Read Kernewek Yowann 20 Bible Online

Yowann 20 - Kernewek bible

Yowann 20

¹Y'n kynsa dydh a'n seythun, Maria Magdalena a dheuth dhe'n bedh a-varr myttin, pan o hwath tewl, ha hi a welas an men kemmerys dhiworth an bedh.

²Ytho hi eth yn unn boenya dhe Simon Peder ha dhe'n dyskybel arall a wre Yesu y gara, hag yn-medh hi dhedha, ‘I re gemmeras an Arloedh yn-mes a'n bedh, ha ny wodhon ple'n gorrsons.’

³Ytho Peder eth yn-mes, ha'n dyskybel arall, ow mos dhe'n bedh.

⁴Ytho i a boenyas aga dew war-barth; ha'n dyskybel arall a boenyas yn-rag skaffa es Peder, hag ev a dheuth yn kynsa dhe'n bedh.

⁵Ev a ynklinyas ha gweles an lystennow ow krowedha ena, byttegyns nyns eth ev a-bervedh.

⁶Ena Peder a dheuth, orth y siwya, hag eth a-bervedh y'n bedh, hag ev a welas an lystennow ow krowedha,

⁷ha'n gweth, re bia a-dro dh'y benn; nyns esa ow krowedha gans an lystennow, mes maylys war-barth yn tyller arall.

⁸Ena an dyskybel arall ynwedh, neb a dhothya yn kynsa dhe'n bedh, eth a-bervedh, hag ev a welas, hag a grysis.

⁹Rag ny gonvedhsens na hwath an skryptor, y koedhva dhodho dasserghi dhiworth an re varow.

¹⁰Ena an dhyskyblon eth dhe-ves arta dh'aga threvow aga honan.

¹¹Mes Maria a sevi a-ves dhe'n bedh, owth oela. Ha hi owth oela, hi a ynklinyas dhe vires y'n bedh,

¹²ha gweles dew el gwiskys yn gwynn, esedhys onan dhe'n penn hag onan dhe'n treys, le may fia korf Yesu ow krowedha.

¹³Hag i a leveris dhedha, ‘A venyn, prag yth oelydh?’ Yn-medh hi dhedha, ‘I re gemmeras ow Arloedh dhe-ves, ha ny wonn ple'n gorrsons.’

¹⁴Ha wosa leverel hemma, hi a dreylyas war-dhelergh ha gweles Yesu ow sevel; mes ny wodhya y vos Yesu.

¹⁵Yn-medh Yesu dhedhi, ‘A venyn, prag yth oelydh? Piw a hwilydh?’ Hi, ow tybi y vos an lowarther, a leveris dhodho, ‘Syrra, mar kwrussys y dhoen dhe-ves, lavar dhymm le ma'n gorrsys, ha my a'n kemmer.’

¹⁶Yn-medh Yesu dhedha, ‘Maria!’ Hi a dreylyas ha leverel dhodho yn Ebrow, ‘Rabboni’, (henna a styr, Mester).

¹⁷Yn-medh Yesu dhedhi, ‘Na wra ow thochya, rag nyns ov vy yskynnys na hwath dhe'n Tas; mes ke dhe'm dyskyblon ha lavar dhedha, “My a yskynn dhe'm Tas vy ha dh'agas Tas hwi, dhe'm Duw vy ha dh'agas Duw hwi”.’

¹⁸Maria Magdalena eth ha derivas dhe'n dhyskyblon hi dhe weles an Arloedh, hag ev dhe gewsel an taklow ma dhedhi.

¹⁹Ena yn gorthugher an keth jydh ma, an kynsa dydh a'n seythun, ha'n darasow degeys le mayth esa an dhyskyblon[68] rag own a'n Yedhewon, Yesu a dheuth ha sevel yn aga mysk, ha leverel dhedha, ‘Kres dhywgh.’

²⁰Ha wosa leverel hemma, ev a dhiskwedhas dhedha y dhiwleuv ha'y denewen. Ytho an dhyskyblon a lowenhas, ow kweles an Arloedh.

²¹Ena yn-medh Yesu dhedha arta, ‘Kres dhywgh. Kepar dell wrug ow Thas ow dannvon vy, yndella my a's dannvon hwi.’

²²Ha wosa leverel hemma, ev a anellas warnedha ha leverel dhedha, ‘Degemmerewgh an Spyrys Sans.

²³Dhe biwpynag y hwryllowgh gava aga feghosow, gevys yns dhedha, ha dhe biwpynag y's gwithowgh, gwithys yns.’

²⁴Mes Tommas, onan a'n dewdhek, henwys Didymus, nyns esa gansa pan dheuth Yesu.

²⁵Ytho an dhyskyblon erell a leveris dhodho, ‘Ni re welas an Arloedh.’ Mes yn-medh ev dhedha, ‘Marnas my a wel yn y dhiwleuv merk an kentrow, ha dri ow bys yn merk an kentrow ha dri ow leuv yn y denewen, ny wrav vy krysi.’

²⁶Ha dhe benn eth dydh, yth esa y dhyskyblon a-bervedh arta, ha Tommas gansa. Yesu a dheuth, ha'n darasow degeys, ha sevel y'n kres ha leverel, ‘Kres dhywgh.’

²⁷Ena yn-medh ev dhe Tommas, ‘Doro dha vys omma ha gwel ow diwleuv; ha doro dha leuv ha'y gorra y'm tenewen, ha na vydh diskryjyk, mes kryjyk.’

²⁸Tommas a worthybis, ha leverel dhodho, ‘Ow Arloedh, ha'm Duw!’

²⁹Yn-medh Yesu dhodho, ‘Rag ty dhe'm gweles ty re gryssys; gwynnvys kemmys na'm gwelas, mes i a grys.’

³⁰Yesu a wrug lies tokyn arall yn golok y dhyskyblon, nag yw skrifys y'n lyver ma.

³¹Mes an re ma yw skrifys rag may kryssowgh Yesu dhe vos an Krist, Mab Duw, hag ow krysi may fo dhywgh bewnans yn y hanow ev.