Read Kernewek Yowann 18 Bible Online

Yowann 18 - Kernewek bible

Yowann 18

¹Wosa leverel an taklow ma, Yesu eth dhe-ves gans y dhyskyblon dres an keynres Kedron, le mayth esa lowarth, hag ev ha'y dhyskyblon a entras ynno.

²Ha Yudas, neb a'n traytas, a aswonnis an tyller, rag Yesu a wre omguntell ena yn fenowgh gans y dhyskyblon.

³Yudas ytho, wosa kavoes bagas a soudoryon ha soedhogyon dhiworth an bennoferysi ha'n Fariseow, a dheuth di gans lugern ha faglennow hag arvow.

⁴Rakhenna Yesu, ow kodhvos pup-tra a vedha ow hwarvos dhodho, eth yn-rag ha leverel dhedha, ‘Piw a hwilowgh?’

⁵I a worthybis dhodho, ‘Yesu a Nazareth.’ Yn-medh Yesu dhedha, ‘My yw.’ Ha Yudas ynwedh, neb a'n traytas, a sevi gansa.

⁶Kettell leveris Yesu dhedha, ‘My yw’, i eth war-dhelergh ha koedha dhe'n dor.

⁷Ytho arta ev a wovynnas orta, ‘Piw a hwilowgh?’ Hag yn-medhons, ‘Yesu a Nazareth.’

⁸Yesu a worthybis, ‘My re leveris dhywgh ow bos ev; ytho mara'm hwilowgh, gas an re ma dhe vos yn-kerdh’;

⁹may fe kollenwys an lavar a leveris ev, ‘A'n re a resys dhymm, ny gellis vy nagonan.’

¹⁰Ena Simon Peder, ha ganso kledha, a'n tennas ha gweskel kethwas an arghoferyas ha treghi dhe-ves y skovarn dhyghow. Malkus o hanow an gwas.

¹¹Ena yn-medh Yesu dhe Peder, ‘Gorr an kledha y'n woen. An hanaf a ros dhymm an Tas, a ny wrav vy y eva?’

¹²Ena bagas an soudoryon ha'n kapten ha soedhogyon an Yedhewon a dhalghennas Yesu ha'y gelmi.

¹³Hag i a'n hembronkas dhe-ves yn kynsa dhe Annas, neb o hwegron Kayfas, neb o arghoferyas an vlydhen na.

¹⁴Kayfas yth o neb a gusulsa an Yedhewon bos gwell unn den dhe verwel rag an bobel.

¹⁵Ha Simon Peder a siwyas Yesu, ha dyskybel arall. An dyskybel na o aswonnys dhe'n arghoferyas, hag ev eth gans Yesu a-bervedh yn klos an arghoferyas.

¹⁶Mes Peder a wortas orth an daras a-ves. Ena an dyskybel arall neb o aswonnys dhe'n arghoferyas eth yn-mes, ha kewsel orth an borthores, ha dri Peder a-bervedh.

¹⁷Ena yn-medh an vaghteth a witha an daras dhe Peder, ‘A nyns osta jy ynwedh onan a dhyskyblon an den ma?’ Yn-medh ev, ‘Nyns ov.’

¹⁸Ha'n gethwesyon ha'n soedhogyon, neb re wrussa tan glowbrenn, a sevi ena, rag yeyn o, hag omdoemma. Hag yth esa Peder ow sevel gansa, hag owth omdoemma.

¹⁹Ena an arghoferyas a wovynnas orth Yesu a-dro dh'y dhyskyblon, hag a-dro dh'y dhyskas.

²⁰Yesu a worthybis dhodho, ‘My re gewsis yn apert dhe'n bys. Pup-prys my re dhyskas y'n synaga hag y'n tempel, le mayth omguntell an Yedhewon pup-prys, hag yn-dann gel ny leveris travyth

²¹Prag y hwovynnydh orthiv? Govynn orth an re a glewas pandr'a leveris dhedha. Otta, i a woer pandr'a leveris.’

²²Wosa ev dhe leverel hemma, onan a'n soedhogyon neb a sevi ena a ros hwatt dhe Yesu, ow leverel, ‘Yw yndella y hworthybis dhe'n arghoferyas?’

²³Yesu a worthybis dhodho, ‘Mar kwrug vy kewsel drog, dog dustuni a-dro dhe'n drog, mes mar lavarav yn ta, prag y'm gweskydh?’

²⁴Ena Annas a'n dannvonas kelmys dhe Kayfas an arghoferyas.

²⁵Hag yth esa Simon Peder ow sevel hag owth omdoemma. Ytho i a leveris dhodho, ‘A nyns osta jy ynwedh onan a'y dhyskyblon?’ Ev a'n naghas, ha leverel, ‘Nyns ov.’

²⁶Onan a gethwesyon an arghoferyas, neshevin anodho ev neb a droghas Peder y skovarn dhe-ves, a leveris, ‘A ny wrugavy dha weles y'n lowarth ganso?’

²⁷Ena Peder a naghas arta, hag a-dhesempis an kulyek a ganas.

²⁸Ena i a hembronkas Yesu dhiworth Kayfas bys y'n pretorium. Myttin a-varr o hi. Nyns ethons i aga honan a-bervedh y'n pretorium, ma na vens i defolys, mes may hallens dybri an pask.

²⁹Ena Pilat eth yn-mes dhedha ha leverel, ‘Pana guhudhans a dhrowgh erbynn an den ma?’

³⁰I a worthybis ha leverel, ‘Mar ny ve ev drogoberer,[64] ny wrussyn ni y dhaskorr dhis.’

³¹Ytho Pilat a leveris dhedha, ‘Kemmerewgh e agas honan, ha'y vreusi herwydh agas lagha.’ Yn-medhons an Yedhewon dhodho, ‘Nyns yw lafyl dhyn, ni dhe worra denvyth dhe'n mernans’;

³²may fe kollenwys an ger kewsys gans Yesu, ow styrya py par mernans a vedha ow merwel dredho.

³³Ena Pilat eth arta a-bervedh y'n lys, ha gelwel Yesu ha leverel dhodho, ‘Osta myghtern an Yedhewon?’

³⁴Yesu a worthybis, ‘A leverydh hemma a'th vodh dha honan, po a wrug tus erell y leverel ahanav?’

³⁵Pilat a worthybis, ‘Ov vy Yedhow? Dha genedhel dha honan ha'n arghoferyas a'th taskorras dhymm. Pandr'a wrussys?’

³⁶Yesu a worthybis, ‘Ow gwlaskor nyns yw a'n bys ma. Mar pe ow gwlaskor a'n bys ma, ow servysi a wrussa omladh, rag na ven vy delivrys dhe'n Yedhewon; mes lemmyn nyns usi ow gwlaskor alemma.’

³⁷Ena yn-medh Pilat dhodho, ‘Osta myghtern ytho?’ Yesu a worthybis, ‘Ty a lever, ow bos myghtern. Rakhenna y feuv vy genys, ha rakhenna y teuth vy y'n bys, may hallen dustunia a'n gwiryonedh. Peub neb yw a'n gwiryonedh a glew ow lev.’

³⁸Yn-medh Pilat dhodho, ‘Pyth yw gwiryonedh?’ Hag ow leverel hemma, ev eth yn-mes arta dhe'n Yedhewon ha leverel dhedha, ‘Ny welav ken vyth er y bynn.

³⁹Mes yma dhywgh us, my dhe dhelivra unn den dhywgh y'n pask. A vynnowgh ytho my dhe dhelivra dhywgh myghtern an Yedhewon?’

⁴⁰Ena i a armas arta, ow leverel, ‘Na wra delivra an den ma, mes Barabbas.’ Lemmyn Barabbas o lader.