Read Kernewek Yowann 4 Bible Online

Yowann 4 - Kernewek bible

Yowann 4

¹Rakhenna pan wodhva Yesu y klewsa an Fariseow Yesu dhe wul ha dhe vesydhya moy dyskyblon es dell wrug Yowann

²(kyn na wrug Yesu y honan besydhya, mes y dhyskyblon),

³ev a asas Yudi ha mos arta dhe Alile.

⁴Ha res o dhodho tremena dre Samaria.

⁵Ytho ev a dheuth dhe sita a Samaria henwys Syghar, ogas dhe'n splatt a ros Yakob dh'y vab Yosep.

⁶Ena yth esa fenten Yakob. Yesu ytho, skwith drefenn an vyajya, o esedhys ryb an fenten. A-dro dhe'n hweghves eur o hi.

⁷Benyn a Samaria a dheuth rag tenna dowr. Yn-medh Yesu dhedhi, ‘Ro dhymm dhe eva.’

⁸(Rag gylsens y dhyskyblon y'n sita dhe brena boes.)

⁹Ena yn-medh an venyn a Samaria, ‘Fatell wredh jy, ha ty Yedhow, pysi dowr ahanav vy, ha my benyn a Samaria?’ Rag ny geskowethyons Yedhewon gans Samaritanys.

¹⁰Yesu a worthybis ha leverel dhedhi, ‘Mar kodhves ro Duw, ha piw yw neb a lever dhis, “Ro dhymm dhe eva”, ty a wrusses y bysi, hag ev a rossa dhis dowr bew.’

¹¹Yn-medh an venyn dhodho, ‘Syrra, nyns eus genes na hwath kelorn, ha'n puth yw down; ytho a-ble kevydh an dowr bew na?

¹²Osta brassa ages agan tas Yakob, neb a ros dhyn an puth, hag ev y honan a evas dhiworto, ha'y vebyon, ha'y flokkys?’

¹³Yesu a worthybis ha leverel dhedhi, ‘Peub a yv a'n dowr ma a'n jevydh syghes arta;

¹⁴mes piwpynag a effo a'n dowr a rov vy dhodho ny'n jevydh syghes bynitha; mes an dowr a rov dhodho a vydh ynno fenten a dhowr ow frosa bys yn bewnans heb diwedh.’

¹⁵Yn-medh an venyn dhodho, ‘Syrra, ro dhymm an dowr ma, rag na'm bo syghes, ha ma na dhyffiv omma dhe denna.’

¹⁶Yn-medh ev dhedhi, ‘Ke, galw dha wour ha deus omma.’

¹⁷An venyn a worthybis ha leverel dhodho, ‘Nyns eus dhymm gour.’ Yn-medh Yesu dhedhi, ‘Yn ewn ty a lever, “Nyns eus dhymm gour”;

¹⁸rag re beu dhis pymp gour, ha neb usi dhis lemmyn nyns yw dha wour; ty a gewsis an gwir.’

¹⁹Yn-medh an venyn dhodho, ‘Syrra, my a wel ty dhe vos profoes.

²⁰Agan tasow re wordhyas y'n menydh ma; ha hwi a lever, bos yn Yerusalem an tyller may tegoedh gordhya.’

²¹Yesu a leveris dhedhi, ‘Krys dhymm, benyn, an eur a dheu pan na wordhyowgh an Tas nag y'n menydh ma nag yn Yerusalem.

²²Hwi a wordh an pyth na wodhowgh; ni a wordh an pyth a wodhon, rag yma selwyans dhiworth an Yedhewon.

²³Mes an eur a dheu, ha lemmyn yth yw, pan wra an wordhyoryon wir gordhya an Tas yn spyrys hag yn gwiryonedh; rag an Tas a hwila tus a'n par na dh'y wordhya.

²⁴Duw yw Spyrys, ha res yw dh'y wordhyoryon y wordhya yn spyrys hag yn gwiryonedh.’

²⁵Yn-medh an venyn dhodho, ‘My a woer Messia, henwys Krist, dhe dhos; pan dheu, ev a dheriv dhyn pup-tra.’

²⁶Yn-medh Yesu dhedhi, ‘My, neb a gews dhis, yw ev.’

²⁷Gans henna y dhyskyblon a dheuth ha marth a's teva ev dhe gewsel gans benyn; byttegyns denvyth ny leveris, ‘Pandr'a hwilydh?’, po ‘Prag y kewsydh gensi?’

²⁸Ytho an venyn a asas hy seth-dowr hag eth bys y'n sita, hag yn-medh hi dhe'n dus,

²⁹‘Dewgh, gwelewgh den neb a leveris dhymm pup-tra re wrugavy; a nyns yw hemma an Krist?’

³⁰I eth yn-mes a'n sita, hag yth esens ow tos dhodho.

³¹Y'n keth termyn y dhyskyblon a'n pysis, ‘Mester, gwra dybri.’

³²Mes yn-medh ev dhedha, ‘Yma dhymm boes ma na wodhowgh hwi anodho.’

³³Ytho y dhyskyblon a leveris an eyl dh'y gila, ‘A wrug nebonan dri dhodho neppyth dhe dhybri?’

³⁴Yn-medh Yesu dhedha, ‘Ow boes vy yw, my dhe wul bolonjedh neb a'm dannvonas ha dhe gowlwul y ober ev.

³⁵A ny leverowgh, “Yma hwath peswar mis, hag ena a teu an drevas”? Otta, my a lever dhywgh, drehevewgh agas dewlagas yn-bann, ha mirewgh orth an gwelyow, i dhe vos gwynn lemmyn rag an drevas.

³⁶An myser a gyv y arveth, hag a guntell frut rag bewnans heb diwedh, rag may lowenhaho war-barth an haser ha'n myser.

³⁷Rag yndella gwir yw an lavar, “Unn den yw an gonador, ha den arall yw an myser.”

³⁸My a'gas dannvonas mes dhe vysi an pyth na wrussowgh lavurya ragdho; re erell a lavuryas ha hwi re dheuth yn aga lavur.’

³⁹Ha lies a'n Samaritanys a'n sita na a grysis ynno drefenn ger an venyn, a dhestas, ‘Ev a leveris dhymm pup-tra re wrugavy.’

⁴⁰Ytho pan dheuth an Samaritanys dhodho, i a'n pysis a wortos gansa; hag ev a wortas ena dew dhydh.

⁴¹Ha lies moy a grysis drefenn y eryow,

⁴²hag yn-medhons dhe'n venyn, ‘Ny grysyn na fella drefenn dha lavar jy, mes ni agan honan re glewas ha godhvos hemma dhe vos yn hwir Selwador an bys.’

⁴³Dew dhydh a-wosa, ev eth alena bys yn Galile.

⁴⁴Rag Yesu y honan a dhestas, nag eus dhe brofoes enor yn y vro y honan.

⁴⁵Ytho pan dheuth yn Galile, tus Galile a'n wolkommas, drefenn i dhe weles pup-tra a wrug yn Yerusalem y'n dy'goel, rag gylsens i ynwedh dhe'n dy'goel.

⁴⁶Ytho Yesu a dheuth arta bys yn Kana a Alile, le may hwrug an dowr yn gwin. Hag yth esa yn Kapernaum neb soedhek ryel, mayth o klav y vab.

⁴⁷Pan glewas ev Yesu dhe vos devedhys yn Galile dhiworth Yudi, ev eth dhodho ha'y bysi a dhos yn-nans ha yaghhe y vab, rag ev a veu yn eneworres.

⁴⁸Ytho yn-medh Yesu dhodho, ‘Marnas hwi a wel toknys ha marthusyon, ny grysowgh.’

⁴⁹An soedhek ryel a leveris dhodho, ‘Syrra, deus yn-nans kyns ow flogh dhe verwel.’

⁵⁰Yn-medh Yesu dhodho, ‘Ke yn-rag, dha vab a vew.’ An den a grysis an ger a gewsis Yesu dhodho, hag yth eth dhe-ves.

⁵¹Hag ev ow mos yn-nans, y gethwesyon a dheuth er y bynn ha leverel dhodho, y vab dhe vos bew.

⁵²Ytho ev a wovynnas orta an eur mayth omwellhas. Yn-medhons dhodho, ‘De, dhe'n seythves eur an fevyr a'n gasas.’

⁵³Ytho an tas a wodhva y feu y'n keth eur na pan leveris Yesu dhodho, ‘Dha vab a vew.’ Hag ev hag oll y vayni a grysis.

⁵⁴Lemmyn hemma a veu an nessa tokyn a wrug Yesu pan dheuth dhe Alile dhiworth Yudi.