Read Kernewek Yowann 12 Bible Online

Yowann 12 - Kernewek bible

Yowann 12

¹Ena, hwegh dydh kyns an pask, Yesu a dheuth dhe Bethani le mayth esa Lazarus[47] neb a wrug ev y dhrehevel dhiworth an re varow.

²Ytho i a wrug kevewi dhodho ena, hag yth esa Maria ow servya, ha Lazarus a veu onan a'n re esedhys orth an voes ganso.

³Ena Maria a gemmeras peuns[48] a unyent, nard pur, meur y brys, hag untya treys Yesu, ha sygha y dreys gans hy gols; ha'n chi a veu lenwys a ethenn an unyent.

⁴Hag yn-medh Yudas Skaryoth, onan a'y dhyskyblon, neb a vedha orth y drayta,

⁵‘Prag na veu an unyent ma gwerthys a drihans diner, ha'n mona res dhe'n voghosogyon?’

⁶Ny leveris hemma rag bos dhodho bern a-barth an voghosogyon, mes rag ev dhe vos lader, hag ev a witha an pors, ha ladra an pyth o gorrys ynno.

⁷Ytho Yesu a leveris, ‘Gwra hy gasa yn kres; hi re'n gwithas[49] rag dydh ow ynkleudhyans.

⁸Rag hwi a gyv an voghosogyon pub eur genowgh, mes my ny'm kevowgh pup-prys.’

⁹Ytho routh veur a'n Yedhewon a glewas ev dhe vos ena, ha ny dheuthons unnsel rag Yesu, mes ynwedh may hwellens Lazarus, neb a wrug ev y dhrehevel dhiworth an re varow.

¹⁰Mes an bennoferysi a dewlis towl dhe ladha Lazarus ynwedh,

¹¹rag dredho ev y feu lies a'n Yedhewon ow treylya dhe-ves hag ow krysi yn Yesu.

¹²Ternos an routh veur neb o devedhys dhe'n goel, pan glewsons Yesu dhe dhos dhe Yerusalem,

¹³a gemmeras skorrennow palm ha mos yn-mes dh'y vetya, hag i a grias, ‘Hosanna! Bennigys yw neb a dheu yn hanow an Arloedh! Myghtern Ysrael!’

¹⁴Ha Yesu a gavas asen yowynk, hag ev a esedhas warnodho, dell yw skrifys,

¹⁵‘Na gemmer own, myrgh Sion; otta, dha vyghtern a dheu, esedhys war ebel asen.’

¹⁶Ny gonvedhas y dhyskyblon hemma wostalleth, mes pan veu Yesu glorifiys, ena i a borthas kov hemma dhe vos skrifys a-dro dhodho, hag i dhe wul hemma ragdho.

¹⁷Ytho an routh neb esa ganso pan elwis ev Lazarus dhiworth an bedh, ha'y dhrehevel dhiworth an re varow, a dhug dustuni.

¹⁸Rakhenna an routh eth dh'y vetya, rag i a glewsa ev dhe wul an tokyn ma.

¹⁹Ytho an Fariseow a leveris an eyl dh'y gila, ‘Hwi a wel, nag eus prow vydh dhywgh. Otta, an bys yw gyllys war y lergh.’

²⁰Yth esa Grekys yn mysk an re esa ow tos yn-bann dhe wordhya y'n dy'goel.

²¹Ytho an re ma a dheuth dhe Felip, neb o a Bethsaida yn Galile, ha govynn orto ow leverel, ‘Syrra, ni a vynn gweles Yesu.’

²²Felip a dheuth ha leverel dhe Androw, hag arta Androw ha Felip a leveris dhe Yesu.

²³Yesu a worthybis dhedha ow leverel, ‘Devedhys yw an eur may fo Mab an den glorifiys.

²⁴Yn hwir, yn hwir y lavarav dhywgh, marnas hasenn a ys a goedh dhe'n dor ha merwel, hi a bes hy honan; mes mar merow, hi a dheg meur a frut.

²⁵Neb a gar y vewnans a wra y gelli, ha neb a gas y vewnans y'n bys ma a'n gwith bys yn bewnans heb diwedh.

²⁶Piwpynag a'm serfyo, gwres ev ow siwya; hag y'n tyller mayth esov, ena ynwedh y fydh ow servont. Piwpynag a'm serv, an Tas a wra y enora.

²⁷‘Lemmyn ow enev yw troblys; ha pandr'a lavarav? “A Das, gwra ow selwel dhiworth an eur ma”? Mes rakhemma y teuth vy bys y'n eur ma.

²⁸A Das, gwra glorifia dha hanow.’ Ena lev a dheuth dhiworth nev, ‘My a'n glorifias, ha my a'n glorifi arta.’

²⁹An routh neb a sevi ena a'n klewas, ha leverel hi dhe wul taran; re erell a leveris, ‘El re gewsis dhodho.’

³⁰Yesu a worthybis ha leverel, ‘Ny dheuth an lev a'm govis vy mes ragowgh hwi.

³¹Lemmyn yth yw breus an bys ma, lemmyn y fydh pryns an bys ma tewlys yn-mes.

³²Ha my, pan viv drehevys a'n norvys, a denn tus oll dhymmo vy.’

³³Ev a leveris hemma, ow styrya py par mernans a vedha ow merwel dredho.

³⁴Ytho an routh a worthybis dhodho, ‘Ni re glewas y'n lagha, Krist dhe besya bynitha; ha fatell leverowgh y tal Mab an den dhe vos drehevys? Piw yw an “Mab an den” ma?’

³⁵Ena Yesu a leveris dhedha, ‘Hwath pols byghan yma an golow genowgh. Kerdhewgh hedre vo genowgh an golow, ma na wrello tewlder agas dalghenna. Neb a gerdh y'n tewlder ny woer ple'th a.

³⁶Hedre vo genowgh an golow, trestyewgh y'n golow, rag may fowgh mebyon an golow.’ Yesu a gewsis hemma, hag ev eth dhe-ves hag omgudha ragdha.

³⁷Kyn hwrussa kemmys toknys a-ragdha, hwath ny gryssons ynno,

³⁸may fe kollenwys an lavar a gewsis Ysay an profoes, ‘Arloedh, piw re grysis agan pregoth, ha piw re beu bregh an Arloedh diskwedhys dhodho?’

³⁹Rakhenna ny allsons krysi, rag arta Ysay a leveris,

⁴⁰‘Ev re dhallhas aga dewlagas, hag ev re galeshas aga holonn, rag na hwrellons gweles gans aga dewlagas, na konvedhes gans aga holonn, na bos treylys, may hwrylliv aga sawya.’

⁴¹Ysay a leveris hemma rag ev dhe weles[50] y wolewder, hag ev a gewsis anodho ev.

⁴²Byttegyns lies hwath a'n rewloryon a grysis ynno, mes drefenn an Fariseow ny wrussons y gonfessya, ma na vens emskemunys a'n synaga;

⁴³rag i a garas gormel tus moy es gormel Duw.

⁴⁴Yesu a grias ha leverel, ‘Neb a grys ynnov vy, ny grys ynnov vy mes ynno ev neb a'm dannvonas,

⁴⁵hag ev neb a'm gwel vy a'n gwel ev neb a'm dannvonas.

⁴⁶Devedhys ov y'n bys kepar ha golow, rag na wrello piwpynag a grys ynnov vy triga yn tewlder.

⁴⁷Ha piwpynag a glew ow geryow heb aga gwitha,[51] ny wrav vy y vreusi, rag nyns ov vy devedhys dhe vreusi an bys mes dhe selwel an bys.

⁴⁸Ev neb a'm nagh, ha na dhegemmer ow geryow, yma dhodho nebonan a wra y vreusi; an ger a gewsis vy, henna a wra y vreusi dydh fin.

⁴⁹Rag ny gewsis vy ahanav ow honan, mes an Tas a'm dannvonas, ev a ros dhymm gorhemmynn, pandra dhe leverel ha pandra dhe gewsel.

⁵⁰Ha my a woer y worhemmynn dhe vos bewnans heb diwedh. Pup-tra a gowsav ytho, kepar dell leveris an Tas dhymm, yndella y kowsav.’