Read Kernewek Dewteronomi 28 Bible Online

Dewteronomi 28 - Kernewek bible

Dewteronomi 28

¹Mar koslewydh devri lev an ARLOEDH dha Dhuw ha gwaytyas gul oll y worhemmynnow esov orth aga worhemmynna dhis hedhyw, ena an ARLOEDH dha Dhuw a'th sett ughel a-ugh oll kenedhlow an norvys.

²Hag oll an bennathow ma a dheu warnas ha tremena dresos, mar koslewydh lev an ARLOEDH dha Dhuw.

³Bennigys vydhydh y'n dre, ha bennigys vydhydh y'n gwel.

⁴Bennigys vydh frut dha gorf, frut dha dir, ha frut dha jatel, leughi dha vughes, hag eyn dha flokk.

⁵Bennigys vydh dha ganstell ha'th new-toesa.

⁶Bennigys vydhydh pan dheudh a-ji, ha bennigys vydhydh pan edh yn-mes.

⁷An ARLOEDH a wra dhe'th eskerens, a sev er dha bynn, bos gweskys a-ragos. Yth ons mes er dha bynn yn unn fordh ha fia yn seyth fordh a-ragos.

⁸An ARLOEDH a worhemmynn an vennath warnas ha war dha skiberyow ha war bup-tra may hworrydh dha leuv warnodho; hag ev a'th vennik y'n tir a wra an ARLOEDH dha Dhuw y ri dhis.

⁹An ARLOEDH a wra dha fastya dhe vos pobel sans dhodho y honan kepar dell dos dhis, mar kwithydh gorhemmynnow an ARLOEDH dha Dhuw ha kerdhes yn y fordhow.

¹⁰Ena oll kenedhlow an norvys a wel ty dhe vos gelwys gans hanow an ARLOEDH; hag i a berth own ahanas.

¹¹An ARLOEDH a'th wra dhe siweni yn frut dha gorf, yn frut dha jatel, yn frut dha dir war an tir a dos an ARLOEDH dhe'th tasow y ri dhis.

¹²An ARLOEDH a iger y dresorva dha, an nevow, dhe ri glaw dhe'th tir yn y seson ha dhe venniga oll an ober a'th leuv; ty a brest dhe lies kenedhel mes ty, ny gevydh prestenn.

¹³An ARLOEDH a'th wra dhe vos an penn a-der an lost; y fydhydh unnsel a-wartha, ha ny vydhydh a-woeles, mar koslewydh gorhemmynnow an ARLOEDH dha Dhuw esov orth dha worhemmynna hedhyw, dh'aga gwitha ha dh'aga gul.

¹⁴Na dreyl a-denewen dhiworth oll an geryow esov ow korhemmynna dhis hedhyw, dyghow na kledh, dhe gerdhes war-lergh duwow erell dh'aga servya.

¹⁵Mes mar ny woslowydh orth lev an ARLOEDH dha Dhuw, ow kwitha hag ow kul oll y worhemmynnow ha'y ordenansow esov orth aga gorhemmynna dhis hedhyw, ena y tons warnas oll an mollothow ma, hag i a dremen dresos.

¹⁶Mollothek vydhydh y'n dre, ha mollothek vydhydh y'n gwel.

¹⁷Mollothek vydh dha ganstell ha'th new-toesa.

¹⁸Mollothek vydh frut dha gorf ha frut dha dir, leughi dha jatel, hag eyn dha flokk.

¹⁹Mollothek vydhydh pan dheudh a-ji, ha mollothek vydhydh pan edh yn-mes.

²⁰An ARLOEDH a dhannvon warnas molleth, ha skruth, ha keredh yn pup-tra may hworrydh dha leuv warnodho bys pan vydhydh distruys, ha bys pan edh dhe goll yn tromm, drefenn droktra dha wryth, orth ow forsakya.

²¹An ARLOEDH a wra dhe'n plag glena orthis bys ma'th tileas dhiwar an tir mayth esos ow tos di dh'y erita.

²²An ARLOEDH a'th wysk gans kleves gwastya, ha gans terthenn, ha gans fevyr, ha gans brewvann, ha gans an kledha ha gans kleves losk ha kleves melynheans y'n ys, hag i a'th helgh bys pan vydhydh diswrys.

²³Dha ebron a-ugh dha benn a vydh brons, ha'n dor yn-dannos a vydh horn.

²⁴An ARLOEDH a dreyl glaw dha dir dhe bolter ha doust; dhiworth an ebron y tiyskynn warnas bys pan vydhydh distruys.

²⁵An ARLOEDH a wra dhis bos fethys gans dha eskerens. Yth edh yn-mes er y bynn yn unn fordh ha fia yn seyth fordh a-ragdho, ha ty a vydh euth dhe oll kenedhlow an norvys.

²⁶Dha gorf a vydh boes rag pub edhen a'n ebron ha rag bestes an gwel, ha ny vydh nagonan dh'aga chasya dhe-ves.

²⁷An ARLOEDH a'th wysk gans bryghi Ejyp, ha gans hwedhow, ha gans krevennow, ha dre'n debron, ma na yllydh bos yaghhes.

²⁸An ARLOEDH a'th wysk gans muskogneth, gans dellni, ha gans sowdhan a vrys.

²⁹Ty a vydh ow palvala yn hanter-dydh, kepar dell balval an dall y'n tewolgow; ny wredh dhe'th fordhow siweni; devri y fydhydh arweskys ha ledrys, ha ny wra nagonan dha sawya.

³⁰Ty a vydh ambosys dhe venyn, ha gour arall a's defol; ty a dhrehav chi, mes ny drigydh ynno; ty a blans gwinlann, mes ny wredh devnydh anedhi.

³¹Dha ojyon a vydh ledhys a-wel dhis, mes ny dhybrydh dhiworto; dha asen a vydh kemmerys dhiworthis dre nerth ha ny vydh daskorrys dhis; dha dheves a vydh res dhe'th eskerens ha ny vydh dhis nagonan dh'aga sawya.

³²Dha vebyon ha'th vyrghes a vydh res dhe bobel arall; dha dhewlagas a vir gans hireth ragdha oll an jydh, mes ny' fydh nerth y'th leuv.

³³Pobel na aswonnsys a dheber frut dha dir hag oll askorr dha lavur, ha ny vydhydh saw arweskys ha tebeldhyghtys oll dha dhydhyow.

³⁴Ty a vydh gorboellek gans an pyth a wra dha lagas y weles.

³⁵An ARLOEDH a'th wysk gans drog vryghi y'th tewlin ha'th tiwarr ma na yllydh bos yaghhes dhiworta, a wodhen dha droes bys y'th krogen.

³⁶An ARLOEDH a'th tro, ty ha'n myghtern re settsys warnas dha honan, dhe genedhel na aswonnsys, naneyl ty na'th tasow, hag ena ty a serv duwow erell a brenn hag a ven.

³⁷Ty a vydh an acheson a euth, ha parabolenn, ha ges yn oll an poblow may hwra an ARLOEDH dha ledya bys di.

³⁸Ty a dheg yn-mes dhe'n gwel meur a has ha kuntell boghes, drefenn an lokust dh'y dhevorya.

³⁹Ty a blans gwinlannow ha gonedha, mes ny evydh gwin na guntell grappys, drefenn an pryv dh'aga dybri.

⁴⁰Ty a' fydh olewbrennyer yn oll dha oryon mes ny omuntydh dha honan drefenn dha olewennow dhe dhroppya.

⁴¹Ty a dhineyth mebyon ha myrghes, mes ny vydhons dhis, rag yth ons yn kethneth.

⁴²An gryll a erit oll dha gwydhennow ha frut dha dir.

⁴³An alyon usi trigys yntredhowgh a yskynn a-ughos moy ha moy ughel; ha ty a dhiyskynn moy ha moy isel.

⁴⁴Ev a re kendon dhis, mes ny redh kendon dhodho. Ev a dheu ha bos an penn, ha ty a dheu ha bos an lost.

⁴⁵Oll an mollothow ma a dheu warnas, ha'th pursiwya ha tremena dresos bys pan vydhydh distruys, rag ny woslewsys orth lev an ARLOEDH dha Dhuw ha gwitha y worhemmynnow ha'y ordenansow a worhemmynnis dhis.

⁴⁶I a vydh warnas avel arwoedh ha marth, ha war dha has bys vykken.

⁴⁷Drefenn na servsys an ARLOEDH dha Dhuw gans joy ha gans kolonn lowen rag lanwes a bup-tra oll,

⁴⁸ty a serv dha eskerens a wra an ARLOEDH dha Dhuw dannvon er dha bynn, yn nown, hag yn syghes, hag yn noethedh, hag yn esow a bup-tra oll; hag ev a worr yew a horn war dha gonna, bys may hwrello dha dhistrui.

⁴⁹An ARLOEDH a dhrehav er dha bynn kenedhel a bellder, dhiworth penn an norvys, mar skav dell nij an er yn-nans, kenedhel ma na gonvedhydh hy thaves,

⁵⁰kenedhel a fas fers, na wra enor dhe'n henavek ha na vydh grassyes dhe'n yowynk;

⁵¹hag ev a dheber leughi dha vestes hag askorr dha dir bys may hwrello dha dhistrui; ny as ragos ys, gwin nag olew, leughi dha jatel nag eyn dha flokk bys may hwrello dha dhistrui.

⁵²Ev a omsett a-dro dhis yn oll dha yetys bys pan goettho dha fosow ughel ha kerys mayth esos ow trestya ynna der oll dha dir; hag ev a omsett a-dro dhis, yn oll dha yetys der oll dha dir, a ros an ARLOEDH dha Dhuw dhis.

⁵³Ena ty a dheber frut dha gorf dha honan, kig dha vebyon ha'th vyrghes a ros an ARLOEDH dha Dhuw dhis, drefenn an omsettyans stroeth may hwra dha eskar dha stroetha ganso.

⁵⁴An gour medhel yn agas mysk ha pur vleudh a dreyl erbynn y vreder, ha'y wreg ger, ha war remenant y vebyon a vydh gesys,

⁵⁵ma na re dhe nagonan anedha neppyth a gig y fleghes a wra eva aga dybri, rag nag eus travyth gesys dhodho, drefenn an omsettyans stroeth ma'th stroeth an eskar ganso yn oll dha yetys.

⁵⁶An benyn vedhel ha bleudh yn agas mysk neb na vedh gorra hy godhen war an dor drefenn medhelder ha bleudhder, a dreyl erbynn gour hy askra, ha'y mab, ha'y myrgh,

⁵⁷ha'y bryghenn a dheu yn-mes yntra hy treys ha war hy mebyon a dhineyth; rag hi a wra aga dybri yn esow a bup-tra oll yn-dann gel, y'n omsettyans stroeth may hwra dha eskar dha stroetha ganso y'th yetys.

⁵⁸Mar ny waytydh gul oll geryow an lagha ma yw skrifys y'n lyver ma, ow perthi own a'n hanow gloryus hag euthyk ma, an ARLOEDH dha Dhuw,

⁵⁹ena an ARLOEDH a dhre warnas plagys marthys, plagys bras hag a dhur, ha klevesow euthyk hag a dhur.

⁶⁰Ev a dhre warnas arta oll disesys Ejyp may perthsys own anedha; hag i a len orthis.

⁶¹Ynwedh an ARLOEDH a dhre warnas pub kleves ha pub plag nag yw skrifys yn lyver an lagha ma bys pan vi distruys.

⁶²Hwi a vydh gesys boghes agas niver, kynth ewgh kyns avel ster nev yn niver, drefenn na woslewsys lev an ARLOEDH dha Dhuw.

⁶³Kepar dell lowenhas an ARLOEDH yn agas kever dhe wul da dhywgh, ha dh'agas ynkressya, yndella an ARLOEDH a lowenha yn agas kever dh'agas diswul, ha dh'agas distrui. Hwi a vydh diwreydhys dhiwar an tir mayth esos ow tos di dh'y erita.

⁶⁴Ena an ARLOEDH a wra dha skattra yn mysk oll an poblow dhiworth unn penn a'n norvys bys y'n penn arall, hag ena ty a serv duwow erell neb na aswonnsys, naneyl ty na'th tasow, prenn ha men.

⁶⁵Hag yn mysk an kenedhlow ma ny' fydh powes, ha ny vydh powesva dhe wodhen dha droes. Ena an ARLOEDH a re dhis kolonn a gren, ha dewlagas a fyll, hag enev ydhil.

⁶⁶Dha vewnans a greg yn dout a-ragos, ha ty a gren mo ha myttin, ha ny' fydh surheans a'th vewnans.

⁶⁷Myttin ty a lever, ‘Unnweyth a pe gorthugher!’ ha gorthugher ty a lever, ‘Unnweyth a pe myttin!’ rag euth dha golonn a wredh y berthi, ha rag an taklow a wra dha dhewlagas aga gweles.

⁶⁸An ARLOEDH a'th tre arta dhe Ejyp yn gorholyon y'n fordh a leveris dhis na wres hy gweles nevra namoy; hag ena ty a as dha honan dhe vos gwerthys dhe'th eskerens avel kethyon ha kethesow mes denvyth ny wra agas prena.