Read Kernewek Dewteronomi 26 Bible Online

Dewteronomi 26 - Kernewek bible

Dewteronomi 26

¹Pan dheudh dhe'n tir a wra an ARLOEDH dha Dhuw y ri dhis avel eretons ha ty a'n erit, ha triga ynno,

²ty a gemmer neppyth a'n kynsa a oll frut an tir a dhredh mes a'th tir a wra an ARLOEDH dha Dhuw y ri dhis ha'y worra yn kanstell, ha mos dhe'n tyller a wra an ARLOEDH dha Dhuw y dhewis dhe wul dh'y hanow triga ena,

³ha dos dhe'n oferyas a serv y'n dydhyow na, ha leverel dhodho, ‘My a dhiskler hedhyw dhe'n ARLOEDH dha Dhuw, devedhys ov dhe'n tir a wrug an ARLOEDH ti dh'agan tasow y ri dhyn.’

⁴An oferyas a gemmer an ganstell dhiworth dha leuv ha'y settya a-rag alter an ARLOEDH dha Dhuw.

⁵Ena ty a worthyp ha leverel a-rag an ARLOEDH dha Dhuw, ‘Aramean gwandrek o ow thas, hag ev eth yn-nans dhe Ejyp ha godriga ena gans boghes tus hag ena mos ha bos kenedhel vras, krev ha niverus.

⁶Mes an Ejyptianys a'gan tebeldhyghtyas ha'gan arwaska, ha gorra warnan lavur kales.

⁷Ena ni a grias war an ARLOEDH Duw agan tasow, ha'n ARLOEDH a glewas agan lev ha gweles agan galar, ha'gan trobel, ha'gan arwask.

⁸Ytho an ARLOEDH a'gan dros mes a Ejyp gans dorn grev ha bregh ystynnys, gans own bras, ha gans arwoedhyow, ha gans marthusyon;

⁹hag ev a'gan dros dhe'n tyller ma, ha ri dhyn an tir ma, tir a dhinwa leth ha mel;

¹⁰ha lemmyn otta, my re dhros kynsa frut an tir a wrussys y ri dhymm, A ARLOEDH.’ Ena ty a wra y settya a-rag an ARLOEDH dha Dhuw ha plegya dhe'n dor a-rag an ARLOEDH dha Dhuw.

¹¹Ha ty a lowenha yn pup-tra da re ros dhis an ARLOEDH dha Dhuw, ha dhe'th chi, ty ha'n Levyas ha'n alyon usi yn agas mysk.

¹²Wosa kowlwul degevi pub dega a'th askorr y'n tressa blydhen, blydhen an dega, ena ty a re dhe'n Levyas, dhe'n alyon, dhe'n omdhivas ha dhe'n wedhwes, may tepprons y'th yetys ha bos gwalghys.

¹³Ena ty a lever a-rag an ARLOEDH dha Dhuw, ‘My re removas an dra sans dhiworth an chi, hag ynwedh my re'n ros dhe'n Levyas ha dhe'n alyon, dhe'n omdhivas ha dhe'n wedhwes herwydh oll dha worhemmynn a worhemmynnsys dhymm. Ny dremenis dres dha worhemmynnow na'ga ankevi.

¹⁴Ny dhybris dhiworto pan esen ow kyni, na remova travyth anodho pan en vy avlan, na ri travyth anodho dhe dhen marow. My re woslowas lev an ARLOEDH ow Duw ha gul war-lergh pup-tra a worhemmynnsys dhymm.

¹⁵Mir war-woeles yn-mes a'th trigva sans dhiworth nev ha bennik dha bobel Ysrael ha'n tir re resys dhyn kepar dell desys dh'agan tasow, tir a dhinwa leth ha mel.’

¹⁶Hedhyw an ARLOEDH dha Dhuw a worhemmynn dhis gul an ordenansow ma ha'n breusow; gwayt aga gul gans oll dha golonn ha gans oll dha enev.

¹⁷Re dhisklersys hedhyw an ARLOEDH dhe vos dha Dhuw, ha ty dhe gerdhes yn y fordhow, ha gwitha y ordenansow ha'y worhemmynnow ha'y vreusow, ha goslowes orth y lev.

¹⁸Ha'n ARLOEDH re dhiskleryas hedhyw ty dhe vos dhodho pobel arbennik dhodho y honan kepar dell gewsis dhis, ha ty dhe witha oll y worhemmynnow;

¹⁹ytho ev a'th sett ughel a-ugh oll an kenedhlow a wrug, rag gormel, rag hanow, rag enor, rag may fi pobel sans dhe'n ARLOEDH dha Dhuw kepar dell gewsis.