Read Kernewek Yowann 21 Bible Online

Yowann 21 - Kernewek bible

Yowann 21

¹Wosa hemma, Yesu a omdhiskwedhas y honan arta orth mor Tiberias; hag yndella yth omdhiskwedhas.

²Yth esa ena war-barth Simon Peder, ha Tommas henwys Didymus, ha Nathanael a Kana yn Galile, ha mebyon Zebede, ha dew arall a'y dhyskyblon.

³Simon Peder a leveris dhedha, ‘My a dhe byskessa.’ Yn-medhons i dhodho, ‘Ni ynwedh a dheu genes.’ I eth yn-mes ha mos dihwans y'n gorhel; hag y'n nos na ny gavsons travyth.

⁴Mes devedhys an bora, Yesu a sevi war an lann, byttegyns ny gonvedhsens an dhyskyblon y vos Yesu.

⁵Ena yn-medh Yesu dhedha, ‘Fleghes, a nyns eus genowgh boes?’ I a worthybis dhodho, ‘Nag eus.’

⁶Yn-medh ev dhedha, ‘Tewlewgh an roes dhe du dyghow an gorhel ha hwi a gyv.’ Ytho i a dewlis, ha lemmyn ny allsons hy thenna drefenn myns an puskes.

⁷Ytho an dyskybel na a wre Yesu y gara a leveris dhe Peder, ‘An Arloedh yw.’ Simon Peder ytho, pan glewas y vos an Arloedh, a wrogysas y bows a-dro dhodho, rag noeth o, ha lamma y'n mor.

⁸Ha'n dhyskyblon erell a dheuth y'n skath vyghan, (rag nyns esens pell a'n lann, mes a-dro dhe dhew kans kevelin), ow tenna an roes gans an puskes.

⁹Kettell dirsons dhe'n lann, i a welas ena tan glowbrenn, ha pysk warnodho, ha bara.

¹⁰Yn-medh Yesu dhedha, ‘Drewgh re a'n puskes a gevsowgh nammnygen.’

¹¹Simon Peder eth yn-bann ha tenna dhe'n lann an roes leun a buskes bras, kans, trydhek ha dew-ugens. Ha kynth esa kemmys, ny veu terrys an roes.

¹²Yn-medh Yesu dhedha, ‘Dewgh, dybrewgh.’ Mes ny vedhas denvyth a'n dhyskyblon govynn orto, ‘Piw os?’ rag i a wodhya y vos an Arloedh.

¹³Yesu a dheuth ha kemmeres an bara ha'y ri dhedha, hag y'n keth vaner an pysk.

¹⁴Hemm o lemmyn an tressa gweyth yth omdhiskwedhas Yesu dhe'n dhyskyblon, wosa ev dhe bos drehevys a'n re varow.

¹⁵Ytho wosa i dhe dhybri, yn-medh Yesu dhe Simon Peder, ‘Simon mab Yowann,[69] es'ta jy orth ow hara vy moy es an re ma?’ Yn-medh ev dhodho, ‘Ya, Arloedh, ty a woer my dhe'th kara.’ Yn-medh ev dhodho, ‘Mag ow eyn.’

¹⁶Yn-medh ev dhodho arta, nessa gweyth, ‘Simon mab Yowann, es'ta jy orth ow hara vy?’ Yn-medh ev dhodho, ‘Ya, Arloedh, ty a woer my dhe'th kara.’ Yn-medh ev dhodho, ‘Gwra bugelya ow deves.’

¹⁷Yn-medh ev dhodho an tressa gweyth, ‘Simon mab Yowann, es'ta jy orth ow hara vy?’ Peder a gemmeras duwon, rag ev dhe leverel dhodho an tri thorn, ‘Es'ta jy orth ow hara vy?’ Yn-medh ev dhodho, ‘Arloedh, ty a woer pup-tra, ty a woer my dhe'th kara.’ Yn-medh ev dhodho, ‘Mag ow deves.

¹⁸Yn hwir, yn hwir y lavarav dhis, pan esta yowynk omwrogysa a wres ha kerdhes plepynag y fynnes; mes pan vydhydh koth, ty a ystynn dha dhiwleuv, ha den arall a wra dha wrogysa ha dha dhoen dhe le na vynnydh.’

¹⁹Hemma a leveris, ow sygnyfia gans py par mernans y hwre ev glorifia Duw. Ha wosa leverel hemma, yn-medh ev dhodho, ‘Gwra ow siwya.’

²⁰Peder a dreylyas, ha gweles an dyskybel a wre Yesu y gara ow siwya, neb re boessa war-dhelergh orth y vronn y'n goen ha leverel, ‘Arloedh, piw a wra dha drayta?’

²¹Ena pan wrug Peder y weles, yn-medh ev dhe Yesu, ‘Arloedh, pandra a-dro dhe hemma?’

²²Yn-medh Yesu dhodho, ‘Mar mynnav ev dhe wortos bys pan dhov, pyth yw henna dhis? Ty gwra ow siwya.’

²³Ytho an lavar ma a lesas yn mysk an vreder, na vedha an dyskybel na ow merwel. Mes ny leveris Yesu dhodho na vedha ow merwel, mes ‘Mar mynnav ev dhe wortos bys pan dhov, pyth yw henna dhis?’

²⁴Hemm yw an dyskybel a dheg dustuni a'n taklow ma, ha neb re's skrifas; ha ni a woer y dhustuni dhe vos gwir.

²⁵Hag yma ynwedh lies tra arall a wrug Yesu. Mar pe pubonan anedha skrifys, ny grysav an bys dhe alloes synsi an lyvrow a via skrifys.[70]