Read Kernewek Dewteronomi 6 Bible Online

Dewteronomi 6 - Kernewek bible

Dewteronomi 6

¹Hemm yw an gorhemmynn ha'n ordenansow ha'n breusow a worhemmynnis an ARLOEDH agas Duw dhe dhyski dhywgh, dh'aga gul y'n tir mayth esowgh ow treusi di dh'y erita;

²rag may perthi own a'n ARLOEDH dha Dhuw, dhe witha oll y ordenansow ha'y worhemmynnow esov ow korhemmynna dhis oll dydhyow dha vewnans, ty, ha'th vab, ha mab dha vab, rag may fo hir dha dhydhyow.

³Klew, Ysrael, ha gwayt aga gul, rag may fo yn ta dhis, ha rag may kressyowgh yn feur, kepar dell gewsis dhis an ARLOEDH Duw dha dasow, yn tir a dhinwa leth ha mel.

⁴Klew, Ysrael: An ARLOEDH agan Duw, yw unn ARLOEDH;

⁵ty a gar an ARLOEDH dha Dhuw gans oll dha golonn, ha gans oll dha enev, ha gans oll dha nerth.

⁶Ha'n geryow ma esov ow korhemmynna dhis hedhyw a vydh war dha golonn;

⁷ha hwi a's daslever dhe'th vebyon ha kewsel anedha pan esedhydh y'th chi, ha pan gerdhydh y'n fordh, ha pan wrowedhydh, ha pan sevydh;

⁸ha ty a's kelm avel arwoedh war dha leuv, hag y fydhons soenelligow yntra dha dhewlagas.

⁹Ha ty a's skrif war bostow darasow dha ji, ha war dha yetys.

¹⁰Pan wra an ARLOEDH dha Dhuw dha dhri bys y'n tir a dos dhe'th tasow, dhe Abraham, dhe Ysak, ha dhe Yakob, dhe ri dhis trevow bras ha teg, na wrussys hwi aga drehevel,

¹¹ha chiow leun a bup-tra da, na wrussys hwi aga lenwel, ha puthow palyes, na wrussys hwi aga falas, ha gwinlannow hag olewbrennyer, na wrussys hwi aga flansa: ena pan dhybrydh ha bos gwalghys,

¹²kemmer with na ankeffi an ARLOEDH neb a'th tros yn-mes a bow Ejyp, dhiworth an chi a gethneth.

¹³Porth own a'n ARLOEDH dha Dhuw ha gwra y servya, ha ti re y hanow.

¹⁴Na gerdhewgh war-lergh duwow erell, dhiworth duwow an poblow usi a-dro dhywgh;

¹⁵(rag Duw avius yw an ARLOEDH dha Dhuw yn agas mysk), ma na dhewo sorr an ARLOEDH dha Dhuw er dha bynn ha'th tistrui a-dhiwar enep an tir.

¹⁶Na brevewgh an ARLOEDH agas Duw kepar dell y'n prevsowgh orth Massa.[3]

¹⁷Gwithewgh dour gorhemmynnow an ARLOEDH agas Duw, ha'y dhustuniow, ha'y ordenansow a worhemmynnis dhis.

¹⁸Gwra an pyth yw ewn ha da a-wel dhe'n ARLOEDH, rag may fo yn ta dhis, ha may tyffi hag erita an tir da a dos an ARLOEDH dhe'th tasow,

¹⁹dhe fesya oll dha eskerens a-ragos, kepar dell gewsis an ARLOEDH.

²⁰Pan wovynn dha vab orthis y'n termyn a dheu, ow leverel, ‘Pandr'yw styr a'n dustuniow ha'n ordenansow ha'n breusow a worhemmynnis an ARLOEDH agan Duw dhywgh?’

²¹ena ty a lever dhe'th vab, ‘Kethyon en ni dhe Faro yn Ejyp, ha'n ARLOEDH a'gan dros yn-mes a Ejyp dre leuv grev.

²²An ARLOEDH a ros arwoedhyow ha marthusyon, bras hag a-has, war Ejyp, war Faro, ha war oll y ji a-wel dhyn.

²³Ev a'gan dros yn-mes alena, rag ma'gan drolla a-ji, dhe ri dhyn an tir a dos dh'agan tasow.

²⁴An ARLOEDH a worhemmynnis dhyn gul oll an ordenansow ma, dhe berthi own a'n ARLOEDH agan Duw, rag may fo yn ta dhyn pub dydh oll, dh'agan gwitha yn few kepar ha hedhyw.

²⁵Y fydh dhyn ewnder mar kwaytyn ni gul oll an gorhemmynn ma a-wel dhe'n ARLOEDH agan Duw, kepar dell worhemmynnis dhyn.’