Read Kernewek Dewteronomi 22 Bible Online

Dewteronomi 22 - Kernewek bible

Dewteronomi 22

¹Na vir orth ojyon dha vroder po y oen ow mos yn stray, hag omgudha ragdha; gwra aga daskorr dhe'th vroder.

²Mar nyns yw dha vroder kar-ogas dhis po ny'n aswonnydh, doro an best dhe'th chi, hag y fydh genes bys pan wra dha vroder y hwilas; ena ty a'n daskorr dhodho.

³Ty a wra yn kepar maner rag y asen, hag ynwedh rag y vantell, ha rag pup-tra arall kellys gans dha vroder, a wredh y gavoes; ny yllydh omgudha.

⁴Na wel asen dha vroder po y ojyon koedhys y'n fordh hag omgudha ragdha; gweres e orth aga drehevel.

⁵Na wiskes benyn dillas gour, ha gour na wiskes mantell benyn, drefenn kasadow dhe'n ARLOEDH yw pubonan a wra henna.

⁶Mars eus kevys a-ragos y'n fordh neyth edhen, yn neb gwydhenn po war an dor, ydhnigow po oyow, ha'n vamm owth esedha war an ydhnigow po war an oyow, na gemmer an vamm gans an re yowynk.

⁷Dannvon dhe-ves an vamm, mes kemmer an re yowynk, rag may fo yn ta dhis, ha may fo hir dha dhydhyow.

⁸Pan dhrehevydh chi nowydh, y hwredh fos-witha rag dha do, ma na worrydh goes y'th chi mar koedh nebonan dhiworto.

⁹Na blans y'th winlann diw eghenn, ken pup-tra a vydh sakrys[12] — an has a hessys hag askorr an winlann.

¹⁰Na ar gans ojyon hag asen war-barth.

¹¹Na wisk kweth kemmyskys a wlan ha lien war-barth.

¹²Ty a wra kribellow war beswar korn dha dhillas a wiskydh.

¹³Mar kemmer gour gwreg, ha mos a-bervedh dhedhi, hag ena hy skonya,

¹⁴ha'y huhudha a wannober, ha ri dhedhi drog hanow, ow leverel, ‘My a gemmeras an venyn ma ha mos a-bervedh dhedhi, ha ny gevis ynni toknys gwyrghses’,

¹⁵ena gwres tas an vyrgh ha'y mamm kemmeres ha dri yn-mes toknys gwyrghses an vyrgh dhe henavogyon an dre y'n yet.

¹⁶Tas an vyrgh a lever dhe'n henavogyon, ‘My a ros ow myrgh dhe'n gour ma avel gwreg, hag ev a's skonyas.

¹⁷Hag otta, ev a's kuhudhas a wannober, ow leverel, “Ny gemmeris toknys gwyrghses dha vyrgh”, mes ottomma toknys gwyrghses ow myrgh.’ Ena i a les an gweth a-rag henavogyon an dre,

¹⁸ha henavogyon an dre na a gemmer an gour ha'y gessydhya.

¹⁹I a'n spal a shekel arghans, ha'ga ri dhe das an vyrgh, drefenn ev dhe ri drog hanow a-dro dhe wyrghes a Ysrael. Hi a vydh gwreg dhodho; ny yll hy didhemmedhi oll y dhydhyow.

²⁰Mes mars yw an dra gwir, ha ny veu kevys toknys gwyrghses an vyrgh,

²¹ena i a dhre an vyrgh yn-mes dhe dharas chi hy thas, ha gwer hy thre a's labydh gans meyn may farwo, drefenn hi dhe wul outray yn Ysrael, ow pos hora yn chi hy thas. Yndella ty a garth an drog a-dhiworthowgh.

²²Mars yw gour kevys ow krowedha gans benyn yw demmedhys gans gorti, ytho an dhew a verow, an gour ow krowedha gans an venyn, ha'n venyn. Yndella ty a garth an drog dhiworth Ysrael.

²³Mars eus myrgh yw gwyrghes ambosys dhe wour, ha gour arall a's kyv y'n dre ha growedha gensi,

²⁴hwi a's dre aga dew dhe yet an dre na, ha'ga labydha gans meyn may farwons, an vyrgh drefenn na armas y'n dre, ha'n gour drefenn ev dhe uvelhe gwreg y gentrevek. Yndella ty a garth an drog a-dhiworthowgh.

²⁵Mes mars eus y'n gwel may tyerbynn an gour an vyrgh ambosys, ha'n gour a's dalghenn ha growedha gensi, ny verow saw unnsel an gour a wrowedhas gensi.

²⁶Mes dhe'n vyrgh na wra travyth; nyns eus y'n vyrgh pegh a dhervynn an mernans, rag kepar ha pan sev gour erbynn y gentrevek ha'y ladha, yndella yw an dra ma;

²⁷rag ev a's kavas y'n gwel, ha'n vyrgh ambosys a armas, ha ny veu denvyth dh'y sawya.

²⁸Mar kyv gour myrgh yw gwyrghes nag yw ambosys ha'y sesya ha growedha gensi, ha diskudhys yns,

²⁹an gour neb a wrowedhas gensi a re dhe das an vyrgh hanter-kans shekel arghans. Hi a vydh gwreg dhodho, rag ev a's uvelhas; ny yll hy didhemmedhi oll y dhydhyow.

³⁰Na gemmeres gour gwreg y das; ha na dhiskudhes lostenn y das.[13]