Read Kernewek Yowann 16 Bible Online

Yowann 16 - Kernewek bible

Yowann 16

¹‘My re leveris dhywgh an taklow ma, rag na wryllowgh trebuchya.

²I a wra agas emskemuna a'n synaga; mes an eur a dheu pan dyb peub a wra agas ladha, ev dhe brofya gordhyans dhe Dhuw.

³Ha hemma a wrons rag ny aswonnsons naneyl an Tas na my.

⁴Mes my re leveris an taklow ma dhywgh, rag may perthowgh kov, pan dheu aga eur, my dhe gewsel orthowgh anedha. ‘Ny leveris vy an taklow ma a'n dalleth, drefenn ow bos genowgh.

⁵Mes lemmyn yth av dhe neb a'm dannvonas, ha ny wovynn orthiv denvyth ahanowgh, “Ple'th edh?”

⁶Mes rag my dhe leverel hemma dhywgh, tristyns re lenwis agas kolonn.

⁷Mes my a lever dhywgh an gwiryonedh, gwell dhywgh yw, my dhe vos yn-kerdh. Rag mar nyns av yn-kerdh, ny dheu an Konforter dhywgh; mes mars av, my a'n dannvon dhywgh.

⁸Ha pan dheu ev, ev a guhudh an bys a-dro dhe begh, hag a-dro dhe ewnder, hag a-dro dhe vreus.

⁹A-dro dhe begh, rag ny grysons ynnov;

¹⁰a-dro dhe ewnder, rag my dhe vos dhe'n Tas, ha ny'm gwelowgh na fella;

¹¹hag a-dro dhe vreus, rag pryns an bys ma yw breusys.

¹²‘Yma dhymm hwath lies tra dhe leverel dhywgh, mes ny yllowgh aga ferthi lemmyn.

¹³Mes pan dheu ev, an Spyrys a wiryonedh, ev a'gas hembronk yn gwiryonedh oll; rag ny gews a'y awtorita y honan, mes ev a gews an pyth a glew, hag ev a dheriv dhywgh an taklow a dheu.

¹⁴Ev a wra ow glorifia, rag ev a gemmer dhiworth an pyth yw dhymm ha'y dherivas dhywgh.

¹⁵Pup-tra a'n jeves an Tas yw dhymm; rakhenna y leveris vy, y hwra ev kemmeres dhiworth an pyth yw dhymm ha'y dherivas dhywgh.

¹⁶‘Unn pols byghan ha ny'm gwelowgh na fella, hag arta unn pols byghan ha hwi a'm gwel.’[61]

¹⁷Re a'y dhyskyblon ytho a leveris an eyl dh'y gila, ‘Pyth yw hemma a lever ev dhyn, “Unn pols byghan ny'm gwelowgh, hag arta unn pols byghan ha hwi a'm gwel”, ha, “Rag yth av dhe'm Tas”?’

¹⁸Ytho yn-medhons i, ‘Pyth yw hemma a gews ev anodho, “Unn pols byghan”: ny gonvedhyn pandr'a lever.’

¹⁹Yesu a wodhva i dhe vynnas govynn orto, hag yn-medh ev dhedha, ‘Hwi a omgusul an eyl gans y gila, rag my dhe leverel, unn pols byghan ha ny'm gwelowgh, hag arta unn pols byghan ha hwi a'm gwel.

²⁰Yn hwir, yn hwir y lavarav dhywgh, hwi dhe oela ha dhe gyni, mes an bys a lowenha. Mes hwi a vydh trist, mes agas tristyns a dreyl dhe lowena.

²¹Benyn pan vo hi yn lavur a's teves tristyns, rag bos devedhys hy eur; mes pan yw genys an flogh gensi, ny berth hi kov a'n payn na fella, drefenn an lowena, bos den genys y'n bys.

²²Hag ytho, hwi a'gas beus tristyns lemmyn; mes my a'gas gwel arta, ha'gas kolonn a lowenha, ha'gas lowena ny wra denvyth hy hemmeres dhiworthowgh.

²³Hag y'n jydh na ny wrewgh govynn orthiv travyth. Yn hwir, yn hwir y lavarav dhywgh, pypynag a wovynnowgh a'n Tas y'm hanow vy, ev a'n re dhywgh.

²⁴Bys lemmyn ny wovynnsowgh travyth y'm hanow vy; govynnewgh ha hwi a dhegemmer, rag may fo agas lowena kollenwys.

²⁵‘My re leveris an taklow ma yn parabolennow; termyn a dheu pan na gowsav dhywgh yn parabolennow na fella mes y terivav dhywgh apert a-dro dhe'n Tas.

²⁶Y'n jydh na hwi a wovynn y'm hanow vy ha ny wrav leverel dhywgh my dhe bysi an Tas ragowgh;

²⁷rag an Tas y honan a'gas kar, rag hwi re'm karas vy, ha hwi re grysis my dhe dhos dhiworth Duw.

²⁸My a dheuth dhiworth an Tas, ha devedhys ov y'n bys; arta my a as an bys, ha mos dhe'n Tas.’

²⁹Yn-medh y dhyskyblon dhodho, ‘Otta, lemmyn ty a gews apert, ha ny leverydh parabolenn mann.

³⁰Lemmyn ni a woer ty dhe wodhvos pup-tra, ha nyns eus edhomm dhis may hwrello denvyth govynn orthis; rakhemma ni a grys ty dhe vos devedhys dhiworth Duw.’

³¹Yesu a worthybis dhedha, ‘A grysowgh lemmyn?

³²Otta, termyn a dheu, ha re dheuth, pan vydhowgh skattrys, peub dh'y dre, ha'm gasa ow honan; mes nyns ov vy ow honan, rag bos an Tas genev.

³³My re leveris hemma dhywgh, rag ma'gas bo kres ynnov. Y'n bys hwi a'gas bydh govisyon; mes bedhewgh a gonfort da! My re fethas an bys.’