Read Kernewek Dewteronomi 24 Bible Online

Dewteronomi 24 - Kernewek bible

Dewteronomi 24

¹Pan wra gour kemmeres gwreg ha'y demmedhi, ha mar ny gyv hi gras yn y wolok drefenn ev dhe gavoes ynni neppyth anwiw, hag ena ev a skrif rygdhi skrifenn didhemmedhyans ha'y worra yn hy leuv, ha'y dannvon dhiworth y ji,

²ha hi, wosa mos dhiworth y ji, a dheu ha bos gwreg dhe wour arall;

³ha mar kwra an diwettha gour hy hasa ha skrifa rygdhi skrifenn didhemmedhyans ha'y gorra yn hy leuv, ha'y dannvon dhiworth y ji; po mar merow an diwettha gour a's kemmeras avel gwreg,

⁴ena hy hynsa gour neb a's dannvonas dhe-ves ny yll hy hemmeres dhodho arta avel gwreg wosa hy bos defolys. Henna a via pyth kasadow a-rag an ARLOEDH. Na dhro pegh war an tir a wra an ARLOEDH dha Dhuw y ri dhis avel eretons.

⁵Pan wra gour kemmeres gwreg nowydh, nyns a yn-mes dhe'n lu, ha ny vydh gorrys warnodho charj vytholl; ev a vydh rydh yn y ji unn vlydhen, hag ev a vydh lowen gans y wreg neb a's kemmeras.

⁶Den ny gemmer melin avel arwoestel, na men-melin gwartha, drefenn ev dhe gemmeres avel goestel an bewnans a wour.

⁷Mars eus gour kevys ow tenladra onan a'y vreder, mebyon Ysrael, ha'y dhyghtya avel kethwas ha'y wertha, ena an lader na a verow. Yndella ty a garth an drog a-dhiworthowgh.

⁸Yn termyn plag a lovryjyon, gwayt gul gans rach pup-tra a wra an oferysi leviek y dhyski dhis; dell worhemmynnis dhedha, yndella gwayt y wul.

⁹Porth kov a'n pyth a wrug an ARLOEDH dha Dhuw dhe Miryam y'n fordh pan dheuthewgh yn-mes a Ejyp.

¹⁰Pan brestydh neppyth dhe'th kentrevek, na dheus a-bervedh yn y ji dhe gemmeres y woestel.

¹¹Ty a sev a-ves, ha'n gour neb a brestsys dhodho a dhre an goestel dhe-ves dhis.

¹²Mars yw ev gour boghosek, na wrowedh dhe gosk, ha'n goestel hwath genes.

¹³Daskorr dhodho an goestel pan sedh an howl rag may kosko yn y vantell ha'th vennikka, hag y fydh ewnder dhis a-rag an ARLOEDH dha Dhuw.

¹⁴Na arwask arvethesik neb yw boghosek hag edhommek, onan a'th vreder po a'th alyons eus y'th tir a-ji dhe'th yetys.

¹⁵Ro dhodho y arveth y'n keth jydh ma'n dendilas, kyns es an howl dhe sedhi warnodho, rag boghosek yw, ha'y vewnans a greg warnodho; ken ev a elow war an ARLOEDH er dha bynn, hag y fydh peghes ynnos.

¹⁶Ny vydh tasow gorrys dhe'n vernans rag mebyon, ha ny vydh mebyon gorrys dhe'n mernans rag tasow. Peub a vydh gorrys dhe'n mernans rag y beghes y honan.

¹⁷Na gammdreyl breus dhiworth alyon nag omdhivas, ha na gemmer dillas gwedhwes avel goestel.

¹⁸Porth kov dha vos keth yn Ejyp, ha'n ARLOEDH dha Dhuw a'th tasprenas alena; rakhenna my a worhemmynn dhis gul an dra ma.

¹⁹Pan vysydh dha drevas y'th wel, hag ankevi manal y'n gwel, na dhehwel dh'y hemmeres; hi a vydh dhe'n alyon, dhe'n omdhivas ha dhe'n wedhwes, rag ma'th vennikko an ARLOEDH dha Dhuw yn oll ober dha dhiwleuv.

²⁰Pan weskydh dha olewbrennyer, na guntell frut nessa gweyth; y fydh dhe'n alyon ha dhe'n omdhivas ha dhe'n wedhwes.

²¹Pan guntellydh grappys dha winlann, na guntell nessa gweyth; y fydh dhe'n alyon ha dhe'n omdhivas ha dhe'n wedhwes.

²²Porth kov dha vos keth yn pow Ejyp; rakhenna my a worhemmynn dhis gul an dra ma.