Read Kernewek Dewteronomi 3 Bible Online

Dewteronomi 3 - Kernewek bible

Dewteronomi 3

¹Ena ni a dreylyas hag yskynna war an fordh dhe Bashan, hag Og myghtern Bashan a dheuth alena dh'agan metya, ev hag oll y bobel, rag batel orth Edrei.

²Ha'n ARLOEDH a leveris dhymm, ‘Na borth own anodho, rag my a'n re y'th leuv, hag oll y bobel ha'y dir. Ty a wra dhodho kepar dell wrussys dhe Sihon myghtern an Amorysi, trigys yn Heshbon.’

³Ytho an ARLOEDH agan Duw a ros yn agan leuv ynwedh Og myghtern Bashan hag oll y bobel. Ni a's gweskis, ma na veu denvyth gesys dhodho dhe skapya.

⁴Ni a gemmeras oll y drevow y'n tor' na. Nyns esa unn dre na's kemmersyn anedha: tri-ugens tre, oll ranndir Argob, gwlaskor Og yn Bashan.

⁵Oll an trevow ma a veu kerys gans fosow ughel, yetys ha barrys, ha dres henna fest lies tre heb fosow.

⁶Ni a's sakras dhe dhistruyans kepar dell wrussyn dhe Sihon myghtern Heshbon, ow tistrui pub tre, gwer, benynes, ha fleghes.

⁷Mes oll an chatel ha preydh an trevow y pyllsyn ragon agan honan.

⁸Ytho y'n tor' na ni a gemmeras an tir dhiworth leuv dew vyghtern an Amorysi usi dres an Yordan, dhiworth nans Arnon bys yn menydh Hermon

⁹(Sidonim a elow Hermon Siryon, ha'n Amorysi a'n gelow Senir),

¹⁰oll trevow an ughelgompesenn, oll Gilead, hag oll Bashan bys yn Salka hag Edrei, trevow ruvaneth Og yn Bashan.

¹¹Rag ny veu gesys saw unnsel Og myghtern Bashan dhiworth remenant an Refaim. Otta, y weli o gweli a horn: a nyns usi yn Rabbath a vebyon Ammon? Naw kevelin yw y hys ha peswar kevelin y les, war-lergh kevelin gour.

¹²Ha'n tir ma a eritsyn y'n tor' na, dhiworth Aroer, usi ryb nans Arnon, ha hanter menydh Gilead ha'y drevow: my a'n ros dhe'n Rewbenysi ha'n Gadysi;

¹³ha remenant Gilead hag oll Bashan, ruvaneth Og: my a'n ros dhe hanter-loeth Manasse. (Oll tiredh Argob, oll an rann na a Bashan, o henwys pow Refaim;

¹⁴Yair mab Manasse a gemmeras oll tiredh Argob bys yn ordir an Geshurysi ha'n Maakatysi, ha Bashan a veu henwys ganso Havvoth-yair war-lergh y hanow y honan, dell yw bys y'n jydh hedhyw.)

¹⁵Dhe Makir my a ros Gilead,

¹⁶ha dhe'n Rewbenysi ha'n Gadysi my a ros dhiworth Gilead bys y'n avon Arnon (kres an avon a veu an or) bys y'n avon Yabbok, or an Ammonysi;

¹⁷an Araba ha'n Yordan o or, dhiworth Kinnereth bys yn mor an Araba, yw Mor an Hoelan, yn-dann ledrow Pisga troha'n howldrevel.

¹⁸Ena my a worhemmynnis dhywgh y'n tor' na, ow leverel, ‘An ARLOEDH agas Duw re ros dhywgh an tir ma dh'y erita. Oll agas kasoryon, ervys rag batel, a wra mos a-dreus kyns agas breder, mebyon Ysrael.

¹⁹Saw agas benynes ha'gas fleghes, ha'gas chatel (my a woer bos genowgh meur a jatel) a drig yn agas trevow a res vy dhywgh,

²⁰bys pan re an ARLOEDH powes dh'agas breder, kepar dell ros dhywgh hwi, hag i ynwedh a erit an tir usi an ARLOEDH agas Duw ow ri dhedha dres an Yordan. Ena pubonan a dhehwel dh'y eretons re res dhywgh.’

²¹My a worhemmynnis dhe Yoshua y'n tor' na, ow leverel, ‘Dha dhewlagas re welas pup-tra a wrug an ARLOEDH agas Duw dhe'n dhew vyghtern ma. An ARLOEDH a wra an keth tra dhe oll an ruvanethow le may tremenydh ena.

²²Na berthewgh own anedha, drefenn an ARLOEDH agas Duw dhe vatalyas ragowgh.’

²³Y'n tor' na my a bysis favour dhiworth an ARLOEDH, ow leverel,

²⁴‘Arloedh DUW, ty re dhallathas diskwedhes dhe'th was dha veuredh ha dha dhorn grev; rag py duw eus yn nev hag yn nor neb a yll gul kepar ha'th wriansow ha'th oberow galloesek?

²⁵Gas vy dhe dreusi rag may hwelliv an tir da usi dres an Yordan, an menydh teg na, ha Lebanon.’

²⁶Mes an ARLOEDH a sorras orthiv a'gas govis, ha ny glewas dhymm, ha'n ARLOEDH a leveris dhymm, ‘Henn yw lowr! Na gows genev namoy a-dro dhe'n mater ma.

²⁷Yskynn bys y'n penn a Pisga, ha drehav dha dhewlagas dhe'n howlsedhes, ha'n kledh, ha'n dyghow, ha'n howldrevel, ha gwel gans dha dhewlagas; drefenn na dreusydh an Yordan ma.

²⁸Mes gorhemmynn dhe Yoshua ha'y grevhe ha'y nertha, drefenn ev dhe dreusi a-rag an bobel ma, hag ev a wra dhedha erita an tir a welydh jy.’

²⁹Ytho ni a drigas y'n nans a-dal Beth-peor.