Read Kernewek Yowann 15 Bible Online

Yowann 15 - Kernewek bible

Yowann 15

¹‘My yw an gwir winbrenn ha'm Tas yw an tiek.

²Pub skorrenn ynnov ha na dheg frut, ev a's kemmer dhe-ves, ha pubonan hag a dheg frut, ev a's skether, may tokko frut moy.

³Hwi yw glan seulabrys, drefenn an ger a gewsis dhywgh.

⁴Trigewgh ynnov vy, ha my ynnowgh hwi. Dell na yll an skorrenn doen frut hy honan marnas hi a drig y'n gwinbrenn, yndella ny yllowgh hwi, marnas hwi a drig ynnov vy.

⁵My yw an gwinbrenn, hwi an skorrennow. Neb a drig ynnov vy ha my ynno ev, ev a dheg meur a frut, rag hebov vy, ny yllowgh gul travyth.

⁶Piwpynag na drig ynnov yw tewlys dhe-ves kepar ha skorrenn, hag a wedher; tus a wra aga huntell, ha'ga thewlel y'n tan, ha leskys yns.

⁷Mar trigowgh ynnov, ha'm geryow mar trigons ynnowgh, govynnewgh pypynag a vynnowgh, ha gwrys vydh ragowgh.

⁸Yn hemma glorifiys yw ow Thas, hwi dhe dhoen meur a frut ha dhe vos[60] dyskyblon dhymm.

⁹Dell wrug an Tas ow hara, my ynwedh a wrug agas kara; trigewgh y'm kerensa.

¹⁰Mar kwithowgh ow gorhemmynnow, trigewgh y'm kerensa, kepar dell withis vy gorhemmynnow ow Thas ha triga yn y gerensa ev.

¹¹My re gewsis an taklow ma dhywgh may fo ow lowena ynnowgh, ha may fo agas lowena kollenwys.

¹²‘Hemm yw ow gorhemmynn, may kyrrowgh an eyl y gila dell wrugavy agas kara hwi.

¹³Brassa kerensa es hemma nyns eus dhe dhenvyth, den dhe dhaskorr y vewnans rag y gowetha.

¹⁴Hwi yw ow howetha mar kwrewgh pypynag a worhemmynnav dhywgh.

¹⁵Ny wrav agas henwel gwesyon na fella, rag ny woer an gwas pandr'a wra y vester; mes my re'gas henwis kowetha, rag pup-tra a wrug vy klewes a'w Thas my a wrug y dheklarya dhy'hwi.

¹⁶Ny wrussowgh hwi ow dewis vy, mes my re'gas dewisas hwi, ha'gas apoyntya mayth yllowgh ha doen frut, ha may hwrello agas frut durya; may rollo ow Thas dhywgh pypynag a wovynnowgh dhiworto y'm hanow vy.

¹⁷Hemma a worhemmynnav dhywgh, hwi dhe gara an eyl y gila.

¹⁸‘Mar kwra an bys agas kasa, hwi a woer ev dhe'm kasa vy kyns es agas kasa hwi.

¹⁹Mar pewgh a'n bys, an bys a garsa y dus y honan; mes rag nyns owgh a'n bys, mes my re'gas dewisas dhiworth an bys, rakhenna an bys a'gas kas.

²⁰Perthewgh kov a'n ger a gewsis dhywgh: Nyns yw an kethwas brassa es y vester. Mar kwrussons ow helghya vy, i a'gas helgh hwi ynwedh; mar kwrussons gwitha ow ger vy, ynwedh i a with agas ger hwi.

²¹Mes oll an taklow ma a wrons dhywgh a-barth ow hanow, rag ny'n aswonnons neb a'm dannvonas.

²²Mar ny wrellen vy dos ha kewsel orta, ny's tevia pegh; mes lemmyn nyns eus dhedha askus, dre reson aga fegh.

²³Ev neb a'm kas a gas ow Thas ynwedh.

²⁴Mar ny wrellen vy yn aga mysk an oberow na wrug denvyth arall, ny viens kablus a begh; mes lemmyn i re welas ha'm kasa vy ha'm Tas.

²⁵Mes hemm yw, rag may fo kollenwys an ger skrifys yn aga lagha, “I re'm kasas heb acheson.”

²⁶‘Mes pan dheu an Konforter neb a dhannvonav dhywgh dhiworth an Tas, an Spyrys a wiryonedh neb a dheu yn-mes dhiworth an Tas, ev a dheg dustuni ahanav.

²⁷Ha hwi ynwedh a dheg dustuni, rag hwi re beu genev a'n dalleth.