Read Kernewek Yowann 17 Bible Online

Yowann 17 - Kernewek bible

Yowann 17

¹Wosa kewsel an taklow ma, Yesu a dhrehevis y dhewlagas dhe nev ha leverel, ‘Tas, re dheuth an eur; ro glori dhe'th Vab, rag may hwrello dha Vab ri glori dhiso jy,

²kepar dell resys dhodho galloes dres oll kig, may rollo bewnans heb diwedh dhe vyns re resys dhodho.

³Ha hemm yw bewnans heb diwedh: ma'th aswonnons ty, an unn gwir Dhuw, ha Yesu Krist neb re dhannvensys.

⁴My re'th glorifiis war an norvys, ow kowlwul an ober a resys dhymm dhe wul.

⁵Ha lemmyn gwra ow glorifia, A Das, y'th wolok dha honan, gans an glori a'm beu genes kyns bos an bys.

⁶‘My re dhiskwedhas dha hanow dhe'n dus a resys dhymm yn-mes a'n bys. Dhiso jy yth ens, ha ty a's ros dhymm, hag i re withas dha er.

⁷Lemmyn i a woer, pup-tra re resys dhymm dhe vos ahanas jy.

⁸Rag my re ros dhedha an geryow a resys dhymm, hag i a's degemmeras hag a gonvedhas yn gwirder my dhe dhos ahanas, hag i a grysis ty dhe'm dannvon.

⁹Ragdha i y pysav, ny bysav rag an bys mes rag an re a resys dhymm, rag dhiso jy yth yns,

¹⁰ha dhiso jy yw pup-tra a'm beus, ha glorifiys ov ynna i.

¹¹Ha lemmyn nyns esov vy y'n bys namoy, mes an re ma ymons y'n bys, ha my a dheu dhis. A Das sans, gwra aga gwitha y'th hanow jy hag a resys dhymm, may fons i onan kepar dell on nyni.

¹²Pan esen gansa,[62] my a's synsis y'th hanow jy hag a resys dhymm, ha my a's gwithas, ha ny veu denvyth anedha kellys, marnas an mab a dhiswrians, may fe kollenwys an skryptor.

¹³Mes lemmyn y tov dhis, ha'n taklow ma a gowsav y'n bys, rag ma's teffo ow lowender kowlwrys ynna aga honan.

¹⁴My a ros dhedha dha er, ha'n bys a's kasas, rag nyns esons i a'n bys, kepar dell nag esov vy a'n bys.

¹⁵Ny wovynnav ty dh'aga hemmeres yn-mes a'n bys, mes ty dh'aga gwitha rag an tebel el.

¹⁶Nyns yns i a'n bys, kepar dell nag ov vy a'n bys.

¹⁷Gwra aga sakra y'n gwirder; dha er yw gwirder.

¹⁸Kepar dell wrussys ow dannvon vy y'n bys, yndella my ynwedh re's dannvonas i y'n bys.

¹⁹Hag a-barth dhedha i omsakra a wrav ow honan, rag may fons i ynwedh sakrys y'n gwirder.

²⁰‘Ny wrav vy pysi rag an re ma yn unnsel, mes rag an re a grys ynnov der aga ger,

²¹rag may fons i oll onan, kepar ha ty, A Das, ynnov vy ha my ynnos jy, rag may fons i ynwedh onan[63] ynnon ni, may krysso an bys ty dhe'm dannvon.

²²Ha'n glori a resys dhymm, my re'n ros dhedha i, may fons i onan kepar dell on ni onan,

²³my ynna i, ha ty ynnov vy, may fons i gwrys perfydh yn onan, may hwodhvo an bys ty dhe'm dannvon, ha'ga hara i kepar dell wrussys ow hara vy.

²⁴A Das, my a vynn an re a resys dhymm i ynwedh dhe vos genev vy le mayth esov, rag may hwellons ow glori a resys dhymm, rag ty a'm karas kyns gwrians an bys.

²⁵‘A Das gwiryon, ny wra an bys dha aswonn, mes my a'th aswonn, ha'n re ma a woer ty dhe'm aswonn.

²⁶My a dherivas dhedha dha hanow, ha my a wra y dherivas, may fo ynna i an gerensa dredhi may hwrussys ow hara vy, ha my ynna i.’