Read Kernewek Yowann 6 Bible Online

Yowann 6 - Kernewek bible

Yowann 6

¹Wosa hemma, Yesu eth dhe'n tu arall a vor Galile (henn yw, Tiberias).

²Ha routh veur a'n siwyas, rag yth esons ow kweles an toknys a wre war an glevyon.

³Ha Yesu eth yn-bann y'n menydh, hag ena ev a esedhas gans y dhyskyblon.

⁴Hag yth esa an pask, dy'goel an Yedhewon, ow tos nes.

⁵Ytho pan dhrehevis Yesu y dhewlagas, ha gweles routh veur devedhys dhodho, yn-medh ev dhe Felip, ‘A-ble hwren ni prena bara, rag may teppro an dus ma?’

⁶Ev a leveris hemma dh'y brevi; rag ev y honan a wodhva pandr'a vynna y wul.

⁷Felip a worthybis dhodho, ‘Ny via bara a dhew kans diner lowr ragdha, rag may kemmerro pubonan temmik.’

⁸Onan a'y dhyskyblon, Androw broder Simon Peder, a leveris dhodho,

⁹‘Yma maw omma, ha dhodho pymp torth-vara heydh ha dew bysk vyghan; mes pyth yw henna rag kemmys tus?’

¹⁰Yn-medh Yesu, ‘Gwrewgh dhe'n wer esedha.’ Lemmyn yth esa meur a wels y'n le. Ytho an wer a esedhas, a-dro dhe bymp mil aga niver.

¹¹Ytho Yesu a gemmeras an torthow ha wosa ri grasow ev a ros dhe'n re esedhys,[14] hag y'n keth vaner a'n puskes, kemmys dell vynnsons.

¹²Pan vons lenwys, ev a leveris dh'y dhyskyblon, ‘Kuntellewgh an brewyon yw gesys, rag na vo kellys travyth.’

¹³Ytho i a's kuntellas, ha lenwel dewdhek kanstellas a vrewyon a'n pymp torth heydh, ha re bia moy es lowr dhe'n re a dhybris.

¹⁴Ena an dus, pan welsens an tokyn a wrug Yesu, a leveris, ‘Hemma dhe wir yw an profoes a dal dos y'n bys.’

¹⁵Ytho pan wodhva Yesu i dhe dhos dh'y dhalghenna gans nerth rag y wul myghtern, ev eth dhe-ves arta y'n menydh, y honan.

¹⁶Ha devedhys an gorthugher, y dhyskyblon eth yn-nans dhe'n mor,

¹⁷hag entra a-bervedh yn gorhel, ha mos dres an mor, troha Kapernaum. Seulabrys tewl o hi, ha ny veu Yesu hwath devedhys dhedha.

¹⁸Ha'n mor a dhrehevis drefenn gwyns meur esa ow hwytha.

¹⁹Ytho pan wrussens roevya neb pymp erowhys warn ugens, i a welas Yesu ow kerdhes war an mor, hag ow tos nes dhe'n gorhel; hag own a's teva.

²⁰Mes yn-medh ev dhedha, ‘My yw; na berthewgh own.’

²¹Ena i a vynnas y gemmeres a-bervedh y'n gorhel, ha hware an gorhel a dheuth dhe'n lann mayth esens ow mos.

²²Ternos, an routh ow kortos dhe du arall an mor a welas na via gorhel arall ena saw onan, ha na wrussa Yesu mos a-bervedh y'n gorhel dh'y dhyskyblon, saw unnsel y dhyskyblon a wrussa mos dhe-ves.

²³Mes gorholyon erell a dheuth dhiworth Tiberias, ogas dhe'n tyller may tyb'sens an bara, wosa an Arloedh dhe ri grasow.

²⁴Ytho pan welas an routh nag esa Yesu ena, nag y dhyskyblon, i ynwedh eth a-bervedh yn gorholyon ha dos dhe Kapernaum, ow hwilas Yesu.

²⁵Ha pan y'n kavsons dhe du arall an mor, yn-medhons dhodho, ‘Rabbi, p'eur hwrussys dos omma?’

²⁶Yesu a worthybis dhedha ha leverel, ‘Yn hwir, yn hwir y lavarav dhywgh, ny'm hwilowgh drefenn hwi dhe weles toknys, mes drefenn hwi dhe dhybri a'n torthow ha bos lenwys.

²⁷Na lavuryewgh rag boes a wra pedri, mes rag boes a dhur bys yn bewnans heb diwedh, hag a wra Mab an den y ri dhywgh; rag warnodho an Tas re settyas y sel.’

²⁸Ytho yn-medhons dhodho, ‘Pandr'a wren rag kowlwul oberow Duw?’

²⁹Yesu a worthybis ha leverel dhedha, ‘Hemm yw ober Duw, hwi dhe grysi ynno ev neb a wrug y dhannvon.’

³⁰Rakhenna yn-medhons dhodho, ‘Py tokyn a wredh ytho, rag may hwellyn ha krysi ynnos? Pandr'a wredh y oberi?

³¹Agan tasow a dhybri manna y'n gwylvos, dell yw skrifys: “Ev a ros dhedha bara a nev dhe dhybri.” ’

³²Ytho Yesu a leveris dhedha, ‘Yn hwir, yn hwir y lavarav dhywgh, nyns o Moyses neb a ros dhywgh an bara a nev, mes ow Thas yth yw neb a re dhywgh an gwir vara a nev.

³³Rag bara Duw yw ev neb a dheu yn-nans dhiworth nev ha neb a re bewnans dhe'n bys.’

³⁴Ytho i a leveris dhodho, ‘Arloedh, ro dhyn an bara ma bynitha.’

³⁵Yesu a leveris dhedha, ‘My yw an bara a vewnans; neb a dheu dhymmo vy ny'n jevydh nown bynitha, ha neb a grys ynnov vy ny'n jevydh syghes nevra.

³⁶Mes my a leveris dhywgh, hwi re'm gwelas, ha ny grysowgh.

³⁷Pup-tra a re an Tas dhymm a dheu dhymm, ha piwpynag a dheffo dhymm, ny wrav vy nevra y dewlel mes.

³⁸Rag nyns ov vy devedhys yn-nans dhiworth nev dhe wul ow bolonjedh ow honan, marnas bolonjedh neb a'm dannvonas.

³⁹Ha hemm yw bolonjedh neb a'm dannvonas, ma na wrylliv kelli travyth a bup-tra re ros ev dhymm, mes y dhrehevel yn-bann dydh fin.

⁴⁰Rag hemm yw bolonjedh ow Thas: pubonan a wel an Mab ha krysi ynno a gyv bewnans heb diwedh, ha my a'n drehav dydh fin.’

⁴¹Rakhenna an Yedhewon a grodhvolas warnodho, rag ev dhe leverel, ‘My yw an bara a dheuth yn-nans dhiworth nev’,

⁴²hag yn-medhons, ‘A nyns yw hemma Yesu mab Yosep neb a aswonnyn y das ha'y vamm? Fatell lever ytho, “Devedhys ov vy yn-nans dhiworth nev”?’

⁴³Yesu a worthybis ha leverel dhedha, ‘Na grodhvolewgh yntredhowgh.

⁴⁴Ny yll denvyth dos dhymmo vy marnas an Tas neb a'm dannvonas a'n tenn; ha my a'n drehav dydh fin.

⁴⁵Skrifys yw y'n brofoesi, “Hag i oll a vydh dyskys gans Duw.” Seul a woslow orth an Tas ha dyski anodho, a dheu dhymmo vy.

⁴⁶Nyns yw, nebonan dhe weles an Tas marnas ev neb usi dhiworth Duw; ev re welas an Tas.

⁴⁷Yn hwir, yn hwir y lavarav dhywgh, neb a grys[15] a'n jeves bewnans heb diwedh.

⁴⁸My yw an bara a vewnans.

⁴⁹Agan tasow a dhybri manna y'n gwylvos, hag i a verwis.

⁵⁰Hemm yw an bara a dheu yn-nans dhiworth nev, rag may teppro den anodho, ha na varwo.

⁵¹My yw an bara bew a dheuth yn-nans dhiworth nev; mar teber den a'n bara ma, ev a vew bynitha; ha'n bara a rov yw ow hig, rag bewnans an bys.’

⁵²Rakhenna an Yedhewon a gedrynnas an eyl gans y gila, ow leverel, ‘Fatell yll hemma ri dhyn kig[16] dhe dhybri?’

⁵³Ytho Yesu a leveris dhedha, ‘Yn hwir, yn hwir y lavarav dhywgh, marnas hwi a dheber kig Mab an den, hag eva y woes, ny'gas beus bewnans ynnowgh agas honan.

⁵⁴Piwpynag a dheber ow hig hag eva ow goes a'n jeves bewnans heb diwedh, ha my a'n drehav dydh fin.

⁵⁵Rag ow hig yw boes yn hwir, ha'm goes yw diwes yn hwir.[17]

⁵⁶Piwpynag a dheber ow hig hag eva ow goes a drig ynnov vy, ha my ynno ev.

⁵⁷Dell y'm dannvonas an Tas bew, ha my a vew der an Tas, yndella neb a'm deber, henna a'n jevydh bewnans dredhov vy.

⁵⁸Hemm yw an bara a dheuth yn-nans dhiworth nev. Nyns yw kepar ha pan dhybri an tasow,[18] hag i a verwis; neb a dheber an bara ma a vew bynitha.’

⁵⁹Ev a gewsis an taklow ma y'n synaga, hag ev ow tyski yn Kapernaum.

⁶⁰Rakhenna, lies a'y dhyskyblon pan glewsons hemma a leveris, ‘Kales yw an lavar ma; piw a yll y glewes?’

⁶¹Yesu, ow konvedhes y dhyskyblon dhe grodhvolas a-dro dhe hemma a leveris dhedha, ‘A wra hemma agas sklandra?

⁶²Pandra ytho mar kwelowgh Mab an den owth yskynna dhe'n tyller mayth esa kyns?

⁶³An Spyrys yth yw neb a re vewnans; nyns eus prow vyth y'n kig. An geryow a gowsav dhywgh, yth yns i spyrys, ha bewnans.

⁶⁴Mes yma re yntredhowgh neb na grysons.’ Rag Yesu a wodhva a'n dalleth piw ens i neb na gryssons, ha piw o neb a wrussa y drayta.

⁶⁵Hag yn-medh ev, ‘Rakhenna my a leveris dhywgh, na yll denvyth dos dhymmo vy marnas hemm yw grontys dhodho gans ow Thas.’

⁶⁶Alena rag lies a'y dhyskyblon eth war-dhelergh, ha ny gerdhens ganso namoy.

⁶⁷Ena Yesu a leveris dhe'n dewdhek, ‘Hwi ynwedh, a vynnowgh hwi mos yn-kerdh?’

⁶⁸Simon Peder a worthybis dhodho, ‘Arloedh, piw y hwren ni mos dhodho? Yma dhis an geryow a vewnans heb diwedh.

⁶⁹Ha ni a grys, hag a woer ty dhe vos an Sans a Dhuw.’[19]

⁷⁰Yesu a worthybis dhedha, ‘A ny wrugavy agas dewis, agas dewdhek? Hag onan ahanowgh yw dyowl.’

⁷¹Ev a gewsi a Yudas mab Simon Skaryoth; rag ev, onan a'n dewdhek, a vedha orth y drayta.