Read Kernewek Dewteronomi 21 Bible Online

Dewteronomi 21 - Kernewek bible

Dewteronomi 21

¹Mar kevir den ledhys y'n tir a wra an ARLOEDH dha Dhuw y ri dhis dh'y erita, a'y wrowedh y'n gwel, ha nyns yw godhvedhys piw a'n gweskis,

²ena dha henavogyon ha'th vreusysi a yn-mes ha musura an pellder dhe'n trevow usi a-dro dhe'n den ledhys,

³ha henavogyon an dre yw nessa dhe'n den ledhys a gemmer lejek na veu gorrys dhe lavur ha na dennas yn-dann yew.

⁴Henavogyon an dre na a dhre an lejek yn-nans dhe nans a dhowr ow resek na veu gonedhys na plynsys, ha terri ena konna an lejek y'n nans.

⁵Ha'n oferysi, mebyon Levi, a nes; rag an ARLOEDH dha Dhuw a wrug aga dewis dh'y servya ha dhe venniga yn hanow an ARLOEDH; ha gansa y fydh breusys pub kedrynn ha pub strekys.

⁶Ena oll henavogyon an dre na, yw nessa dhe'n den ledhys, a wolgh aga diwla dres an lejek may feu hy honna terrys y'n nans.

⁷Ena i a worthyp ha leverel, ‘Ny wrug agan diwla skoellya an goes ma, na ny'n gwelas agan dewlagas.

⁸Gwra dehwelyans rag dha bobel Ysrael a dhasprensys, ARLOEDH, ha na ro kabel an goes gwiryon yn mysk dha bobel Ysrael.’ Hag y fydh dehwelyans a'n goes ragdha.

⁹Yndella ty a garth kabel an goes gwiryon dhiworthis, pan wredh an pyth yw ewn a-wel dhe'n ARLOEDH.

¹⁰Pan edh yn-mes dhe werrya erbynn dha eskerens, ha'n ARLOEDH dha Dhuw a's re y'th leuv, ha ty a's kemmer yn kethyon,

¹¹ha ty a wel yn mysk an gethyon benyn teg hy semlans, ha ty a wra hy hara ha'y hemmeres avel dha wreg,

¹²ena ty a's dre a-bervedh y'th chi, ha hi a dregh gols hy fenn ha dyghtya hy ewines.

¹³Hi a dhiwisk a-dhiwarnedhi dillas hy hethneth ha triga y'th chi ha kyni rag hy thas ha'y mamm unn mis kowal, hag a-wosa ty a dheu dhedhi ha'y demmedhi ha hi a vydh dha wreg.

¹⁴Mar nyns osta pes da anedhi, ena gwra hy dannvon plepynag a vynno; na werth hi mann a vona, na wra hy dyghtya avel kethes, rag ty re's uvelhas.

¹⁵Mars eus dhe wour diw wreg, onan gerys, ha'y ben skonys, hag i a dhineyth dhodho mebyon, an wreg yw kerys ha'n wreg yw kesys, ha'n kynsa-genys yw mab an wreg yw kesys,

¹⁶y'n jydh may re ev aga eretons dh'y vebyon, ny yll gul mab an wreg yw kerys an kynsa-genys yn le mab an wreg yw kesys;

¹⁷mes ev a aswonn an kynsa-genys, mab an wreg skonys, ow ri dhodho rann dhewblek a bup-tra eus dhodho, rag ev dhe vos kynsa frut y nerth gourel; dhodho gwir an kynsa-genys.

¹⁸Mara'n jeffo gour mab gorth ha diwostydh, neb na woslow lev y das na lev y vamm, ha pan y'n kessydhyons ny woslow orta,

¹⁹ena y das ha'y vamm a sett dalghenn ynno ha'y dhri dhe-ves dhe henavogyon y dre, dhe yetys y dyller.

²⁰Yn-medhons dhe henavogyon y dre, ‘Agan mab ma yw gorth ha diwostydh. Ny woslow agan lev; diswar yw, ha penn-medhow.’

²¹Ena oll gwer y dre a'n labydh gans meyn, may farwo. Yndella ty a garth an drog a-dhiworthowgh, hag oll Ysrael a glew, ha perthi own.

²²Mars eus yn gour pegh a dhervynn an mernans, hag ev yw gorrys dhe'n mernans, ha ty a'n kreg war wydhenn,

²³na vedhes gesys y gorf dre nos war an wydhenn, mes ty a'n ynkleudh an keth jydh na, rag milligys gans Duw yw den kregys; ma na dhefolli dha dir a wra an ARLOEDH dha Dhuw y ri dhis avel eretons.