw dha oryon kepar dell dos dhe'th tasow, ha ri dhis oll an tir a ambosas ri dhe'th tasow,

⁹mar kwithydh oll an gorhemmynn ma esov ow korhemmynna dhis hedhyw, orth y wul, dhe gara an ARLOEDH dha Dhuw, dhe gerdhes yn y fordhow pup-prys; ena ty a geworr ragos ken teyr thre war an teyr ma,

¹⁰ma na vo goes gwiryon skoellys y'th tir a wra an ARLOEDH dha Dhuw y ri dhis avel eretons, ha ty dhe vos kablus a skoellya goes.

¹¹Mes mar kwra gour kasa y gentrevek, ha'y gontrewaytya ha sevel er y bynn ha'y weskel may farwo, hag ev a fi dhe onan a'n trevow ma,

¹²ena henavogyon y dre a'n kemmer alena, ha'y ri yn leuv dialor an goes, may farwo.

¹³Na gemmeres dha lagas pita anodho, mes karth kabel an goes gwiryon dhiworth Ysrael, may fo yn ta dhis.

¹⁴Na dhile orven dha gentrevek, a wrug dha ragresegydhyon y'th eretons a eritydh y'n tir a wra an ARLOEDH dha Dhuw y ri dhis dh'y bewa.

¹⁵Ny wra unn dhustunier sevel erbynn gour a-dro dhe neb kammweyth po neb pegh, yn pegh pynag a wrello. Dre dhustuni dew dhustunier po dre dhustuni tri dustunier an dra a sev.

¹⁶Mar sev fals dhustunier erbynn gour ha'y guhudha a gammwrians,

¹⁷an dhew wour, a's teves an gedrynn, a sev a-rag an ARLOEDH, a-rag an oferysi ha'n vreusysi a serv y'n dydhyow na.

¹⁸An vreusysi a hwither yn ta, hag otta mars yw fals an dustunier neb a dhustunias erbynn y vroder,

¹⁹ena y hwrewgh dhodho ev kepar dell vynnas gul dh'y vroder. Yndella ty a garth an drog a-dhiworthowgh.

²⁰An re erell a glew, ha perthi own, ha ny wrons arta kepar ha'n dra dhrog ma yntredhowgh.

²¹Na gemmeres dha lagas pita. Enev rag enev, lagas rag lagas, dans rag dans, leuv rag leuv, troes rag troes.