Read Kernewek Oberow 10 Bible Online

Oberow 10 - Kernewek bible

Oberow 10

¹Lemmyn yth esa unn gour yn Sesarea henwys Kornelius, penn-kangour an kohort Italek, dell o henwys,

²gour kryjyk, neb a'n jeva own a Dhuw gans y vayni oll, ow ri alusenow yn hel dhe'n bobel ha prest ow pysi war Dhuw.

³A-dro dhe nawves eur an jydh ev a welas diblans yn hunros el Duw ow mos dhodho hag ow leverel dhodho, ‘Kornelius.’

⁴Ev a viras stark orto, ha kemmerys gans own ev a leveris, ‘Pandra, ytho, Arloedh?’ Hag ev a leveris dhodho, ‘Dha bysadow ha'th alusenow re yskynnas avel kovadh dherag Duw.

⁵Lemmyn dannvon gwer dhe Yoppa, rag gelwel unn Simon henwys Peder;

⁶ymava owth ostya gans Simon, dyghtyer kreghyn, neb a'n jeves chi ryb an mor.’

⁷Pan alsa dhe-ves an el neb a gewsis orto, ev a elwis dew a wesyon an mayni ha souder kryjyk a'n re a'n servya prest,

⁸ha pan igorsa pup-tra dhedha, ev a's dannvonas dhe Yoppa.

⁹Ternos, hag i ow vyajya hag ow nesa dhe'n sita, Peder a yskynnas dhe'n to rag pysi, a-dro dhe'n hweghves eur.

¹⁰Ev a dheuth ha bos nownek ha mynnes dybri; hag i ow tarbari, transyek a dheuth warnodho,

¹¹hag ev a welas an nev igerys, ha lester kepar ha lien bras ow tiyskynna, ow pos iselhes er peswar korn dhe'n dor,

¹²hag ynno pub enyval peswar-troesek ha pub kramvil a'n nor ha pub edhen a'n ayr.

¹³Ha lev a dheuth dhodho, ‘Sav yn-bann, Peder; ladh ha deber.’

¹⁴Mes yn-medh Peder, ‘Kamm na yll bos, Arloedh, drefenn na dhybris vy bythkweth travyth kemmyn nag avlan.’

¹⁵Ha'n lev a dheuth dhodho arta, nessa gweyth, ‘An taklow re lanhas Duw, na's galw avlan.’

¹⁶Hemma a hwarva teyrgweyth, hag a-dhistowgh an lester a veu kemmerys yn-bann dhe nev.

¹⁷Lemmyn, ha Peder penndegys a-dro dhe styr an welesigeth a welsa, ott, an wer re bia dannvenys gans Kornelius a wovynnas ple'th esa chi Simon, hag a dheuth dhe'n porth,

¹⁸ha gelwel rag govynn mars esa Simon henwys Peder owth ostya ena.

¹⁹Ha Peder owth ombrederi a-dro dhe'n welesigeth, an Spyrys a leveris, ‘Otta, yma gwer orth dha hwilas;

²⁰sav yn-bann, ha diyskynn, ha ke gansa, heb dout vydh, rag my re's dannvonas i.’

²¹Ha Peder a dhiyskynnas ha leverel dhe'n wer, ‘Otta, my yw neb a hwilowgh; pyth yw skila agas bos omma?’

²²I a leveris, ‘Kornelius, penn-kangour, gour ewnhynsek neb a berth own a Dhuw ha neb yw gerys-da gans oll an genedhel yedhowek, dhodho y feu erghys gans el sans may halwa dh'y ji ev ha goslowes orth an pyth a vynnydh y leverel.’

²³Ytho ev a's gelwis a-ji ha dhe vos y westoryon. Ha ternos ev a sevis yn-bann ha mos dhe-ves gansa, ha niver a'n vreder a Yoppa eth ganso.

²⁴Ternos ev a entras yn Sesarea. Yth esa Kornelius orth aga gortos hag ev re alwsa war-barth y gerens ha'y gowetha nessa.

²⁵Lemmyn y hwarva pan entras Peder, Kornelius a vetyas orto ha koedha orth y dreys, ha'y wordhya.

²⁶Mes Peder a'n drehevis, ow leverel, ‘Sav yn-bann, rag my yw den ynwedh.’

²⁷Hag ev ow kewsel orto, ev eth a-ji ha kavoes lies kuntellys war-barth,

²⁸ha leverel dhedha, ‘Dell gonvedhowgh, erbynn lagha yw rag Yedhow kowethya gans estren po dos nes dhodho; mes Duw re dhiskudhas dhymm na dhegoedh dhymm gelwel denvyth kemmyn nag avlan;

²⁹rakhenna dhe wir pan veuv gelwys my a dheuth heb hokya. My a wovynn, ytho, prag y tannvensowgh hwi war ow lergh?’

³⁰Hag yn-medh Kornelius, ‘Nans yw peswar dydh, dhe'n keth eur ma, dhe'n nawves eur yth esen ow pysi y'm chi, hag otta, gour a sevis a-dheragov, splann y dhillas,

³¹ha leverel, “Kornelius, dha bysadow re beu klewys ha'th alusenow re beu kovhes dherag Duw.

³²Dannvon, ytho, dhe Yoppa ha dannvon war-lergh Simon henwys Peder; ymava owth ostya yn chi Simon, dyghtyer kreghyn, ryb an mor.”

³³Rakhenna my a dhannvonas hware war dha lergh hag a'th kuvder devedhys osta. Lemmyn kuntellys on ni oll dherag Duw rag goslowes orth an taklow oll re beu erghys dhis gans an Arloedh.’

³⁴Ha Peder a igoras y anow ha leverel, ‘Yn hwir, my a gonvedh na syns Duw denvyth a-ugh y gila,

³⁵mes yn pub kenedhel neb a'n jeves own anodho ha gul ewnder yw plegadow dhodho.

³⁶Hwi a woer an ger a dhannvonas ev dhe vebyon Ysrael, ow pregoth kres dre Yesu Krist neb yw Arloedh peub oll.

³⁷Hwi a woer an pyth a hwarva dres Yudi oll, ow talleth a Alile wosa an besydh a bregowthas Yowann,

³⁸fatell untyas Duw Yesu a Nazareth gans an Spyrys Sans ha nerth; neb eth a-dhedro ow kul dader hag ow yaghhe peub o arweskys gans an jowl, drefenn bos Duw ganso.

³⁹Ha dustunioryon on ni dhe bup-tra a wrug ev, hag yn pow an Yedhewon hag yn Yerusalem; i a'n ladhas, orth y gregi yn gwydhenn.

⁴⁰Duw a dhrehevis hemma an tressa dydh, ha gul dhodho bos diskwedhys,

⁴¹a-der dhe'n bobel oll, mes dhyn ni, dewisys kyns gans Duw dhe vos dustunioryon, neb a dhybris ganso hag a evas ganso wosa ev dhe dhasserghi dhiworth an re varow;

⁴²hag ev a erghis dhyn pregoth dhe'n bobel ha doen dustuni ev dhe vos neb re beu ordenys gans Duw avel breusyas a'n re vew ha'n re varow.

⁴³Dhe hemma, oll an brofoesi a dhustuni, kemmys a grysso ynno dhe dhegemmeres dehwelyans peghosow der y hanow.’

⁴⁴Ha Peder hwath ow kewsel an geryow ma, an Spyrys Sans a goedhas war bub huni esa ow koslowes orth an areth.

⁴⁵Ha'n gryjygyon a'n trodreghyans neb re dhothya gans Peder a veu sowdhenys, drefenn bos ro an Spyrys Sans dinewys war an Jentilys ynwedh;

⁴⁶rag i a's klewas ow kewsel yn tavosow hag ow meurhe Duw. Ena Peder a worthybis,

⁴⁷‘A yll nebonan difenn dowr dhe'n re ma na vons besydhys, neb re dhegemmeras an Spyrys Sans kepar ha ni ynwedh?’

⁴⁸Hag ev a erghis may fens i besydhys yn hanow Yesu Krist. Ena i a'n pysis a wortos niver a dhydhyow.