Read Kernewek Dewteronomi 30 Bible Online

Dewteronomi 30 - Kernewek bible

Dewteronomi 30

¹Pan dheu oll an taklow ma warnas, an vennath ha'n mollothow a wrugavy aga settya a-ragos, ha ty a wra aga dri arta dhe'th kolonn yn oll an kenedhlow le may hwra an ARLOEDH dha Dhuw dha skattra dhi,

²ha ty a dhehwel dhe'n ARLOEDH dha Dhuw ha goslowes orth y lev war-lergh pup-tra mayth esov ow korhemmynna dhis hedhyw, ty ha'th vebyon gans oll dha golonn ha gans oll dha enev,

³ena an ARLOEDH dha Dhuw a wra restorita ragos ha kemmeres truedh ahanas ha'th kuntell arta dhiworth oll an poblow le may hwrug an ARLOEDH dha Dhuw dha skattra bys di.

⁴Mar pe re a'th tivresow skattrys bys amal nev, alena y hwra an ARLOEDH dha Dhuw dha guntell hag alena y hwra dha gemmeres.

⁵Ena an ARLOEDH dha Dhuw a'th tro dhe'n tir a wrug dha dasow y erita, ha ty a'n erit. Ev a wra da dhis, ha dha ynkressya moy ages dha dasow.

⁶An ARLOEDH dha Dhuw a drodregh dha golonn ha kolonn dha has dhe gara an ARLOEDH dha Dhuw gans oll dha golonn ha gans oll dha enev, rag may fewi.

⁷An ARLOEDH dha Dhuw a worr oll an mollothow ma war dha eskerens ha war an re a'th kas, neb a'th helghyas.

⁸Ha ty a woslow arta orth lev an ARLOEDH, ha gul oll y worhemmynnow mayth esov orth aga hworhemmynna dhis hedhyw.

⁹An ARLOEDH dha Dhuw a wra dhis siweni yn pub ober a'th leuv, yn frut dha gorf, yn frut dha jatel hag yn frut dha dir rag da; rag an ARLOEDH dha Dhuw a lowenha ynnos arta rag da, kepar dell lowenhas yn dha dasow,

¹⁰mar koslewydh lev an ARLOEDH dha Dhuw ha gwitha y worhemmynnow, ha'y ordenansow usi skrifys yn lyver an lagha ma, pan dreylydh arta dhe'n ARLOEDH dha Dhuw gans oll dha golonn ha gans oll dha enev.

¹¹Rag an gorhemmynn ma esov orth y worhemmynna dhis hedhyw nyns yw re gales ragos, na re bell.

¹²Nyns usi yn nev, rag may leverri, ‘Piw a yskynn ragon war-tu ha nev ha'y gemmeres ragon rag ma'n goslewyn, ha'y wul?’

¹³Ha nyns usi dres an mor, rag may leverri, ‘Piw a dremen dres an mor ragon ha'y gemmeres ragon, rag ma'n goslewyn, ha'y wul?’

¹⁴Rag yma an ger fest yn ogas dhis, yn dha anow hag yn dha golonn, rag y wul.

¹⁵Mir, my re worras a-ragos hedhyw bewnans ha da, mernans ha drog,

¹⁶ow korhemmynna dhis hedhyw kara an ARLOEDH dha Dhuw, dhe gerdhes yn y fordhow, dhe witha y worhemmynnow, ha'y ordenansow, ha'y vreusow, rag may fewi hag ynkressya; ha'n ARLOEDH dha Dhuw a'th vennik y'n tir mayth esos ow tos di dh'y erita.

¹⁷Mes mar treyl dha golonn dhe-ves, heb goslowes, ha ty a vydh dynys dhe blegya dhe'n dor a-rag duwow erell ha'ga servya,

¹⁸my a dhiskler dhywgh hedhyw y fydhowgh kellys glan; ny vydhowgh trigys dydhyow hir war an tir mayth esos ow tremena dres an Yordan dhe vos di dh'y erita.

¹⁹My a elow nev ha nor yn test er agas pynn hedhyw y hwrugavy settya a-ragos bewnans ha mernans, bennath ha molleth; ytho dewis bewnans rag may fewi, ty ha dha has,

²⁰ow kara an ARLOEDH dha Dhuw, hag ow koslowes y lev, hag ow klena orto; rag ev yw dha vewnans ha hirder dha dhydhyow, dhe driga war an tir a dos an ARLOEDH dhe'th tasow, dhe Abraham, ha dhe Ysak, ha dhe Yakob, dhe ri dhedha.