Read Kernewek Oberow 1 Bible Online

Oberow 1 - Kernewek bible

Oberow 1

¹Y'n kynsa lyver, O Theofilus, my a skrifas a-dro dhe'n taklow oll hag a dhallathas Yesu ha gul ha dyski

²bys y'n jydh may feu kemmerys yn-bann, wosa ev dhe ri gorhemmynnow der an Spyrys Sans dhe'n abesteli neb re dhewissa;

³dhedha ynwedh ev a omdhiskwedhas yn few dre lies prov wosa ev dhe wodhevel, dres dew-ugens dydh owth omdhiskwedhes dhedha hag ow kewsel a-dro dhe wlaskor Duw;

⁴hag owth omguntell gansa,[1] ev a erghis dhedha ma na dhibarthens a Yerusalem, mes gortos dedhewadyow an Tas, ‘hag a glewsowgh ahanav’, yn-medh ev;

⁵‘Rag Yowann a vesydhyas gans dowr, mes kyns lies dydh besydhys vydhowgh gans an Spyrys Sans.’

⁶Ytho, hag i kuntellys war-barth, i a wovynnas orto, ow leverel, ‘Arloedh, a wre'ta y'n tor' ma daskorr an wlaskor dhe Ysrael?’

⁷Ev a leveris dhedha, ‘Nyns yw dhywgh hwi godhvos na prysyow na sesonyow re settyas an Tas der y awtorita y honan.

⁸Mes hwi a dhegemmer nerth pan dheu an Spyrys Sans warnowgh, ha dustunioryon vydhowgh dhymm, hag yn Yerusalem hag yn oll Yudi ha Samaria ha bys penn pella an norvys.’

⁹Ha pan lavarsa hemma, hag i ow mires, ev a veu kemmerys yn-bann ha kommolenn a'n degemmeras mes a'ga golok.

¹⁰Ha pan esens ow mires stark troha nev, hag ev ow mos, otta dew wour a sevis rybdha, gwynn aga dillas,

¹¹neb a leveris, ‘Gwer Galile, prag y sevowgh hwi ow mires troha nev? An Yesu ma, neb re beu kemmerys yn-bann dhiworthowgh yn nev, a dhei y'n keth vaner ma'n gwelsowgh ow mos yn nev.’

¹²Ena i a dhehwelis dhe Yerusalem dhiworth an menydh henwys Oliv, usi ogas dhe Yerusalem, pellder kerdh an sabot.

¹³Ha pan entersens, i eth yn-bann dhe stevell an soler mayth esens i trigys, Peder ha Yowann ha Jamys hag Androw, Felip ha Tommas, Bertyl ha Matthew, Jamys mab Alfeus ha Simon Zelotes ha Yudas mab Jamys.

¹⁴Oll an re ma gans unn akord a omri dhe bysadow, gans an benynes ha Maria mamm Yesu ha gans y vreder.

¹⁵Hag y'n dydhyow na Peder a sevis yn-bann yn mysk an vreder — niver an routh kuntellys war-barth o a-dro dhe hwegh-ugens — ha leverel,

¹⁶‘Breder, res o an skryptor dhe vos kollenwys, a dharganas an Spyrys Sans dre anow Davydh a-dro dhe Yudas, neb a dheuth ha bos gidyer dhe'n re a dhalghennas Yesu,

¹⁷rag niverys o yn agan mysk, hag ev a gavas gevrenn y'n menystrans ma.

¹⁸Lemmyn hemma a brenas park gans an gober a gammweyth, hag ow koedha sket, y dorr ev a veu folsys a-les yn y gres, hag oll y golodhyon a frosas yn-mes;

¹⁹hag y teuth ha bos godhvedhys oll dhe drigoryon Yerusalem, may feu henwys an park na yn aga yeth aga honan Hakeldama, henn yw, Park Goes.

²⁰Rag skrifys yw yn Lyver an Salmow, “Bedhes y annedh ynyal, na vedhes denvyth dhe driga ynno”; ha “Kemmeres ken onan y soedh.”

²¹Rakhenna y telledh, a'n wer ow kowethya genen dres oll an termyn mayth e an Arloedh Yesu a-ji hag yn-mes yn agan mysk

²²ow talleth dhiworth besydh Yowann bys y'n jydh may feu kemmerys yn-bann dhiworthyn, onan a'n re ma dhe dhos ha bos dustunier genen ni a'y dhasserghyans.’

²³Hag i a settyas yn-rag dew, Yosep henwys Barsabbas, les-henwys Yustus, ha Matthias.

²⁴I a bysis ha leverel, ‘Ty, Arloedh, neb a aswonn kolonnow tus oll, diskwa pyneyl re dhewissys

²⁵dhe gemmeres an tyller[2] y'n menystrans ma hag y'n abostolieth ma, may koedhas Yudas rag mos dh'y le y honan.’

²⁶Hag i a dewlis prenn ragdha, ha'n prenn a goedhas war Matthias, ha reknys o yn mysk an unnek abostol.