Read Kernewek Oberow 11 Bible Online

Oberow 11 - Kernewek bible

Oberow 11

¹Lemmyn an abesteli ha'n vreder esa yn Yudi a glewas an Jentilys ynwedh dhe dhegemmeres ger an Arloedh.

²Ha pan eth Peder yn-bann dhe Yerusalem, an re a'n trodreghyans a dhisputyas orto,

³ow leverel, ‘Ty eth a-ji gans gwer antrodreghys ha dybri gansa.’

⁴Ytho Peder a dhallathas hag igeri dhedha yn kempenn, ow leverel,

⁵‘Yn sita Yoppa yth esen vy ow pysi, hag yn transyek my a welas gwelesigeth, lester ow tiyskynna kepar ha lien bras ow pos iselhes er peswar korn mes a nev, hag ev a dheuth ogas dhymm.

⁶Ow mires stark ynno my a welas enyvales peswar-troesek an nor, ha'n goedhviles ha'n kramviles hag ydhyn an ayr.

⁷Hag ynwedh my a glewas lev ow leverel dhymm, “Sav yn-bann, Peder, ladh ha deber.”

⁸Mes yn-medhav, “Kamm na yll bos, Arloedh, drefenn na entras bythkweth y'm ganow travyth kemmyn nag avlan.”

⁹Ha nessa gweyth an lev a worthybis mes a nev, “An taklow re lanhas Duw, na's galw kemmyn.”

¹⁰Hemma a hwarva teyrgweyth, ha pup-tra a veu tennys yn-bann arta dhe nev.

¹¹Hag otta, hware, tri gour a sevis a-rag an chi mayth esen vy, dannvenys dhymm dhiworth Sesarea.

¹²Ha'n Spyrys a leveris dhymm mos gansa heb hokya. An hwegh broder ma a dheuth genev ynwedh, ha ni a entras yn chi an gour.

¹³Ev a dherivas dhyn fatell welas an el ow sevel yn y ji hag ow leverel, “Dannvon dhe Yoppa ha galw Simon henwys Peder,

¹⁴neb a gews dhis geryow may fo ty ha'th vayni oll selwys.”

¹⁵Ha my ow talleth kewsel, an Spyrys Sans a goedhas warnedha kepar dell wrug warnan ni y'n dalleth.

¹⁶Ha my a borthas kov a er an Arloedh, pan leveris, “Yn tevri Yowann a vesydhyas gans dowr, mes besydhys vydhowgh hwi y'n Spyrys Sans.”

¹⁷Rakhenna mar ros Duw dhedha an keth ro kepar dell ros dhyn ni pan gryssyn y'n Arloedh Yesu Krist, piw en vy may hallen lettya Duw?’

¹⁸Pan glewsons an taklow ma, i a dewis ha gordhya Duw, ow leverel, ‘Ytho dhe'n Jentilys ynwedh Duw re ros edrek a led dhe vewnans.’

¹⁹Lemmyn an re a veu skattrys der an anken a hwarva a-dro dhe Stefan a vyajyas bys yn Fenikia ha Syprus hag Antiogh, heb kewsel an ger marnas unnsel dhe Yedhewon.

²⁰Mes rann anedha o gwer Syprus ha Kyrene neb a dheuth dhe Antiogh ha kewsel orth an Hellenistyon ynwedh, ow pregoth an Arloedh Yesu.

²¹Hag yth esa leuv an Arloedh gansa, ha niver meur a grysis ha treylya dhe'n Arloedh.

²²Nowodhow a henna a dheuth dhe skovornow an eglos yn Yerusalem, hag i a dhannvonas Barnabas dhe Antiogh.

²³Pan dheuth ha gweles gras Duw ev a lowenhas, hag ev a ynnias war bubonan anedha bos lel dhe'n Arloedh, furv aga holonn,

²⁴rag gour da o, leun a'n Spyrys Sans hag a fydh. Ha niver meur a dus a veu keworrys dhe'n Arloedh.

²⁵Ytho Barnabas eth dhe Tarsus rag hwilas Sowl,

²⁶ha pan y'n kavas ev a'n dros dhe Antiogh. Dell hwarva ynwedh i a omguntellas gans an eglos dres blydhen dhien, ha dyski niver meur a dus. Hag yn Antiogh yn kynsa an dhyskyblon a veu henwys Kristonyon.

²⁷Y'n dydhyow ma profoesi a dheuth yn-nans dhiworth Yerusalem dhe Antiogh;

²⁸hag onan anedha henwys Agabus a sevis yn-bann, ha dargana der an Spyrys y fedha divoetter meur dres oll an norvys; hemma a hwarva yn termyn Klawdius.

²⁹Rakhenna an dhyskyblon a erviras, pub huni herwydh y bygans, dannvon sokor dhe'n vreder trigys yn Yudi.

³⁰Hag yndella i a'n gwrug, ow tannvon dhe'n henavogyon dre leuv Barnabas ha Sowl.