Read Kernewek Dewteronomi 23 Bible Online

Dewteronomi 23 - Kernewek bible

Dewteronomi 23

¹Neb yw brewys y dhiwgell, po treghys y galgh ny enter a-ji dhe guntelles an ARLOEDH.

²Ny enter bastard a-ji dhe guntellyans an ARLOEDH, hwath bys y'n degves henedh ny enter y dhiyskynnysi a-ji dhe guntellyans an ARLOEDH.

³Naneyl Ammonyas na Moabyas ny enter a-ji dhe guntelles an ARLOEDH; hwath bys y'n degves henedh ny enter aga diyskynnysi a-ji dhe guntelles an ARLOEDH bys vykken,

⁴drefenn na'gas metsons gans bara ha gans dowr y'n fordh pan dheuthewgh yn-mes a Ejyp, hag arveth er dha bynn Balaam mab Beor dhiworth Pethor yn Aram Naharaym dhe'th vollethi.

⁵(Byttegyns, ny vynnas an ARLOEDH dha Dhuw goslowes orth Balaam ha'n ARLOEDH dha Dhuw a dreylyas an volleth dhe vos bennath ragos, rag an ARLOEDH dha Dhuw dhe'th kara.)

⁶Na hwila aga kres nag aga siwena oll dha dhydhyow bys vykken.

⁷Na aborr Edomyas, drefenn ev dhe vos dha vroder. Na aborr den a Ejyp, rag ty a veu alyon yn y bow.

⁸Fleghes genys dhedha y'n tressa henedh — aga diyskynnysi a yll dos a-ji dhe guntelles an ARLOEDH.

⁹Pan edh yn-mes dhe gampya erbynn dha eskerens, omwith rag pup-tra drog.

¹⁰Mars eus yntredhowgh gour nag yw glan drefenn hwarvedhyans nosweyth, ena yth a dhe neb le a-ves a'n gamp; ny dheu a-bervedh y'n kamp;

¹¹mes pan dheu an gorthugher, ev a omwolgh yn dowr; ha pan sedh an howl ev a dheu a-bervedh y'n kamp.

¹²Ty a' fydh privedhyow a-ves dhe'n kamp, le may hylli mos,

¹³hag y fydh lo-balas y'th taffar, ha pan esedhydh a-ves, ty a bal toll gensi; ena treyl a-dro ha kudh dha gawgh.

¹⁴Rag an ARLOEDH dha Dhuw a gerdh yn mysk dha gamp dhe'th sawya ha dhe dhelivra dha eskerens a-ragos. Dha gamp a vydh sans, ma na wello ynnos travyth anwiw, ha treylya a-dhiworthis.

¹⁵Na dhelirv keth dh'y vester, neb a dhienkas dhis dhiworth y vester.

¹⁶Ev a yll triga yntredhowgh, y'n tyller a dhewis, yn onan a'th yetys yw da ganso, ha ny wredh y arwaska.

¹⁷Na vedhes hora-tempel a vyrghes Ysrael, na hora-tempel gorow a vebyon Ysrael.

¹⁸Na dhro gober hora, na arveth ki, a-bervedh yn chi an ARLOEDH dha Dhuw rag ambos vyth, rag pyth kasadow dhe'n ARLOEDH yw aga dew.

¹⁹Na brest dhe'th vroder ow kovynn oker: oker arghans, oker boes, oker a dravyth arall yw prestys ow kovynn oker.

²⁰Dhe'n estren ty a yll presta ow kovynn oker, mes dhiworth dha vroder na wovynn oker, rag ma'th vennikko an ARLOEDH dha Dhuw yn pup-tra may hworrydh dha leuv warnodho y'n tir esos ow tos bys di dh'y erita.

²¹Pan ambosydh ambos dhe'n ARLOEDH dha Dhuw, na wra delatya an termyn dh'y gollenwel: drefenn an ARLOEDH dha Dhuw a'n hwila dhiworthis yn surredi, hag y fydh dhis pegh.

²²Mes mars omwithydh rag ambosa, ny vydh dhis pegh.

²³An pyth a dheu yn-mes a'th tiwweus, henna a withydh ha'y wul, kepar hag offrynn bolonjedhek a ambossys dhe'n ARLOEDH dha Dhuw, hag a gewsis gans dha anow.

²⁴Pan dheudh yn gwinlann dha gentrevek, ty a yll dybri dha walgh a rappys, kemmys a vynnydh; mes na wra aga gorra y'th lester.

²⁵Pan dheudh yn ysek dha gentrevek ty a yll terri pennow-ys y'th leuv, mes na worr kromman war ys dha gentrevek.