Read Kernewek Yowann 14 Bible Online

Yowann 14 - Kernewek bible

Yowann 14

¹‘Na vedhes troblys agas kolonn; hwi a grys yn Duw, krysiwgh ynwedh ynnov vy.

²Yn chi ow Thas yma lies trigva. Mar ny ve, a wrussen vy leverel dhywgh my dhe vos dhe bareusi tyller ragowgh?[55]

³Ha mar kwrav vy mos ha pareusi tyller ragowgh, my a dhehwel arta ha'gas kemmeres dhymm ow honan, may fowgh hwi ynwedh y'n tyller mayth esov vy.

⁴Ha dhe'n tyller mayth av, hwi a woer an fordh.’[56]

⁵Tommas a leveris dhodho, ‘Arloedh, ny wodhon ple'th edh; fatell yllyn godhvos an fordh?’

⁶Yn-medh Yesu dhodho, ‘My yw an fordh, ha'n gwir, ha'n bewnans. Ny dheu denvyth dhe'n Tas saw dredhov vy.

⁷Mar kwrussiwgh ow aswonn vy, hwi a wrussa aswonn ow Thas vy ynwedh.[57] Hag alemma rag hwi a'n aswonn, ha hwi re'n gwelas.’

⁸Felip a leveris dhodho, ‘Arloedh, diskwa dhyn an Tas, ha lowr vydh dhyn.’

⁹Yn-medh Yesu dhodho, ‘Esen vy genowgh termyn mar hir, ha ny'm aswonnsys, Felip? Piwpynag re'm gwelas vy re welas an Tas; ha fatell leverydh, “Diskwa dhyn an Tas”?

¹⁰A ny grysydh my dhe vos y'n Tas, ha'n Tas dhe vos ynnov vy? An geryow a gowsav dhywgh, ny's kowsav ahanav vy ow honan, mes an Tas neb a drig ynnov a wra y oberow.[58]

¹¹Krysiwgh dhymm, my dhe vos y'n Tas ha'n Tas ynnov vy; poken krysiwgh drefenn an oberow aga honan.

¹²Yn hwir, yn hwir y lavarav dhywgh, ev neb a grys ynnov vy, ev ynwedh a wra an oberow a wrav vy, hag oberow brassa agessa a wra, rag yth esov vy ow mos dhe'n Tas.

¹³Ha pypynag a wovynnowgh y'm hanow vy, henna a wrav, may fo glorifiys an Tas y'n Mab.

¹⁴Mar kovynnowgh tra y'm hanow vy, my a'n gwra.

¹⁵‘Mara'm kerowgh, hwi a with[59] ow gorhemmynnow.

¹⁶Ha my a vynn govynn orth an Tas, hag ev a re dhywgh konforter arall, may hwrello gortos genowgh rag nevra,

¹⁷an Spyrys a wiryonedh, neb na yll an bys y dhegemmeres, rag ny'n gwel na ny'n aswonn. Mes hwi a'n aswonn, rag ev a drig genowgh hag ev a vydh ynnowgh.

¹⁸‘Ny'gas gasav omdhivas; dos a wrav dhywgh.

¹⁹Hwath pols byghan ha'n bys ny'm gwel namoy; mes hwi a'm gwel, rag my a vew, ha hwi ynwedh a vew.

²⁰Y'n jydh na hwi a wodhvydh my dhe vos y'm Tas, ha hwi ynnov vy, ha my ynnowgh hwi.

²¹Neb a'n jeves ow gorhemmynnow ha'ga gwitha, ev yw neb a'm kar; ha neb a'm kar a vydh kerys gans ow Thas, ha my a'n karvydh, ha diskwedhes ow honan dhodho.’

²²Yn-medh Yudas dhodho (nag o Skaryoth), ‘Arloedh, fatell yw, ty dhe vynnes omdhiskwedhes dha honan dhyn ni, a-der dhe'n bys?’

²³Yesu a worthybis ha leverel dhodho, ‘Piwpynag a'm karro a with ow geryow, ha'm Tas a'n karvydh, ha ni a dheu dhodho ha gul agan trigva ynno.

²⁴Ev neb na'm kar ny with ow geryow; ha'n ger a glewowgh nyns yw ahanav vy, mes a'n Tas neb a'm dannvonas.

²⁵‘My re gewsis hemma dhywgh, ha my hwath genowgh.

²⁶Mes an Konforter, an Spyrys Sans neb a wra an Tas y dhannvon y'm hanow vy, ev a dhysk dhywgh pup-tra ha'gas kovha a bup-tra a leveris dhywgh.

²⁷Kres a asav dhywgh, ow kres a rov dhywgh; ny rov dhywgh kepar dell re an bys. Na vedhes dha golonn troblys, ha na berthes own.

²⁸Hwi re glewas my dhe leverel dhywgh, yth av dhe-ves, ha my a dhehwel dhywgh. Mara'm karrewgh, lowenhe a wrussiwgh, my dhe vos dhe'n Tas, rag ow Thas yw brassa agesov vy.

²⁹Ha lemmyn my re'n leveris dhywgh kyns ev dhe hwarvos, rag may kryssowgh pan hwer.

³⁰Ny wrav vy kewsel meur genowgh na fella, rag pryns an bys a dheu; ha ny'n jeves galloes warnav.

³¹Mes rag may hwodhvo an bys my dhe gara an Tas, ha kepar dell worhemmynnis dhymm an Tas, yndella y hwrav. Sevewgh, deun ni alemma.