Read Kernewek Yowann 7 Bible Online

Yowann 7 - Kernewek bible

Yowann 7

¹Wosa hemma, yth esa Yesu ow kerdhes yn Galile; rag ny vynna kerdhes yn Yudi, rag an Yedhewon a hwila y ladha.

²Mes ogas veu goel an Yedhewon, an skovvaow;

³ytho y vreder a leveris dhodho, ‘Voyd alemma, ha ke yn Yudi, rag may hwello dha dhyskyblon, i ynwedh, an oberow a wredh.

⁴Rag ny ober denvyth yn-dann gel neb a hwila bos aswonnys apert. Mar kwredh an taklow ma, diskwa dha honan dhe'n bys.’

⁵Rag ny grysi ynno na hwath y vreder.

⁶Ytho Yesu a leveris dhedha, ‘Nyns yw devedhys ow eur vy na hwath; mes agas eur hwi yw parys pup-prys.

⁷Ny yll an bys agas kasa, mes ev a'm kas, rag my a dheg dustuni anodho, y wriansow dhe vos drog.

⁸Kewgh hwi yn-bann dhe'n goel; my ny av yn-bann[20] dhe'n goel ma; rag nyns yw kowlwrys ow eur na hwath.’

⁹Wosa leverel an taklow ma,[21] ev a wortas yn Galile.

¹⁰Mes wosa y vreder dhe vos yn-bann dhe'n goel, ena ev ynwedh eth yn-bann; ny'n gwrug yn apert, mes kepar dell via yn-dann gel.

¹¹Ytho an Yedhewon a'n hwilas y'n goel hag a leveris, ‘Ple'ma'n den na?’

¹²Hag yth esa krodhvol meur y'n routh yn y gever; rag re a leveri, ‘Dremas yw’, mes re erell a leveri, ‘Nag yw, mes ev a doell an routh.’

¹³Byttegyns ny gewsi denvyth yn apert yn y gever, rag own a'n Yedhewon.

¹⁴Lemmyn yn kres an goel, Yesu eth yn-bann dhe'n tempel hag yth esa ow tyski.

¹⁵Marth a's teva an Yedhewon, ow leverel, ‘Fatell yll ev bos lettrys, pan na studhyas bythkweth?’

¹⁶Ytho Yesu a worthybis dhedha ha leverel, ‘Nyns yw ow dyskas dhymm ow honan, mes dhe neb a'm dannvonas.

¹⁷Mar mynn nebonan gul y volonjedh, ev a woer a-dro dhe'n dyskas, pyneyl y vos a Dhuw, po my dhe gewsel a'm awtorita ow honan.[22]

¹⁸Neb a gews a'y awtorita y honan[23] a hwila y enor y honan; mes neb a hwila an enor anodho ev neb a'n dannvonas, hemma yw gwir, ha nyns eus ynno anwiryonedh.

¹⁹‘A ny ros Moyses an lagha dhywgh? Mes denvyth ahanowgh ny with an lagha. Prag y hwilowgh ow ladha?’

²⁰An routh a worthybis, ‘Yma dyowl dhis; piw a hwila dha ladha?’

²¹Yesu a worthybis ha leverel dhedha, ‘Unn ober re wrugavy, ha hwi oll a'gas beus marth.

²²Rakhenna Moyses a ros dhywgh an trodreghyans (nyns yw, henna dhe vos dhiworth Moyses, mes dhiworth an tasow); ha hwi a drodregh den y'n sabot.

²³Mar tegemmer den trodreghyans y'n sabot rag na vo lagha Moyses terrys, owgh hwi serrys orthiv rag my dhe yaghhe den yn tien y'n sabot?

²⁴Na vreusiwgh herwydh an semlans, mes breusiwgh gans breus gwiryon.’

²⁵Ena re a dus Yerusalem a leveris, ‘A nyns yw hemma ev neb a hwilons y ladha?

²⁶Hag otta, ev a gews yn apert, ha ny leverons dhodho travyth. A aswonnis an rewloryon hemma dhe vos yn hwir an Krist?

²⁷Mes ni a aswonn an den ma, a by le'ma; ha pan dheu an Krist, ny woer denvyth a by le'ma.’

²⁸Ytho Yesu a grias y'n tempel, hag ev ow tyski, hag a leveris, ‘Hwi a'm aswonn, ha hwi a woer a-ble ov. Ha nyns ov vy devedhys ahanav ow honan, mes gwir yw ev neb a'm dannvonas, neb na aswonnowgh.

²⁹My a'n aswonn, rag yth esov vy dhiworto, hag ev a'm dannvonas.’

³⁰Rakhenna i a hwilas y dhalghenna, mes ny settyas denvyth dorn ynno, rag nyns o devedhys y eur ev.

³¹Ha lies a'n routh a grysis ynno ha leverel, ‘Pan dheu an Krist, a wra ev toknys moy es dell wra an den ma?’

³²An Fariseow a glewas an routh ow krodhvolas yndella a-dro dhodho, ha'n bennoferysi ha'n Fariseow a dhannvonas gwesyon dh'y dhalghenna.

³³Ytho Yesu a leveris, ‘Pols byghan yth esov vy hwath genowgh, hag ena yth av dhe neb a'm dannvonas.

³⁴Hwi a'm hwila ha ny'm kevowgh; ha le mayth esov vy, dhi ny yllowgh hwi dos.’

³⁵Ena an Yedhewon a leveris an eyl dh'y gila, ‘Ple'th a an den ma, ma na yllyn y gavoes? A vynn ev mos dhe'n skattrys yn mysk an Grekys, ha dyski dhe'n Grekys?

³⁶Pyth yw an lavar a gewsis an den ma, “Hwi a'm hwila ha ny'm kevowgh”, ha “Le mayth esov vy, dhi ny yllowgh hwi dos”?’

³⁷Y'n jydh diwettha, dydh meur an goel, Yesu a sevis ha kria, ow leverel, ‘Den mara'n jeves syghes, des ev dhymmo vy, hag eva.

³⁸Neb a grys ynnov vy, dell lever an skryptor, “Yn-mes a'y dorr, resek a wra avonyow a dhowr bew.” ’

³⁹Ev a gewsis hemma a-dro dhe'n Spyrys, a vedha degemmerys gans an re a grys[24] ynno ev; rag ny via an Spyrys[25] res na hwath, drefenn na veu Yesu glorifiys na hwath.

⁴⁰Re yn mysk an routh pan glewsons an geryow ma a leveri, ‘Hemm yw yn hwir an profoes.’

⁴¹Re erell a leveri, ‘Hemm yw an Krist’; mes re a leveri, ‘A dheu Krist a Alile?

⁴²A ny lever an skryptor, Krist dhe dhos a has Davydh, hag a Bethlehem, an dre mayth esa Davydh?’

⁴³Ytho yth esa fols y'n routh a-dro dhodho.

⁴⁴Ha re anedha a vynna y dhalghenna, mes denvyth ny settyas diwla warnodho.

⁴⁵Ytho an wesyon a dheuth dhe'n bennoferysi ha'n Fariseow; hag i a leveris dhedha, ‘Prag na wrussowgh y dhri?’

⁴⁶An wesyon a worthybis, ‘Ny wrug denvyth bythkweth kewsel yndella, dell wra an den ma.’[26]

⁴⁷Ytho an Fariseow a worthybis dhedha, ‘Owgh hwi ynwedh toellys?

⁴⁸A wrug tus vydh a'n rewloryon krysi ynno, po a'n Fariseow?

⁴⁹Mes an routh ma, neb na woer an lagha, yw milligys.’

⁵⁰Yn-medh Nikodemus dhedha (ev neb a dheuth dhodho kyns,[27] hag ev onan anedha),

⁵¹‘A wra agan lagha breusi den heb goslowes orto kyns, ha godhvos pandr'a wra?’

⁵²I a worthybis ha leverel dhodho, ‘Es'ta jy ynwedh a Alile? Hwila ha gwel, na sev profoes dhiworth Galile.’

⁵³Ha pubonan eth dh'y ji y honan.