Read Kernewek Dewteronomi 5 Bible Online

Dewteronomi 5 - Kernewek bible

Dewteronomi 5

¹Moyses a elwis dhe oll Ysrael ha leverel dhedha: Klew, A Ysrael, an ordenansow ha'n breusow esov ow kewsel yn agas diwskovarn hedhyw, rag ma's dyskowgh, ha'ga gwitha, ha'ga gul.

²An ARLOEDH agan Duw a wrug genen kevambos orth Horeb.

³Ny wrug an ARLOEDH an kevambos ma gans agan tasow, mes genen ni, ni neb usi omma hedhyw, ni oll yn few.

⁴Fas orth fas, an ARLOEDH a gewsis genowgh war an menydh yn-mes a gres an tan.

⁵Yth esen vy ow sevel ynter an ARLOEDH ha hwi y'n tor' na dhe dherivas dhywgh ger an ARLOEDH; rag hwi a gemmeras own a'n tan, ha ny yskynnsowgh dhe'n menydh. Ev a leveris,

⁶My yw an ARLOEDH dha Dhuw neb a'th tros yn-mes a bow Ejyp, yn-mes a'n chi a gethneth.

⁷Ny vydh dhis duwow erell a-ragov.

⁸Na wra dhis imaj gravys, an hevelep a dravyth eus yn nev a-vann nag yn nor a-woeles nag y'n dowr yn-dann an nor.

⁹Na omblek a-ragdha na'ga servya; rag my an ARLOEDH dha Dhuw yw Duw avius, ow tri hessydhyans kammweyth an tasow war an fleghes bys y'n tressa ha peswora henedh a'n re a'm kas,

¹⁰mes ow tiskwedhes tregeredh dhe vilyow anedha a'm kar hag a with ow gorhemmynnow.

¹¹Na gemmer hanow an ARLOEDH dha Dhuw yn euver, rag ny wra an ARLOEDH y asa heb kessydhyans neb a gemmer y hanow yn euver.

¹²Gwith dydh an sabot dh'y witha sans, dell worhemmynnis an ARLOEDH dha Dhuw dhis.

¹³Hwegh dydh y lavurydh ha gul oll dha ober;

¹⁴mes an seythves dydh yw sabot dhe'n ARLOEDH dha Dhuw; ynno ny wrewgh ober vyth, ty, na dha vab, na dha vyrgh, na dha was, na dha vaghteth, na dha ojyon, na dha asen, nag oll dha jatel, na'n alyon usi a-ji dhe'th yetys, rag may powesso dha was ha dha vaghteth avelos.

¹⁵Porth kov ty dhe vos keth yn pow Ejyp, ha'n ARLOEDH dha Dhuw a'th tros yn-mes alena dre leuv grev ha bregh ystynnys; rakhenna an ARLOEDH dha Dhuw a worhemmynnis dhis gwitha an sabot.

¹⁶Enor dha das ha dha vamm dell worhemmynnis an ARLOEDH dha Dhuw dhis, rag may fo dha dhydhyow hir, ha rag may fo yn ta dhis war an tir a wra an ARLOEDH dha Dhuw y ri dhis.

¹⁷Na volder.

¹⁸Na wra avoutri.

²⁰Na wra fals dhustuni erbynn dha gentrevek.

²¹Na hwans benyn dha gentrevek. Na yeun chi dha gentrevek, na'y wel, na'y was, na'y vaghteth, na'y ojyon, na'y asen, na travyth eus dhe'th kentrevek.

²²An ARLOEDH a gewsis an geryow ma dhe oll agas kuntellyans war an menydh yn-mes a gres an tan, an kommol ha'n tewolgow, dre lev ughel, ha ny geworras dhedha. Ena ev a's skrifas war dhiw leghenn a ven, ha'ga ri dhymm.

²³Pan glewsowgh an lev yn-mes a gres an tewolgow, ha'n menydh ow tewi gans tan, hwi a dheuth nes dhymm, oll pennow agas loethow ha'gas henavogyon.

²⁴Yn-medhowgh, ‘Awotta, an ARLOEDH agan Duw re dhiskwedhas dhyn y wolewder ha'y veuredh, ha ni re glewas y lev yn-mes a gres an tan. Hedhyw ni re welas Duw dhe gewsel gans den, hag ev a vew.

²⁵Lemmyn, prag y ferwyn? Rag an tan bras ma a'gan konsum; mar kwren ni pesya klewes lev an ARLOEDH agan Duw moy, ni a verow.

²⁶Rag piw eus a bub kig neb a glewas lev an Duw bew ow kewsel yn-mes a gres an tan avelon, ha bewa?

²⁷Ty ke nes, ha klew oll a lever an ARLOEDH agan Duw, ha ty a lever dhyn pup-tra a gews an ARLOEDH agan Duw dhis, ha ni a'n klew ha'y wul.’

²⁸An ARLOEDH a glewas son agas geryow pan gewssowgh dhymm, ha'n ARLOEDH a leveris dhymm, ‘My re glewas son geryow an bobel ma, a gowssons dhis; pup-tra a gowssons yw mas.

²⁹Unnweyth a pe dhedha kolonn a'n par ma, dhe berthi own ahanav vy, ha dhe witha oll ow gorhemmynnow pup-prys, rag may fo yn ta dhedha ha dh'aga mebyon bys vykken!

³⁰Ke, lavar dhedha, “Dehwel dh'agas tyldow.”

³¹Mes ty sav omma genev, may kowsav orthis oll an gorhemmynn, ha'n ordenansow ha'n breusow a dhyskydh dhedha, ma's kwrellons y'n tir a rov dhedha dh'y erita.’

³²Gwaytyewgh gul ytho kepar dell worhemmynnis dhywgh an ARLOEDH agas Duw; na dreylyewgh dhe'n dyghow na dhe'n kledh.

³³Kerdhewgh yn pub fordh a worhemmynnis an ARLOEDH agas Duw dhywgh, rag may fewowgh ha may fo yn ta dhywgh ha may fo agas dydhyow hir y'n tir a eritowgh.