Read Kernewek Dewteronomi 29 Bible Online

Dewteronomi 29 - Kernewek bible

Dewteronomi 29

¹An re ma yw geryow an kevambos a worhemmynnis an ARLOEDH dhe Moyses dh'y wul gans mebyon Ysrael yn pow Moab, dres an kevambos a wrug gansa orth Horeb.[14]

²Moyses a elwis dhe oll Ysrael ha leverel dhedha: Hwi re welsowgh pup-tra a wrug an ARLOEDH a-wel dhywgh yn pow Ejyp dhe Faro, ha dhe oll y servysi, ha dhe oll y bow,

³an provow bras a wrug dha dhewlagas aga gweles, an arwoedhyow, ha'n marthusyon bras na.

⁴Mes ny ros dhywgh an ARLOEDH kolonn dhe wodhvos, na dhewlagas dhe weles, na dhiwskovarn dhe glewes bys y'n jydh hedhyw.

⁵Dres dew-ugens blydhen my re'gas hembronkas y'n gwylvos; ny gothhas agas dillas warnowgh, ha ny gothhas dha sandal war dha droes.

⁶Ny wrussowgh dybri bara nag eva gwin na korev, rag may hwodhvowgh ow bos vy an ARLOEDH agas Duw.

⁷Pan dheuthewgh dhe'n tyller ma, Sihon myghtern Heshbon hag Og myghtern Bashan eth yn-mes dh'agan metya rag batel ha ni a's gweskis.

⁸Ni a gemmeras aga thir ha'y ri avel eretons rag an Rewbenysi, rag an Gadysi, ha rag hanter-loeth Manasse.

⁹Gwithewgh geryow an kevambos ma ha'ga gul, rag may siwennowgh yn pup-tra a wrewgh.

¹⁰Yth esowgh hwi oll ow sevel hedhyw a-rag an ARLOEDH agas Duw: agas pennow, agas loethow, agas henavogyon, ha'gas soedhogyon, pub gour a Ysrael,

¹¹agas fleghes, agas benynes, an alyon usi a-ji dhe'th kamp, dhiworth kuntellor dha geunys bys tenner dha dhowr,

¹²rag mayth entrowgh yn kevambos an ARLOEDH dha Dhuw hag yn y volleth usi an ARLOEDH dha Dhuw ow kul genes hedhyw,

¹³rag ma'th fastyo hedhyw avel y bobel, hag ev dhe vos Duw dhis, kepar dell gewsis dhis, ha kepar dell dos dhe'th tasow, dhe Abraham, dhe Ysak, ha dhe Yakob.

¹⁴Nyns yw unnsel genowgh hwi y hwrav vy an kevambos ma ha'n volleth ma,

¹⁵mes ganso ev neb usi ow sevel genen omma hedhyw a-rag an ARLOEDH agan Duw, hag ynwedh ganso ev nag usi omma genen hedhyw.

¹⁶Hwi a woer fatell esen ni trigys yn pow Ejyp ha fatell dremensyn der an kenedhlow a dremensowgh dredha.

¹⁷Hwi a welas aga thaklow kasadow ha'ga idolys, prenn ha men, arghans hag owr, esa gansa.

¹⁸Bedhewgh war ma na fo ynnowgh hwi gour po benyn po kordh po loeth may treyl y golonn hedhyw dhiworth an ARLOEDH agan Duw dhe gerdhes ha servya duwow an kenedhlow ma; ma na vo ynnowgh hwi gwreydhenn ow toen kegis ha fuelenn.

¹⁹Pan glew nebonan geryow an volleth ma, hag omvenniga yn y golonn, ow leverel, ‘Kres a vydh dhymm, kyn kerdhav yn gorthter ow holonn’, yndella ow tiswul an tir dowrhes war-barth gans an tir sygh,

²⁰an ARLOEDH ny vynn gava dhodho; ena sorr an ARLOEDH ha'y avi a dhyllo mog erbynn an gour na, hag oll an volleth yw skrifys y'n lyver ma a wrowedh warnodho, ha'n ARLOEDH a dhefend y hanow a-dhann nev.

²¹An ARLOEDH a'n diberth rag drog dhiworth oll loethow Ysrael, herwydh oll mollothow an kevambos usi skrifys y'n lyver ma a'n lagha.

²²Ena an diwettha henedh a'gas mebyon neb a sev war agas lergh, ha'n estren a dheu dhiworth pow pell, a wel plagys an tir na ha'n disesys a wrug an Arloedh aga dri warnodho.

²³Oll hy thir a vydh loskven ha hoelan, ynyal leskys; ny vydh has hesys, ha ny skyll travyth, ha ny dyv gwels vytholl ynno. Y fydh avel domhwelyans Sodom ha Gomorra, Adma ha Seboyim, a wrug an ARLOEDH aga domhwel yn y sorr hag yn y gonnar.

²⁴Oll an kenedhlow a lever, ‘Prag y hwrug an ARLOEDH yndella dhe'n tir ma? Pandr'a styr poethter an sorr bras ma?’

²⁵Hag y leverons, ‘Drefenn i dhe asa kevambos an ARLOEDH Duw a'ga thasow, a wrug gansa pan y's dros mes a bow Ejyp.

²⁶Rag yth ens ha servya duwow erell ha plegya dhe'n dor a-ragdha, na wrussons aga aswonn, ha na wrussa ev aga hevrenna dhedha.

²⁷Ytho sorr an ARLOEDH a dhewis erbynn an tir na, dhe dhri warnodho oll an mollothow usi skrifys y'n lyver ma.

²⁸An ARLOEDH a's diwreydhyas dhiworth aga thir yn sorr, hag yn konnar, hag yn koler bras, hag ev a's tewlis dhe dir arall, kepar hag y'n jydh hedhyw.’

²⁹An ARLOEDH agan Duw a bew an taklow kudhys, mes dhyn ni yma an taklow diskudhys, ha dh'agan mebyon bys vykken, rag may hwryllyn oll geryow an lagha ma.