Read Kernewek Dewteronomi 27 Bible Online

Dewteronomi 27 - Kernewek bible

Dewteronomi 27

¹Moyses ha henavogyon Ysrael a worhemmynnis dhe'n bobel, ow leverel: Gwith oll an gorhemmynn esov orth y worhemmynna dhywgh hedhyw.

²Hag y'n jydh may treusowgh an Yordan dhe'n tir a wra an ARLOEDH dha Dhuw y ri dhis, ty a dhrehav ragos menhiryon bras, ha'ga flastra gans lim.

³Skrif warnedha oll geryow an lagha ma pan dreusydh, rag may tyffi dhe'n tir a wra an ARLOEDH dha Dhuw y ri dhis, tir a dhinwa leth ha mel, kepar dell gewsis ARLOEDH Duw dha dasow orthis.

⁴Pan dreusowgh an Yordan, drehevewgh an menhiryon ma a wrav vy gorhemmynna dhywgh hedhyw war venydh Ebal, ha'ga flastra gans lim,

⁵ha drehav ena alter dhe'n ARLOEDH dha Dhuw, alter meyn. Na wra devnydh a doulys horn warnedha.

⁶Gans meyn dien y trehevydh alter ARLOEDH dha Dhuw, hag offrynna warnodho offrynnow leskys dhe'n ARLOEDH dha Dhuw.

⁷Ha ty a sakrifi offrynnow kres ha'ga dybri ena ha lowenhe a-rag an ARLOEDH dha Dhuw.

⁸Ha skrif war an veyn oll geryow an lagha ma, yn pur gler.

⁹Ena Moyses ha'n oferysi leviek a gewsis dhe oll Ysrael, ow leverel: Taw ha goslow, A Ysrael. Hedhyw ty re dheuth ha bos pobel dhe'n ARLOEDH dha Dhuw.

¹⁰Rakhenna goslow orth lev an ARLOEDH dha Dhuw ha gul y worhemmynnow ha'y ordenansow esov ow korhemmynna dhis hedhyw.

¹¹Ha Moyses a worhemmynnis dhe'n bobel an jydh na, ow leverel:

¹²An re ma a sev dhe venniga an bobel war venydh Gerizim wosa hwi dhe dreusi an Yordan: Simeon, ha Levi, ha Yuda, hag Yssakar, ha Yosep, ha Benyamin.

¹³Ha'n re ma a sev rag an volleth war venydh Ebal: Rewben, Gad hag Asher ha Zebulun, Dan ha Naftali.

¹⁴An Levysi a worthyp, ow leverel dhe bub gour a Ysrael gans lev ughel:

¹⁵‘Mollothek yw an gour neb a wra imaj gravys po imaj teudh, tra gasadow dhe'n ARLOEDH, ober diwleuv krefter, ha neb a'n sett yn-bann yn-dann gel.’ Ena oll an bobel a worthyp ow leverel, ‘Amen.’

¹⁶‘Mollothek yw ev neb a dhispres y das ha'y vamm.’ Ena oll an bobel a lever, ‘Amen.’

¹⁷‘Mollothek yw ev neb a remov orven y gentrevek.’ Ena oll an bobel a lever, ‘Amen.’

¹⁸‘Mollothek yw ev neb a gammled den dall y'n fordh.’ Ena oll an bobel a lever, ‘Amen.’

¹⁹‘Mollothek yw ev neb a dreyl dhe-ves gwirvreus dhiworth an alyon, an omdhivas, ha'n wedhwes.’ Ena oll an bobel a lever, ‘Amen.’

²⁰‘Mollothek yw ev neb a wrowedh gans gwreg y das, drefenn ev re dhiskudhas lostenn y das.’ Ena oll an bobel a lever, ‘Amen.’

²¹‘Mollothek yw ev neb a wrowedh gans best pynag a vo.’ Ena oll an bobel a lever, ‘Amen.’

²²‘Mollothek yw ev neb a wrowedh gans y hwoer, myrgh y das, po myrgh y vamm.’ Ena oll an bobel a lever, ‘Amen.’

²³‘Mollothek yw ev neb a wrowedh gans y hweger.’ Ena oll an bobel a lever, ‘Amen.’

²⁴‘Mollothek yw ev neb a ladh y gentrevek yn-dann gel.’ Ena oll an bobel a lever, ‘Amen.’

²⁵‘Mollothek yw ev neb a gemmer falswober dhe skoella goes gwiryon.’ Ena oll an bobel a lever, ‘Amen.’

²⁶‘Mollothek yw ev neb na venten geryow an lagha ma orth aga gul.’ Ena oll an bobel a lever, ‘Amen.’