Read Kernewek Yowann 3 Bible Online

Yowann 3 - Kernewek bible

Yowann 3

¹Yth esa den a'n Fariseow, Nikodemus y hanow, rewler a'n Yedhewon;

²ev a dheuth dhodho yn nos ha leverel dhodho, ‘Rabbi, ni a woer ty dhe vos dyskador devedhys dhiworth Duw; rag ny yll denvyth gul an toknys ma a wredh tejy marnas Duw a vo ganso.’

³Yesu a worthybis ha leverel dhodho, ‘Yn hwir, yn hwir y lavarav dhis, marnas den a vo genys arta,[7] ny yll gweles gwlaskor Duw.’

⁴Yn-medh Nikodemus dhodho, ‘Fatell yll den bos genys, hag ev den koth? A yll ev entra nessa prys yn torr y vamm ha bos genys?’

⁵Yesu a worthybis, ‘Yn hwir, yn hwir y lavarav dhis, marnas den a vo genys a dhowr hag a Spyrys, ny yll ev entra yn gwlaskor Duw.

⁶An pyth yw genys a'n kig yw kig, ha'n pyth yw genys a'n Spyrys yw spyrys.

⁷Na vedhes marth dhis my dhe leverel dhis, “Res yw hwi dhe vos genys arta.”[8]

⁸An gwyns a hwyth le may fynno ha ty a glew y son, mes ny wodhes a-ble teu na ple'th a; yndella yw peub neb yw genys dhiworth an Spyrys.’

⁹Nikodemus a worthybis ha leverel dhodho, ‘Fatell yll hemma bos?’

¹⁰Yesu a worthybis ha leverel dhodho, ‘Osta dyskador dhe Ysrael ha ny wodhes an taklow ma?

¹¹‘Yn hwir, yn hwir y lavarav dhis, ni a gews an pyth a wodhon, ha ni a dheg dustuni a'n pyth a welsyn; ha ny dhegemmerowgh agan dustuni.

¹²Mar terivis dhywgh taklow a'n bys ha ny grysowgh, fatell grysowgh mar terivav dhywgh taklow a nev?

¹³Ha ny yskynnas denvyth bys yn nev marnas ev neb a dheuth yn-nans, Mab an den.[9]

¹⁴Ha kepar dell dhrehevis Moyses an sarf y'n gwylvos, yndella res yw Mab an den dhe vos drehevys,

¹⁵may fo bewnans heb diwedh dhe beub a grys ynno.’[10]

¹⁶‘Rag kemmys y karas Duw an bys, may ros ev y unn Vab dineythys, rag nag ella dhe goll neb a grys ynno ev, mes may fe dhodho bewnans heb diwedh.

¹⁷‘Rag ny dhannvonas Duw y Vab a-bervedh y'n bys rag breusi an bys, mes may fe an bys selwys dredho.

¹⁸Nyns yw breusys neb a grys ynno ev; mes neb na grys yw breusys seulabrys, rag ny grysis yn hanow an unn Vab dineythys a Dhuw.

¹⁹Ha hemm yw an vreus: golow re dheuth y'n bys, ha'n dus a garas an tewlder moy es an golow, rag bos drog aga oberow.

²⁰Rag seul a wra drog a gas an golow, ha ny dheu dhe'n golow, ma na vo diskudhys y oberow.

²¹Mes neb a wra gwirder a dheu dhe'n golow, may fo diskwedhys y oberow, i dhe vos gwrys yn Duw.’

²²Wosa henna, Yesu ha'y dhyskyblon a dheuth dhe bow Yudi, hag ena ev a wortas gansa, ow pesydhya.

²³Hag yth esa Yowann ynwedh ow pesydhya yn Aynon ogas dhe Salim, rag bos meur a dhowr ena; hag yth esa tus ow tos hag ow pos besydhys.

²⁴Rag ny via Yowann hwath tewlys yn prison.

²⁵Ena dadhel a sordyas yntra re a dhyskyblon Yowann ha'n Yedhewon a-dro dhe lanheans.

²⁶Hag i a dheuth dhe Yowann ha leverel dhodho, ‘Rabbi, ev neb a veu genes a'n tu arall dhe'n Yordan, a neb ty re dhug dustuni, otta, yma ev ow pesydhya, hag yma pub den oll ow tos dhodho.’

²⁷Yowann a worthybis ha leverel, ‘Ny yll den degemmeres travyth, marnas henna a vo res dhodho dhiworth an nevow.

²⁸Hwi agas honan a dheg dustuni ahanav, my dhe leverel nag ov vy an Krist, mes dannvenys ov a-dheragdho.

²⁹Ev neb a gyv an briesvyrgh yw an gour pries; mes koweth an gour pries neb a sev ha goslowes orto a lowenha yn feur drefenn lev an gour pries. Ytho an lowena ma usi dhymmo vy yw kollenwys.

³⁰Res yw ev dhe ynkressya, mes my dhe lehe.’

³¹Ev neb a dheu a wartha yw dres pup-tra; ev neb yw a'n nor yw a'n nor hag ev a gews a'n nor. Ev neb a dheu a nev yw dres pup-tra

³²An pyth re welas ha re glewas, ev a dheg dustuni anodho, ha denvyth ny dhegemmer y dhustuni.

³³Neb a dhegemmer y dhustuni re worras y sel war hemma: Duw dhe vos lel.

³⁴Rag ev neb re wrug Duw y dhannvon a gews geryow Duw, rag ny re ev an Spyrys orth musur.

³⁵An Tas a gar an Mab hag ev re ros pup-tra yn y dhorn.

³⁶Ev neb a grys y'n Mab a'n jeves bewnans heb diwedh, ha neb na grys y'n Mab ny welvydh bewnans; mes sorr Duw a drig warnodho.