Read Kernewek Dewteronomi 8 Bible Online

Dewteronomi 8 - Kernewek bible

Dewteronomi 8

¹Gwaytyewgh gul oll an gorhemmynn a wrav vy y worhemmynna dhis hedhyw, rag may fewowgh hag ynkressya ha dos hag erita an tir a dos an ARLOEDH dh'agas tasow.

²Ha ty a berth kov a oll an fordh a wrug an ARLOEDH dha Dhuw dhis kerdhes ynni an dew-ugens blydhen ma y'n gwylvos, rag ma'th uvelhaho ha'th previ, dhe wodhvos an pyth esa y'th kolonn, mar kwitthes y worhemmynnow po na witthes.

³Ev a'th uvelhas, ha'th wul dhe vos nownek, ha'th voesa gans manna na aswonnsys ha ny'n aswonnsons dha dasow; rag ma'th wrella dhe aswonn nag yw dre vara unnsel y few den, mes ev a vew dre bup-tra oll a dheu yn-mes a anow an ARLOEDH.

⁴Dha vantell ny gothhas warnas, ha dha droes ny hwythfis an dew-ugens blydhen ma.

⁵Aswonn y'th kolonn, kepar dell geredh gour y vab, yndella an ARLOEDH dha Dhuw a'th keredh.

⁶Gwith gorhemmynnow an ARLOEDH dha Dhuw, ow kerdhes yn y fordhow, hag ow perthi own anodho.

⁷Rag yma an ARLOEDH dha Dhuw orth dha dhri dhe dir da, tir goverow dowr, fentynyow, ha downderyow ow liva yn-mes y'n nans ha'n brenn;

⁸tir a waneth ha heydh, ha gwinbrenn ha figbrenn ha greunaval, tir a olewbrennyer, olew ha mel;

⁹tir ma na dhybrydh ynno bara yn esow, ma na vydh dhis ynno fowt a dravyth; tir mayth yw y garregi horn, ha dhiworth y vrennow y fengleudhydh kober.

¹⁰Pan dhybrydh ha bos gwalghys, ena ty a vennik an ARLOEDH dha Dhuw rag an tir da a ros dhis.

¹¹Gwayt na ankeffi an ARLOEDH dha Dhuw, heb gwitha y worhemmynnow, y vreusow ha'y ordenansow esov ow korhemmynna dhis hedhyw.

¹²Pan dhebrowgh dha walgh, ha drehevel chiow da ha triga ynna,

¹³ha pan gress dha jatel ha'th deves, hag arghans hag owr a gress dhis, ha pup-tra a'th eus a ynkress,

¹⁴ena kemmer with na ughelhaho dha golonn, ha ty a ankev an ARLOEDH dha Dhuw, neb a'th tros dhe-ves dhiworth an chi a gethneth;

¹⁵neb a wrug dhis kerdhes y'n gwylvos bras hag euthyk, le mayth esa a'n sarf danek ha'n skorpyon, ha syghtir le ma nag eus dowr; neb a dhros dowr yn-mes dhis dhiworth karrek an kellester;

¹⁶neb a ros dhis manna dhe dhybri y'n gwylvos na aswonnis dha dasow, rag dha uvelhe, ha rag ma'th proffa, dhe wruthyl dader dhis wortiwedh.

¹⁷Kemmer with na leverri y'th kolonn, ‘Ow nerth ha galloes ow leuv re wrug dhymm an wolusogneth ma.’

¹⁸Mes porth kov a'n ARLOEDH dha Dhuw, rag yth yw ev neb a re dhis nerth dhe wul golusogneth, rag may fastyo y gevambos a dos dhe'th tasow, kepar hag y'n jydh hedhyw.

¹⁹Ha mar ankevydh byth an ARLOEDH dha Dhuw ha kerdhes war-lergh duwow erell ha'ga servya ha plegya dhe'n dor a-ragdha, my a dhest dhywgh hedhyw, yth ewgh dhe goll devri.

²⁰Kepar ha'n kenedhlow usi an ARLOEDH orth aga distrui a-ragowgh, yndella y fydhowgh distruys, drefenn na woslewsowgh dhe lev an ARLOEDH agas Duw.