Read Kernewek Dewteronomi 34 Bible Online

Dewteronomi 34 - Kernewek bible

Dewteronomi 34

¹Ena Moyses a yskynnas dhiworth plenys Moab dhe venydh Nebo, penn Pisga, usi a-dal Yeriko. Ha'n ARLOEDH a dhiskwedhas dhodho oll an tir, Gilead bys Dan,

²oll Naftali, ha tir Efraym, ha Manasse, hag oll pow Yuda bys yn mor an howlsedhes,

³an Negeb ha'n plen a-dro dhe nans Yeriko, sita an palmwydh, bys yn Soar.

⁴Ena an ARLOEDH a leveris dhodho, ‘Hemm yw an tir a des dhe Abraham, dhe Ysak, ha dhe Yakob, ow leverel, “My a'n re dhe'th has.” My re asas dhis y weles gans dha dhewlagas dha honan, mes ny dreusydh di.’

⁵Ytho Moyses, gwas an ARLOEDH a verwis ena yn pow Moab herwydh lavar an ARLOEDH.

⁶Ev[25] a'n ynkleudhyas y'n nans yn pow Moab, a-dal Beth-peor, mes denvyth ny woer tyller y vedh bys y'n jydh hedhyw.

⁷Ha Moyses o hwegh ugens bloedh pan verwis; ny veu y lagas gwannhes, ha ny veu y nerth lehes.

⁸Mebyon Ysrael a oelas rag Moyses yn plenys Moab deg dydh warn ugens; ena an dydhyow a oelva ha kynvann rag Moyses a veu kowlwrys.

⁹Ha Yoshua mab Nun o lenwys a'n spyrys a furneth, drefenn Moyses dhe worra y dhiwla warnodho; ytho mebyon Ysrael a woslowas orto ha gul kepar dell worhemmynnis an ARLOEDH dhe Moyses.

¹⁰Ha ny sevis profoes arta yn Ysrael avel Moyses, neb a wrug an ARLOEDH y aswonn fas orth fas,

¹¹yn oll an arwoedhyow ha marthusyon may hwrug an ARLOEDH y dhannvon dh'aga gul yn pow Ejyp dhe Faro, ha dhe oll y servysi, ha dhe oll y bow,

¹²ha rag oll an galloes meur hag oll an euth bras a dhispletyas Moyses a-wel dhe oll Ysrael.