Read Kernewek Dewteronomi 31 Bible Online

Dewteronomi 31 - Kernewek bible

Dewteronomi 31

¹Ena Moyses eth ha kewsel an geryow ma dhe oll Ysrael.

²Yn-medh ev dhedha, ‘Hwegh-ugens bloedh ov vy hedhyw. Ny allav vy mos yn-mes po dos dhe-dre na fella; ha'n ARLOEDH a leveris dhymm, “Ny dreusydh an Yordan ma.”

³An ARLOEDH dha Dhuw y honan a dreus a-ragos. Ev a dhistru an kenedhlow ma a-ragos, ha ty a's erit. Yoshua, ev a dreus a-ragos kepar dell gewsis an ARLOEDH.

⁴Ha'n ARLOEDH a wra dhedha kepar dell wrug dhe Sihon ha dhe Og myghternedh an Amorysi, ha dh'aga thir, pan y's distruis.

⁵An ARLOEDH a's delirv a-ragowgh, ha hwi a wra dhedha war-lergh oll an gorhemmynn a worhemmynnis vy dhywgh.

⁶Bedhewgh krev, ha bedhewgh kolonnek, na berthewgh own nag euth a-ragdha, drefenn an ARLOEDH dha Dhuw, ev yth yw neb a gerdh genes; ny wra dha asa na'th forsakya.’

⁷Moyses a elwis Yoshua ha leverel dhodho a-wel dhe oll Ysrael, ‘Bydh krev ha bydh kolonnek; rag ty a dheu gans an bobel ma dhe'n tir a dos an ARLOEDH dh'aga thasow y ri dhedha, ha ty a wra dhedha y erita.

⁸An ARLOEDH dha Dhuw yth yw neb a gerdh a-ragos; ev a vydh genes, ny wra dha asa na'th forsakya; na borth own, ha na borth euth.’

⁹Ytho Moyses a skrifas an lagha ma, ha'y ri dhe'n oferysi leviek, degoryon argh kevambos an ARLOEDH, ha dhe oll henavogyon Ysrael.

¹⁰Ena Moyses a worhemmynnis dhedha, ow leverel, ‘Dhe benn pub seyth blydhen, orth an termyn ordenys yn blydhen an gevyans, yn goel an skovvaow,

¹¹pan dheu oll Ysrael dhe omdhiskwedhes a-rag an ARLOEDH dha Dhuw y'n tyller a dhewis, ty a lenn an lagha ma a-rag oll Ysrael yn aga klewans.

¹²Kuntell an bobel, an wer, ha'n benynes, ha'n fleghes, ha'n alyon usi y'th yetys, rag may klewvons ha rag may tyskons ha perthi own a'n ARLOEDH agas Duw ha gwaytyas gul oll geryow an lagha ma,

¹³ha rag may klewvo aga mebyon na's godhvons, ha dyski perthi own a'n ARLOEDH agas Duw hedre vowgh bew war an dor mayth esowgh ow treusi an Yordan dh'y erita.’

¹⁴Ena an ARLOEDH a leveris dhe Moyses, ‘Otta, an dydhyow a nes rag dha vernans. Galw Yoshua ha sevewgh orth tylda an kuntelles, ha my a re dhodho charj.’ Ytho Moyses ha Yoshua a sevis orth tylda an kuntelles.

¹⁵Ha'n ARLOEDH a omdhiskwedhas y'n tylda yn koloven a gommol, ha'n goloven a gommol a sevis orth daras an tylda.

¹⁶Ha'n ARLOEDH a leveris dhe Moyses, ‘Otta, ty a gosk gans dha dasow, ha'n bobel ma a dhrehav ha horya war-lergh duwow astranj an tir mayth ons dhi yn aga mysk. I a'm forsak ha terri ow hevambos a wrugavy gansa.

¹⁷Ow sorr a dheu warnedha y'n jydh na, ha my a's forsak, ha kudha ow fas dhiworta, hag i a vydh devorys. Lies drog hag ahwer i a's kyv, may leverons y'n jydh na, “A nyns yw rag nag usi agan Duw yn agan mysk, y teuth an drogow warnan?”

¹⁸My a gudh ow fas sertan y'n jydh na, drefenn oll an drog re wrussons, ow treylya dhe dhuwow erell.

¹⁹Ha lemmyn, skrifewgh ragowgh agas honan an gan ma, ha dysk hi dhe vebyon Ysrael, ha gorr hi yn aga ganow, rag may fo an gan ma test ragov erbynn mebyon Ysrael.

²⁰Rag wosa my dh'aga dri dhe'n tir a des dh'aga thasow, a dhinwa leth ha mel, hag i a dheber ha bos gwalghys, ha tew, ena i a dreyl dhe dhuwow erell ha'ga servya; i a'm dispres, ha terri ow hevambos.

²¹Ha pan wra lies drog hag ahwer aga havoes, an gan ma a worthyp yn test; rag ny vydh ankevys mes a anow aga henedh. My a woer mynnas aga brys usi dhedha hedhyw, hwath kyns my dh'aga dri dhe'n tir a wrugavy y di.’

²²Ytho Moyses a skrifas an gan ma y'n jydh na, ha'y dyski dhe vebyon Ysrael.

²³Ha'n ARLOEDH[15] a ros charj dhe Yoshua mab Nun, ow leverel, ‘Bydh krev ha bydh kolonnek, rag ty a dhre mebyon Ysrael dhe'n tir a des vy y ri dhedha; ha my a vydh genes.’

²⁴Pan gowlwrussa Moyses skrifa geryow an lagha ma yn lyver, bys yn aga diwedh,

²⁵ev a worhemmynnis dhe'n Levysi, degoryon argh kevambos an ARLOEDH, ow leverel,

²⁶‘Kemmerewgh an lyver ma a'n lagha ha'y settya ryb argh kevambos an ARLOEDH agas Duw, rag may fo eno yn test er dha bynn.

²⁷Rag my a woer fatell osta diwostydh ha kales dha gilbenn. Ha my hwath yn few genowgh hedhyw, hwi re beu diwostydh erbynn an ARLOEDH: pyseul dhe voy wosa ow mernans.

²⁸Kuntellewgh dhymm oll henavogyon agas loethow ha'gas soedhogyon, rag may kewssiv yn aga diwskovarn an geryow ma, ha gelwel nev ha nor yn test er aga fynn.

²⁹Rag my a woer, wosa ow mernans, hwi dhe omlegri yn sur, ha treylya dhiworth an fordh a worhemmynnis dhywgh; drog a wra agas metya y'n dydhyow diwettha, drefenn hwi dhe wul drog a-wel dhe'n ARLOEDH, dh'y serri der ober agas diwla.’

³⁰Ha Moyses a gewsis yn diwskovarn oll kuntellyans Ysrael geryow an gan ma bys yn a'ga diwedh: